އެމްޓީސީސީގެ އަހަރީ އާންމު ޖަލްސާ ރޭ ހޮޓެލް ޖެންގައި ކުރިއަށް ދަނީ: އާ ކުންފުންޏެއް ހަދަން ސަރުކާރާ އެކު މަޝްވަރާތައް ވަނީ ފަށައިފައި -- ފޮޓޯ: ހުސެއިން ވަހީދު/ މިހާރު
09 ޖުލައި 2019 - 10:40
17 comments
އާއްމު ދަތުރުފަތުރުގެ ހިދުމަތުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އަށް ވަމުންދާ ގެއްލުމުން ސަލާމަތްވުމަށް އާ ކުންފުންޏެއް ހަދަން މަޝްވަރާކުރަމުން އަންނަ ކަމަށް އެ ކުންފުނިން ބުނެފި އެވެ.
ހޮޓެލް ޖެންގައި ރޭ ބޭއްވި އަހަރީ އާއްމު ޖަލްސާގައި އެމްޓީސީސީގެ މެނޭޖިން ޑައިރެކްޓަރު ހަސަން ޝާހު ވިދާޅުވީ މުޅި ރާއްޖޭގައި ވެސް އާއްމު ދަތުރުފަތުރުގެ ހިދުމަތުން އެ ކުންފުންޏަށް ގެއްލުން ވަމުން ދާތީ އެކަން ހައްލު ކުރަން މިހާރު ވެސް ގިނަ ފިޔަވަޅުތަކެއް އަޅާފައިވާ ކަމަށެވެ. އެގޮތުން ގެއްލުންތައް ސަބްސިޑައިޒް ކުރަން މިނިސްޓްރީ އޮފް ޓްރާންސްޕޯޓާ އެކު މަޝްވަރާތައް ކޮށް، ކުރިއެރުންތަކެއް ލިބިފައިވާ ކަމަށް އޭނާ ވިދާޅުވި އެވެ.
"އަޅުގަނޑުމެންނަށް ސަރުކާރުގެ ފަރާތުން އިޝާރާތް ލިބެމުން އަންނަނީ އަޅުގަނޑުމެންނަށް މިވަމުންދާ ގެއްލުމުގައި ސަބްސިޑީ ލިބޭގޮތް ހައްދަވައިދެއްވާނަމޭ. އެހެންނޫނިއްޔާ އެމްޓީސީސީގެ ބުކްސް އިން މި ދަތުރުފަތުރުގެ ނިޒާމުންވާ ގެއްލުން އުނިވާނެ ގޮތަކަށް އެހެން ސަބްސިޑަރީ ކުންފުންޏެއް ހަދައިފަ ނަމަވެސް އެމްޓީސީސީގެ ދަތުރުފަތުރުގެ ނިޒާމުން، މި އާއްމު ދަތުރުފަތުރުގެ ނިޒާމުންވާ ގެއްލުން ކުޑަކޮށް ދެއްވާނަމޭ،" ޝާހް ވިދާޅުވި އެވެ.
އެމްޓީސީސީގެ އަހަރީ އާންމު ޖަލްސާގައި އެ ކުންފުނީގެ ބޯޑު މެމްބަރުން: ދަތުރުފަތުރުން ވަނީ ގެއްލުން -- ފޮޓޯ: ހުސެއިން ވަހީދު/ މިހާރު
އެމްޓީސީސީ އަށް ވަމުންދާ ގެއްލުމާއި އެ ގެއްލުމުން ސަލާމަތްވުމަށް ކުރަމުން އަންނަ މަސައްކަތްތަކާ ބެހޭ ގޮތުން ޝާހު ދެއްވި ޕްރެޒެންޓޭޝަނުގައި އޭނާ ވިދާޅުވީ ސަރުކާރުން އެ ކުންފުންޏަށް ދިނުމަށް ފަހު އަތުލާފައިވާ ވ. ފޮއްތެޔޮމުލި ހޯދަން ވެސް މަޝްވަރާކުރަމުން އަންނަ ކަމަށެވެ.
ރާއްޖެ ހަތް ސަރަހައްދަކަށް ބަހާލައި ޒޯން ތިނެއްގެ ދަތުރުފަތުރު އެމްޓީސީސީ އަށް ދިންއިރު ވ. ފޮއްތެޔޮމުލި އެ ކުންފުންޏަށް ދިނުމަށް ސަރުކާރުން އޮތީ އެއްބަސްވެފަ އެވެ. ނަމަވެސް އެމްޓީސީސީ އަށް އެ ރަށުގައި ރިސޯޓެއް ނުހެދި އޮއްވައި ފަހުން އެ ރަށް ވަނީ ސަރުކާރަށް އަލުން ނަގައިފަ އެވެ. ޒޯން ތިނެއްގައި ހިމެނެނީ ކ، އއ، އދ. އަދި ވ. އަތޮޅު ހިމެނޭ ސަރަހައްދެވެ.
