ބޭންކް އޮފް މޯލްޑިވްސްގެ ހެޑް އޮފީސް: ބޭންކަށް ކުރާ ތުހުމަތުތަކަށް ވަނީ މިއަދު ޖަވާބުދީފައި -- މިހާރު ފައިލް ފޮޓޯ
17 ފެބުރުއަރީ 2019 - 17:11
66 comments
ބޮޑު ހިޔާނާތުން އެމްއެމްޕީއާރްސީން ވަގަށް ނަގާފައިވާ ފައިސާ އެސްއޯއެފްގެ އެކައުންޓަށް ޖަމާ ކުރީ ޗެކުތައް އެންޑޯސްކޮށްފައި ހުރުމުން ކަމަށާއި އެސްއޯއެފް އެކައުންޓުގެ މުއާމަލާތްތައް ދިޔައީ ރިޕޯޓް ކުރަމުން ކަމަށް ބޭންކް އޮފް މޯލްޑިވްސް (ބީއެމްއެލް) އިން މިއަދު ބުނެފި އެވެ.
އެމްއެމްޕީއާރްސީ މެދުވެރިކޮށް ހިންގި 1.4 ބިލިއަން ރުފިޔާގެ ހިޔާނާތުގެ 700 ސޮފްހާގެ ރިޕޯޓް އެންޓި ކޮރަޕްޝަން ކޮމިޝަން (އޭސީސީ) އިން ބުރާސްފަތި ދުވަހު ނެރުމާއެކު ހިޔާނާތް ހިންގާފައި ވަނީ ބީއެމްއެލް ބައިވެރިވެގެން ކަމަށް ބުނެ ގިނަ ބަޔަކު ދިޔައީ ފާޑުކިޔަމުންނެވެ.
އެގޮތުން އެމްއެމްޕީއާރްސީ އަށް ލިބެންޖެހޭ ފައިސާގެ ޗެކުތައް އެސްއޯއެފް އެކައުންޓަށް ސުވާލެއް ނެތި ޖަމާ ކުރުމާއި ވަގަށް ނެގި ފައިސާ އެސްއޯއެފުން އެކި މީހުންނަށް ޓްރާންސްފާ ކުރިއިރު ބޭންކުން އެއްވެސް ފިޔަވަޅެއް އަޅާފައި ނެތް ކަމަށް ފާޑުކިޔާ މީހުން ބުނެ އެވެ. ބޭންކުން އަމަލުކޮށްފައި ވަނީ ގާނޫނާއި ގަވާއިދާ ހިލާފަށް ކަމަށް ވެސް ގިނަ ބަޔަކު ދަނީ ތުހުމަތު ކުރަމުންނެވެ.
ބޭންކަށް އަމާޒުވެފައިވާ ތުހުމަތުތަކަށް ރައްދުދީ މިއަދު ނެރެފައިވާ ބަޔާނުގައި ބުނެފައި ވަނީ "ބޭންކު ތެރެއިން މި މުއާމަލާތް ހިނގާފައި ވަނީ ކޮން އުސޫލަކުންކަން ބަޔާންކޮށް ނުދޭހާ ހިނދަކު މިގޮތަށް ވާހަކަ ދެކެވޭނެ ކަމަށް" ބީއެމްއެލުން ގަބޫލު ކުރާ ކަމަށެވެ.
ބީއެމްއެލުން ބުނެފައި ވަނީ އެސްއޯއެފް އެކައުންޓަށް ޗެކުތައް ޖަމާކޮށްފައި ވަނީ އެމްއެމްޕީއާރްސީން އެ ޗެކުތައް އެންޑޯސް ކޮށްފައިވާތީ ކަމަށެވެ. އަދި އެންޑޯސް ކޮށްފައިވާ ޗެކު ބަލައިގަތުން ހުއްޓާލަންދެން ފެބްރުއަރީ 2016 އާ ހަމައަށް އަމަލު ކުރަމުން ދިޔައީ އެގޮތަށް ކަމަށް އެ ބަޔާނުގައިވެ އެވެ.
"... ފެށުނީއްސުރެ ބޭންކުން އަމަލު ކުރަމުން އައީ މިގޮތަށް. އެސްއޯއެފް އެކައުންޓަށް ޖަމާކުރެވުނު ޗެކުތައް ވެސް ޖަމާކޮށްފައި ވަނީ މި އުސޫލުގެ ދަށުން ގާނޫނުތަކާއި ބޭންކުން އަމަލުކުރަމުން އައި ޕްރޮސީޖާތަކާ އެއްގޮތްވާ ގޮތުގެ މަތިން ވަކި ތަފާތު ކުރުމެއް ނެތި،" ބީއެމްއެލުން ބުނެފައިވެ އެވެ.
