އަބްދުﷲ ހާރޫން އޭނާގެ ގޮޅީގައި އިނދެ އިންޓަވިއު ދެނީ: ފޫހިވުމެއް ނެތް --ފޮޓޯ:ނިޝާން އަލީ/މިހާރު
30 މެއި 2019 - 09:41
10 comments
އާންމު ގޮތެއްގައި އުމުރުން 65 އަހަރު ވުމުން ގިނަ ބަޔަކު އިހުތިޔާރު ކުރަނީ ގޭގައި ތިބުމަށެވެ. އެކަމަކު ހދ. ކުޅުދުއްފުއްޓަށް އުފަން އަބްދުﷲ ހާރޫންގެ ވިސްނުން މުޅިން ތަފާތެވެ. އުމުރުން 78 އަހަރުގައި އޭނާ އަދިވެސް ފެންނަނީ ވަރުބަލިވުމެއް ނެތި މަސައްކަތުގައި އުޅޭ ތަނެވެ. މިހާރު މާރުކޭޓްގެ ގޮޅިއެއްގަ އެވެ.
ކޮންމެ ދުވަހަކު ހެނދުނު 06:30 ގައި ދޯނި ފަހަރުން ފަޅޮލާއި ކަރާ އަދި ބަރަބޯ ގަނެގެން ގޮޅީގައި އަތުރާލާ ނިމޭއިރު ހުންނާނީ 08:00 ޖަހާފަ އެވެ. އެކަނިމާއެކަނި ގޮޅީގެ ހުރިހާ ކަމެއް ބަލަހައްޓަމުން ސަޕްލަޔަރުން ހޯދަމުން، ތަކެތި ވިއްކުމުގެ މަސައްކަތް މެދުގަނޑާލަނީ މެންދުރެއް ހާއިރު އެވެ. އެއަށް ފަހު 2:30 ގައި އަނެއްކާވެސް ގޮޅިއަށް ގޮސް މަސައްކަތް ފަށަ އެވެ.
ނަމާދު ވަގުތައް ފިޔަވާ އެހެން ވަގުތުތަކުގައި އަބްދުﷲ އިންނަނީ ގޮޅީގަ އެވެ.
މާރުކޭޓުގެ ގޮޅިއެއް ނަގައިގެން އޭނާ މަސައްކަތް ފެށީ ރާއްޖޭގެ އެންމެ ބޮޑު އެއް ކުންފުނި ޔުނިވާސަލްގައި 30 އަހަރު ދުވަހު ވަޒީފާއަދާކޮށް ރިޓަޔާކުރުމަށް ފަހު އެވެ. އެކަމަކު ގޭގައި ވަގުތު ހޭދަކުރުމުގެ ބަދަލުގައި އޭނާ އަނެއްކާވެސް ނުކުތީ މަސައްކަތަށެވެ. ރައްޓެއްސެއްގެ އެހީތެރިކަމާ އެކު މާރުކޭޓުން ގޮޅިއެއް ހޯދި އެވެ.
"އަޅުގަނޑު ކަކުލު ހުޅު ވެސް ވަރަށް ދެރަ. މިއީ ބުރަ މަސައްކަތަކަށް ނުވާތީ މި މަސައްކަތް ފެށީ،" އަބްދުﷲ ކިޔައިދިނެވެ.
ގޮޅީގައި އޭނާ ވިޔަފާރި ފެށީ އެންމެ 200 ރުފިޔާގެ ފަޅޯ ހޯދައިގެންނެވެ. އެކަމަކު މިހާރު 10،000 ރުފިޔާގެ މުދާ އެބަ ހުއްޓެވެ. ހުރިހާ ހަރަދުތައް ކެނޑުމަށް ފަހު މަހަކު 20،000 ރުފިޔާ ވަރު ލިބެ އެވެ.
އެހެންކަމުން އަބްދުﷲ ބުނީ "މިއީ ކުރަން ހަމަ ރަނގަޅު މަސައްކަތެއް" ކަމަށެވެ.
"އަޅުގަނޑަކީ ސަޕްލައި ކުރާ މީހެއް ނޫން. ސަޕްލައި ކުރާ މީހުންނަށް މިއަށް ވުރެ ބޮޑު އާމްދަނީއެއް ހޯދޭނެ،" އޭނާ ބުންޏެވެ.