"މި އަތޮޅުތަކަށް އެމްޓީސީސީން ދަތުރުފަތުރުގެ ހިދުމަތް ދިނުމަށްޓަކައި ސަރުކާރުން ވަނީ އޭރު ރަށެއް ކަނޑައަޅުއްވައިދެއްވާފައި. ވ. އަތޮޅު ފޮއްތެޔޮމުލި ކިޔާ ރަށެއް. އެހެން ނަމަވެސް އޭރުގެ ސަރުކާރުން ވަނީ އެރަށް ނަންގަވާފައި. އެހެންވެ އެކަމާ ބެހޭގޮތުން އަޅުގަނޑުމެން މިހާރު ވަނީ ޓޫރިޒަމް މިނިސްޓްރީއާ އަދި ރައީސް އޮފީހާ ވެސް މަޝްވަރާކޮށްފައި،" ޝާހު ވިދާޅުވި އެވެ.
އޭނާ ވިދާޅުވީ އެކަމުގެ މަޝްވަރާތައް އަދިވެސް ކުރިއަށްދާ ކަމަށެވެ. އެހެން ނަމަވެސް މަޝްވަރާގައި ލިބިފައި ވަނީ ކޮން ކުރިއެރުމެއް ކަމެއް އޭނާ ވިދާޅެއް ނުވެ އެވެ.
ދަތުރުފަތުރުގެ ހިދުމަތުން އެމްޓީސީސީ އަށް ގެއްލުންވަމުން ދަނީ ޝާހު ވިދާޅުވި ގޮތުގައި 2014 އިން ފެށިގެންނެވެ. އެހެން ނަމަވެސް 2016 އާ ހަަމައަށް ސަރުކާރުން އެ ކުންފުންޏަށް ސަބްސިޑީ ދެމުން އައިސްފައި ވާތީ އޭރުގައި އެ ގެއްލުން ކުޑަކުރެވިފައި އޮތް ކަމަށް އޭނާ ވިދާޅުވި އެވެ.
ދަތުރުފަތުރުގެ ސަބްސިޑީ ކަނޑާލުމުން 2016 ވަނަ އަހަރު އެމްޓީސީސީ އަށް 31 މިލިޔަން ރުފިޔާގެ ގެއްލުން ވި އެވެ. އަދި އޭގެ ފަހުން 2017 ގައި 56 މިލިޔަން ރުފިޔާ، އަދި މިދިޔަ އަހަރު 81 މިލިޔަން ރުފިޔާގެ ގެއްލުން ވި އެވެ.
އެމްޓީސީސީގެ އަހަރީ އާއްމު ޖަލްސާގައި ރޭ ނިންމީ، އެ ކުންފުންޏަށް ވެފައިވާ ފައިދާ ކުޑަވުމުން ހިއްސާ ނުބެހުމަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަހްމަދުކަލޯ
11 July 2019
ގެއްލުން ވާނެތާ މިހާރުވެސް ހޮޓެލް ޖެންގަ ނޫނީ ހިލްޓަންގަ ނޫނީ ބައްދަލުވުމެއް ނުބޭއްވޭ... ބޭފުޅަކު ބީއެމްޑަބްލިއު ކާރުކޮޅު ގެންގުޅުއްވިއަސް ކުންފުނީގަ އެހާ ފެންވަރެއް ނެތޭ
އަހްމަދު
09 July 2019
ތިޔަ ޝާހަކީ ކުރިންވެސް އެމްޓީސީސީ ކަޅާކޮށްލިމީހާ. މިފަހަރުވެސް ހަމަ އެމީހާ. އެމްޑީޕީ ސަރުކާރެއްގާ މީނާ ނޫންމީހަކު މިތަނަށް ނުލެވެނީ ވައުދުހާދަވަރުގަދަވީމައޭ.
އަލްޖިބްރާ
09 July 2019
އެއްތަނެއް ސަލާމަތް ކުރަން އަނެއްތަނެއް އުފެއްދުމަކީ މައްސަލަ ހައްލުވާނެ ކަމެއް ނޫން ! ގެއްލުން ވަމުންދާ މަސައްކަތްތައް ހުއްޓާލުމަކީ ގެއްލުން ކުޑަ ކުރުމަށް ކުރެވޭނެ ފުރަތަމަ ކަންތަޢް ! ގެއްލުން ފޫބައްދަން އެހެންތަނެއް ހަދާފަ އެތަނަށް މުވައްޒިފުން ލީމަ އެވަނީ ފައިދާތަ ؟
ބޮޑުމީހާ
09 July 2019
ސަރުކާރުން ހުރިހާ ވިޔަފާރިއެއްކުރީމަ ވާނީ ތިހެން. ކުންފުނިތަކުގެ ހިންގުމުގެ ޚަރަދުއެހާ ބޮޑު. ބޮޑު މުސާރަދީފަ ބޭކާރު އެތައް މުވައްޒަފުންނެއް. ރާއްޖޭގެ ޕްރައިވެޓް ސެކްޓަރ ވަރުގަދަ ނުވަނީ ސަރުކާރުން ހުރިހާ ވިޔަފާރިއެއްކުރާތީ. ފެން، ނަރުދަމާ އެޅުން، ބަދަރު ހެދުން، މަގު ހެދުން، އިމާރާތްކުރުން، ހުރިހާ ކަމެއް ޕްރައިވެޓް ކުރަންވީ.