އެމްއެމްޕީއާރްސީގެ ފައިސާ ލިބެންޖެހޭ ޗެކުތައް އެސްއޯއެފްގެ އެކައުންޓަށް ޖަމާކޮށްފައި އެމްއެމްޕީއާރްސީގެ ސޮއި އެކަނި ލިބިގެންނެވެ. ނަމަވެސް އެ ކުންފުނީގެ ބޯޑު ރިޒޮލިއުޝަނެއް ބުނާ ގޮތުން ޗެކެއް އެންޑޯސް ކުރެވޭނީ ދެ ފަރާތުގެ ސޮއި ލިބިގެންނެވެ.
އެކަމާ ގުޅޭ ގޮތުން ބީއެމްއެލުން ބުނެފައި ވަނީ އެންޑޯސްކޮށްފައިވާ ޗެކުތަކާ މެދު ބޭންކުން އަމަލު ކުރަމުންދިޔައީ ބޭންކުގެ އުސޫލުތަކާއި ގާނޫނާ ގަވާއިދުގެ ތެރެއިން ކަމަށެވެ. އެމްއެމްޕީއާރްސީގެ ބޯޑު ރިޒޮލިއުޝަނަށް އަމަލު ކުރުން ލާޒިމް ވަނީ އެ ކުންފުންޏަށް އެކަނި ކަމަށް ވެސް ބޭންކުން ބުނެފައިވެ އެވެ.
ބޮޑެތި އަދަދުތަކުގެ ފައިސާ އެސްއޯއެފްގެ އެކައުންޓަށް ޖަމާކޮށް އެ ދައުރުކޮށްފައިވާއިރު ބޭންކުން ސުވާލުކޮށްފައި ނުވަނީ އެއީ އެއިރު އަމަލު ކުރަމުން ދިޔަ އުސޫލު ކަމުގައިނުވާތީ ކަމަށް ބީއެމްއެލުން ބުނެފައިވެ އެވެ.
"... މިހާރު މި ކުރާ ގޮތަށް ބޭންކުތަކުން ބަލަަައި ސުވާލު ކުރަން ފެށުނީ މި ދެންނެވި މުއާމަލާތްތައް ހިންގުމުގެ ފަހުން އެންޓި މަނީ ލޯންޑަރިންގެ ގާނޫނާއި ގަވާއިދުތަކަށް އަމަލު ކުރަން ފެށުނު ހިސާބުން އޮކްޓޯބަރު، 2014 އިން ފެށިގެން،" ބޭންކުގެ ބަޔާނުގައިވެ އެވެ.
ސުވާލެއް ނުކުރި ނަމަވެސް ބޮޑެތި އަދަދުތަކުން މުއާމަލާތްކޮށްފައިވާތީ ބީއެމްއެލުން ވާނީ އެސްއޯއެފްގެ އެކައުންޓު ގަވާއިދުން މޮނީޓާ ކޮށްފައި ކަމަށް ބޭންކުން ބުނެފައިވެ އެވެ. އެގޮތުން އެސްއޯއެފްގެ އެކައުންޓު "ކޮންމެ ދުވަހަކު އަދި ކޮންމެ ހަފްތާއަކު އަދި ކޮންމެ މަހަކު ކަނޑައެޅިފައިވާ އުސޫލާ އެއްގޮތަށް މޮނީޓާ ކުރެވިފައިވާ" ކަމަށް ބީއެމްއެލުން ބުންޏެވެ.
މަނީ ލޯންޑަރިންގެ ގާނޫނު ވުޖޫދަށް އައުމުން އެމްއެމްޕީއާރްސީ އާއި އެސްއޯއެފްގެ އެކައުންޓުތަކުގެ މުއާމަލާތްތައް ބަރާބަރަށް އެމްއެމްއޭގެ ފައިނޭންޝަލް އިންޓެލިޖެންސް ޔުނިޓަށް ރިޕޯޓްކޮށްފައިވާނެ ކަމަށް ވެސް ބޭންކުން ބުނެ އެވެ. އެ ރިޕޯޓް ކޮންމެ ހަފްތާއަކު އިންޓެލިޖެންސް ޔުނިޓަށް ރިޕޯޓްކޮށްފައިވާ ކަމަށް ބީއެމްއެލުން ބުނެ އެވެ.