އަބްދުﷲ ހާރޫން މީހަކަށް ގޮޅިން ކަރާ ވިއްކަނީ --ފޮޓޯ:ނިޝާން އަލީ/މިހާރު
މިހާރު އަބްދުﷲ އަށް އޮތް މިނިވަންކަން ބޮޑެވެ. އޭނާގެ ހިތްހަމަޖެހުމަކީ، ބޭނުން އިރަކު ގެޔަށް ގޮސް، ބޭނުން ވަގުތަކު ގޮޅީގައި މަސައްކަތްކުރުމުގެ އިހުތިޔާރު އޮތުމެވެ. ކުރިން ނަމަ އެއީ އޭނާގެ ބާރުގެ ދަށުގައި އޮންނަ ކަމެއް ނޫނެވެ.
އަބްދުﷲ އަށް މި ރޯދަމަހު ފާހަގަވާ އެއް ކަމަކީ އެހެން މަސްމަހަށް ވުރެ އާމްދަނީ ދަށްވުމެވެ. ކުރިން ނަމަ ރޯދަމަހު ވަރަށް ބޮޑު ފައިދާއެއް، ގޮޅިތަކުގެ މީހުންނަށް ލިބެ އެވެ. އެކަމަކު މި ރޯދަމަހު ވިޔަފާރި އެހާ ރަނގަޅު ނޫން ކަމަށް، ގިނަ ގޮޅިތަކުގެ މީހުން ބުނެ އެވެ.
"އާންމުކޮށް އެހެން މަސް މަހު 5،000 ލިބޭނެ ދުވާލަކު. މިފަހަރު 3،000 ވަރު މި ޖެހެނީ،" އަބްދުﷲ ބުންޏެވެ.
އަބްދުﷲ އޭނާ ގޮޅީގައި: މާރުކޭޓްގައި މަސައްކަތްކުރާތާ މިހާރު ނުވަ އަހަރު ވެއްޖެ --ފޮޓޯ:ނިޝާން އަލީ/މިހާރު
އަބްދުﷲ ގަބޫލުކުރާ ގޮތުގައި ޒުވާން އުމުރުގައި ބުރަ މަސައްކަތް ކުރުމަކީ ހަށިގަނޑުގައި ވަރު ޖެހޭ ކަމެކެވެ. ޔުނިވާސަލްގައި އޭނާ ބުރަކޮށް އުޅުމުން ހަށިގަނޑަށް އޭގެ ރަނގަޅު އަސަރުކޮށްފައިވާ ކަމަށް އޭނާ ދެކެ އެވެ. އެހެންކަމުން ގިނަ ޒުވާނުންނަށް ވުރެ މިހާރު ވެސް އޭނާ ފެންނަނީ މާ ހަރަކާތްތެރިކޮށެވެ.
"މިހާރު ވެސް އޮފީސްތަކުގައި އުޅޭ ކުދިން މާ އަވަހަށް މުސްކުޅިވާނެ. ބޭބެ ބަލައިލާފައި މީހަކު ނުބުނާނެ 78 އަހަރު ވެއްޖެއޭ،" ސަމާސާ ރާގަކަށް އަބްދުﷲ ބުންޏެވެ.
"އެމީހަކަށް ހިރިނުލެވެންދެން މަސައްކަތް ކުރަން ޖެހޭނެ. އަނެއް މީހާގެ ތައްޕާހަށް ނުވަދެ އުޅެން ޖެހޭނެ."
އޭނާގެ ހަތަރު ކުދިން ތިބެ އެވެ. މިހާރު މުނިކާފަ ވެސް ކިޔައިފި އެވެ. އެގޮތަށް މި އުމުރުގައި މާރުކޭޓް ގޮޅިއެއްގައި މަސައްކަތްކުރަން ދަރިން ހިތްހަމަނުޖެހޭ ކަމަށްވެ އެވެ. ނަމަވެސް އަބްދުﷲ ބުނާ ގޮތުގައި އޭނާގެ ހިތްހަމަޖެހުމަކީ މަސައްކަތެއްގައި އުޅުމެވެ.
އުމުރުން ދުވަސްވުމަކީ އެއްވެސް ހާލެއްގައި މަސައްކަތް ނުކޮށް ހުރުމެއް ނޫނެވެ. އެހެން މީހުންނަށް ބަރޯސާވުމެއް ނޫނެވެ. މިއީ އަބްދުﷲ ކުރިން ވެސް އަދި މިހާރު ވެސް ގަބޫލުކުރާ ގޮތެވެ.