އެމްއެމްޕީއާރްސީގެ މައްސަލައާ ގުޅޭ ހުރިހާ މުއާމަލާތެއް ބޭންކުން ދަނީ ތަހުގީގީ އިދާރާތަކާ ހިއްސާ ކުރަމުން ކަމަށް ބޭންކުން ބުންޏެވެ. އޮޑިޓާ ޖެނެރަލްގެ އޮފީހުން ބޭނުންވެގެން ނޮވެމްބަރު 2015 ގައި އެސްއޯއެފް އެކައުންޓުގެ ހުރިހާ މައުލޫމާތުތަކެއް އެ އޮފީހަށް ދީފައިވާ ކަމަށް ވެސް ބޭންކުން ބުންޏެވެ. އަދި އެ މައުލޫމާތުތަކަށް ބިނާކޮށް އޮޑިޓް އޮފީހުން ވަނީ ފެބްރުއަރީ 2016 ގައި ރިޕޯޓެއް ވެސް ނެރެފައިވާ ކަމަށް ބޭންކުގެ ބަޔާނުގައިވެ އެވެ.
"މި ބޭންކުގެ ފ. ނިލަންދޫ ބްރާންޗުގެ މެނޭޖަރަކަށް ހުންނެވި އަލްފާޟިލް ގާސިމް އަބްދުލްކަރީމް މި މައުލޫމާތު އާންމުކޮށްފައި ވަނީ ވެސް މި ދެންނެވި އޮޑިޓް ރިޕޯޓް ނެރުމުގެ ފަހުން،" އެ ބަޔާނުގައިވެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޕިސް
18 February 2019
ދެނެއް ނުރެކެވޭނެ
މާރަނގާ - އައްޑޫ ސިޓީ
18 February 2019
މާލޭގެ ބޮޑުންނަށް ހުކުމްކުރާ ފަނޑިޔާރުންނަށް މާޒީގައިވިގޮތަށް ނުވުމަށާއި އިހަށްދުވަހު ފަނޑިޔާރުގޭގައި ކަންކުރިގޮތް ކަމުނުދާތީ ދައުލަތް ހިންގުމަށް ސޯލިޙް ވެރިޔަކު ރައްޔިތުން އިސްކުރި. “މި ވައްކަމުގައި އޭސީސީ ލުތުފީއަށްވުރެން މާބޮޑުދައުރެއް ބީއެމްއެލްގެ ސީނިއަރމެނޭޖްމަންޓުން ކުޅެފައިވާއިރު ދައުލަތާއި ރައްޔަށްހިއްސާވާ ބޭންކް އޮފިޝަލުންނަށް ފިޔަވަޅުނާޅަނީ އެމީހުންގެ ރަސްމަތިފުށަށް ބަލާފައި ކަމުގައިވާނަމަ” އިންސާފު ޤާއިމްކުރަން އައިސަރުކާރު ކޮބާ؟
ބޭބެ
18 February 2019
ބީއެމްއެލްގެ އިހްމާލު ވަރަށް ބޮޑު. މިއީ ނޭނގިކޮށްފައި އޮތްކަމެއް ނޫން. ގުޅިގެން ކަޓް ނަގާގެން ހިންގާފަ އޮތް ބޮޑު ޖަރީމާއެއް. އެންމެ ފަހަރަކު އެންމު ދުވަހަކު ޖަމާކޮށްފައ ހުރި ފައިސާގެ ވާހަކައެއް ނޫން މިދައްކަނީ. މިހުރިހާ ފައިސާ ޖަމާކޮށް ނިމުނީމަ އަދި އަދީބް ހައްޔރަުކުރި ހިސާބުން ބޭންކުގެ ލާރި ޖަމާކުރަމުން ދިޔަ އުޞޫލު ބަދަލު ކުރީ. އޭގެ ކުރިން ޖަމާކުރުމަށް ފުރުސަތު ދީގެން ބަލަން ތިބީ. ކަޓް ނެގި އެންމެން ތަޙްޤީޤު ކުރަންޖެހޭ
ބީއެމް އެލް ސްޓާފެއް
18 February 2019
ޝީޝާ އެކައުންޓުން ފައިސާ ގެއްލުނު ހިސާބުންބޭންކުންވަނީ ޗެކު އެންޑޯޒް ކުރުން ހުއްޓާލާފަ. އެކމާބެހޭ މެމޯތައް ބޭންކުގަ ހުންނާނެ ބަލާ ، ތިހާފަސޭހައިން ނިންމާނުލާ ބަޔާނަކުން
މާރަނގާ - އައްޑޫ ސިޓީ
18 February 2019
ރައްޔިތުންގެ ހަޒާނާއިން ކުރި މިވައްކަމުގައި ޕަބްލިކް ބޭންކްގެ އިހްމާލުއޮތްކަން އިގޭހިސާބުން ތަހްޒީބީ ޤައުމުތަކުގައިނަމަ ބޭންކްގެ ސީނިއަރ މީހުން އަމިއްލައަށް މަޤާމްދޫކޮށް ގޭގައި މަޑުކުރާނެ. އެއީ އަޙްލާޤީގޮތުން އެކަންއޮންނާންޖެހޭ ހަމައާއި އުސޫލު. * * އިންޑިޔާ ފަދަ ޤައުމުތަކުގައި މިފަދަ ކަމެއް ބޭންކް ތެރެއިން ހިންގައިފިނަމަ ބޭންކްގެ އިސްވެރިންނަށް ޖެހިގެންއަންނަ ދުވަހު އޮފީހަށް ނިކުތުމަށް ރައްޔިތުންނާއި ހިއްސާދާރުން ޖާގައެއްނުދޭނެ.