އެކަމަކު އޭނާގެ ހިތުގައި އޮތް އެންމެ ބޮޑު ނިޔަތަކީ ދެން ވީހާވެސް އަވަހަކަށް ރަށަށް ދިރިއުޅުން ބަދަލުކުރުމެވެ. އެކަމަކު އޭރުން ވެސް އެއްކަމެއް އޭނާ ދުލެއް ނުކުރާނެ އެވެ: މަސައްކަތްކުރުމެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ާަސޖގޖ
31 May 2019
އެއުމުރުގަ މަސައްކަތް ކުރުމަކީ ވަރަށް ބޭނުންތެރިކަކެވެ. އެބޭބެގެ ވާހަކަ އެއީ ރަނގަޅު ވާހަކައެއް. ދުނިޔޭގެ އެންމެ ހެލެފެލިކޮށް އުމުރުން ދުވަސްވި މީހުން އުޅެނީ ޖަޕާނާއި ޗައިނާ ކޮރެއާ ފަދަ ޤައުމުތަކުގަ، އެއީ މުސްކުޅި އުމުރުގަވެސް މަސައްކަތުގަ އުޅުން.
ޢަފުސަލް
30 May 2019
ﷲ ބަރަކާތް ލައްވާށި. އާމީން.
ސުނީތާ
30 May 2019
ކުޅުދުއްފުށީ ގިނަ މީހުންނަކީ ހާޒިރު ޖަވާބަށް ވަރަށް މޮޅު ބައެއް. މާރުކޭޓަށް ދާ ކޮންމެ ދުވަހަކު މި ބޭބެ އާ ދިމާވޭ. ވަރަށް ހިތް ހެޔޮވާނެ. ސަމާސާ ކުރާނެ. މަޖާ މީހެއް. ކުޅުދުއްފުއްޓަށް ދެވުނު 2006 އަދި 2008 ގައިވެސް. ހާޒިރު ޖަވާބު ދިނުމުގައި ނަމޫނާ ބައެއް. އަހަރެންނަށް ދެވުނު ރަށްތަކުން ހާޒިރު ޖަވާބަށް އެންމެ މޮޅު މީހުންނާ ދެން ދިމާވީ މ.މުލި އަދި ނ.މަނަދޫއިން
ވޯންޓް
30 May 2019
ހަމަ ތި މާރުކޭޓުގަ އަޅުގަނޑުގެ ކާފަ އުޅޭ، އުމުރުން 88 އަހަރު.
ސުބު
30 May 2019
ޕޮއިންޓަކީ؟
ތުނބުޅި
30 May 2019
ތުނބުޅިބެ އަކީ ވަރައް ހިތްހެޔޮ، މަޖާ މިޒާޖެއްގެ ވެރިއެކެވެ. ކިތަންމެ ދުވަހަކު ތިބޭބެގެންގުޅޭ ދުފާފޮށިން ފޯއްކޮޅެއް ތަޅާލާފާ ހުންނާނެއެވެ. އަނެއްކާ ތުނބުޅިބެއާ ދިމާވެއްޖެއްޔާ ފޯއްކޮޅެއްތަޅާފާއި ނޫނީ ދާހިތެއްނުވާނެއެވެ.
ހާލު ފޮޅި
30 May 2019
މި ބޭބެ ގޮޅިއަށް ފަޅޯއް، ދޮންކެޔޮ ގަންނަން އަހަރެން ދަމެވެ.ވަރަށް ހިތްހެޔޮ ވާނެއެވެ. ސަމާސާ ކުރުމަކީ ކުޅުދުއްފުށީ މުސްކުޅިންގެ މިޒާޖީ ކަމެކެވެ.މި ނަމޫނާ ބޭބެއަށް ފުރިމަ ސިއްހަތަކާ ދިގު އުމުރެއް ދެއްވާށި އެވެ.
ފުރެންޑު
30 May 2019
ދިވެހިން ތިބޭ ގޮޅި ތަކަށް އިސްކަން ކޮންމެ މީހަކުވެސް ދޭނަމަ، ބޭރުމީހުން ގޮޅިތަކުގައި ތިބުން މަދުކުރުމަށް ބާރު ދެވޭން. އަހަރެން އަބަދުވެސް ބަލަން ދިވެހިން ތިބޭ ގޮޅިން ވިޔަފާރި ކުރަން. ދެން އަބްދުއްލާގެ ގޮޅިހޯދައިގެން ވިޔަފާރި ކުރާނަން
ހަކީމް
30 May 2019
އަހަރެން އަބަދުވެސް ދިވެހިން ތިބޭ ގޮޅިތަކަށް އިސްކަންދެން ... މިކަމެއް ބަދަލެއް ނުވާނެ ... ހާރޫނު ދެކެން .. ހަމަ ފައްކާ ކުޅުދުފުށީ މީހެން .. ވަރަށް ލާނެއް އެއްޗެހި ބުނެލާނެ.
ރަދީފް
30 May 2019
ސާބަހޭ އަބްދުﷲ ހާރޫން.