މާރަނގާ - އައްޑޫ ސިޓީ
18 February 2019
ހިޔާނާތުގެ ބޮޑުވައްކަމުން ބަރީޢަވެގެންވާކަމަށް އެކަމުގައި އިހުމާލުވި ފަރާތްތަކާއި ފައިސާ ޖަމާކޮށްފައިވާ އެކައުންޓްތަކުގެ ވެރިފަރާތްތަކުން ބަޔާންނެރުމަކީ ހަމަޖެހޭކަމެއްނޫން. * * ސަރުކާރުން މިނިސްޓަރ މަހުލޫފު އާއި އަކްރަމް ސަންޕެންޑް ކުރިފަދައިން ބޭންކް އޮފް މޯލްޑިވްސްގެ ޒިންމާދާރުވެރިން މަސްއޫލީއްޔަތުން އެކަހެރިނުކުރާނަމަ “ކުންފުނީގެ ހިއްސާދާރުންގެ ޙައްޤުގެއްލި އިއާދަނުކުރެވޭނެ ގެއްލުން ލިބިދާނެތީ” ކޯޓް މެދުވެރިކޮށް ގޮތެއްނިންމުމަށް ތެދުވާންޖެހޭ.
ލީމަން ޒާހިރު
17 February 2019
ޒިންމާ އޮންނަނީ އާދައިގެ ރައިޔަތު މީހާ 45 ހާސް ރުފިޔާ ޖަމާކުރީމަ އެކަނިތޯ... ގުޅާފަ ފުލު ފުލުން އަހާ ކޮންތާކުން ހޯދި ފައިސާއެއްތޯ.. ކާކު އިންވޮއިސް އޮތްތޯ..؟ ކީއްވެ މިލިޔަނުން ޓްރާންސްފާ ހެދުމުން ނުބެލުނީ... ހުސް ކޮސް އަނގަނުތަޅަ ދެންތިބީ ކޮހުން ކަމަށް ހީކޮށް ތީ ރޭވިގެން ކުރި ކަމެއް ވީމަ، އެތެރެއިން އެކަމާ ނުރުހި އެވާހަކަ ދެއްކި މީހާ ޖަލައްލާއި ތަޅުވާލީ..!
ޢަވި
17 February 2019
މިހާބޮޑު އަދަދުން ފައިސާ އަމިއްލަ ކުންފުންޏަކަށް ޖަމާކުރާއިރު އަމުދުން އެއީ ޗެކު އެންޑޯސްކޮށްގެން ކަމުގައިވާނަމަ ބޭންކުގެހަމަ އެއްވެސް ޒިންމާއެއް ނެތީތޯ އެއީ ކިހިނެތްވާ ކަމެއްކަން ބަލަން.
ބެންކު
18 February 2019
ނުޖެޙޭ ބަލާކަށް
އިސްލާމިކް ބޭންކް
19 February 2019
ބޭންކްގެ ޒިންމާ އެއް ނޯވޭ. މަތިން ބައިން ޖެހިގެން ބެލި އެއެޗެއް ބެލީ.
ސުވާލު
17 February 2019
2012 ވަނަ އަހަރު ޔުނިސެފްގެ ޕްރޮޖެކްޓަކުން އަޅުގަނޑަށް ލިބުނު 2000 ޑޮލަރު. ބޭންކަށް ލާރި އައުމުން އަޅުގަނޑަށް ގުޅާފަ ކިހިނެއް ލިބުނުލާރިއެއްތޯ އެހި. ޢަދި ބުނީ ކިހިނެއް ލިބުނު ލާރިއެއްކަން ބަޔާންކޮށް ހެއްކާ އެކު ސިޓީއެއް ލުމުން ނޫނީ ލާރި ރިލީޒް ނުކުރާނަމޭ. ދެން ސުވާލު ކުރަން ފެށުނީ 2014 ގަ އޭ ބުނީމާ އަންނަނީ ހަމަ ހިނި.
Solah
17 February 2019
މި ދިވެހިންނަކީ މާބޮޑަށް ކަންތައްތައް އެނގޭ ބައެއް. ތިމާމެންނަށް ޤާނޫނެއް ގަވާއިދެއް ތަނެއްދޮރެއް ނޭނގުނަސް އަނގަ ފުޅާކޮށްފައި ކޮންމެވެސް އެއްޗެކޭ ކިޔޭތޯ ބަލާނެ.