ރުފިޔާއަށްކުއްޔަށްދީ
09 July 2019
ދަތުރުފަތުރުން ގެއްލުން ވާތީ އެކަމަށް އެމްޓީސީސީން އެހެން ކުންފުންޏެއް ހަދަނީ ނަމަ އެއީ މަމެން އުފާ ކުރާ ކަމެކޭ ދަ ރާއްޖެތެރޭގައި ދަތުރު ފަތުރު ކޮށްގެން އެމްޓީސީސީ އަށް ފައިދާ ވާނެ އެއްވެސް ގޮތެއް ނޯންނާނެއޭ އެތަން ސަބްސިޑައިޒް ކުރުމަށް ޓަކައި ކުރަންވީ ކަމަކީ މާލެ ސަރަހައްދުން ގުޅިފަޅު އެއްކޮށް އެމްޓީސީސީ އަށް ދޭންވީ އަދި އެމްޓީސީސީ އަށް ގުޅިފަޅުދޭތާ އަހަރު ދުވަސް ތެރޭގައި ގުޅިފަޅުން 20 ބިިލިއަން އަކަފޫޓް ހިއްކާ 10 ބިލިއަން އަކަފޫޓް މަހަކު 1
ކަނބާ
09 July 2019
މ.ފ.ދ ގެ ފެރީގެ ޚިދުމަތް ދިނުމަށް ވާމިލިއަން ކުންފުންޏަށް ދ.އަތޮޅުން ދިފައިއޮތް ދެރަށް އެމްޓީސީސީއަށް ދީ މިއަތޮޅުގެ ފެރީގެ ޚިދުމަތް ދިނުމަށް ޙަވާލުކޮށްދެއްވުން އެދެމެވެ.
ވާލުސޮރު
09 July 2019
އެމްޓީސީސީން މަހާ ޖައްރާފާ ވިއްކާލަންވީ، އޭތި ބާއްވައިގެން ހޭދަވާ 1 މަސް ދުވަހަކީ އާދައިގެ ރަށެއްގެ ޖެޓީއެއް ބަނދަރެއް ހަދާނެ ފައިސާ، މަހާ ޖައްރާފާއަކީ ވަރަށ ބޭކާރު ދެއްކުންތެރި ހަރަދެއް
އަހްމަދުކަލޯ
11 July 2019
ރައިސް ޔާމީން ވިދާޅުވި މީހެއްގެ އަތުގަ ވިޔަފާރި ކުރެވޭ އަގުބޮޑު މުދަލެއް އޮތަސް އެ ބޭނުން ކުރަން ނޭގެންޔާ އޭގެން ނަފާ ހޯދާކަށް ނޭނގޭނެއޭ...
ހަސަންދީ
09 July 2019
އެހެންތާވާނީ ރައްޔިތުންގެ ހުރިހާ ހަރަދެއް ދައުލަތުންކުރަން ފެށީމަ... ހިލޭ ކާންދެނީ ، ހިލޭސާބަހަށް ސަރުކާރުން ހަރަދުދޭ ގޮތަށް މަތީ ތައުލީމުދެނީ ، ބޮޑު ހަރަދުކޮށްގެން ހެދިފައި އޮތް ބުރިޖުމަތިން އެއްވެސް ފީ އެއް ނުނަގާ ހިލޭދަތުރުއެކުރަނީ .. އެތަން ބަލަހައްޓަން ، މަރާތުކުރަން އެތައް މިލިޔަންދާއިރު އެކަމަށްވެސް ދައުލަތުން ހަރަދުކުަރނީ... ދުނިޔޭގެ އެންމެ ފުދިގެން އުޅޭ ގައުމުތަކުންވެސް ލިމިޓެއްނެތި ހުރިހާކަމެއް ހިލޭ އަކު ނޮއޮވޭ..
އަބުއާ
09 July 2019
ސަރުކާރު ކުންފުނިތަކުގެ ޙަރަދު ދެކޮޅުޖެއްސޭނެކަމަށް ރަށްރަށްދިދުމަކީ ހައްލެއްނޫން. ޓޫރިސްޓު ރަށްރަށް ތަރައްޤީކޮށް ހިންގުމަކީ، މައިގަނޑުއަމާޒުގާ މިކަންކަން ހިމެނޭ ކުންފުނިތަކުން ކުރަން ޖެހޭކަމެއް. އެމްޓީސީސީގެ މައިގަނޑު އަމާޒު ތަކުގާ މިކަމެއް ނުހިމެނޭ. މިގޮތުން ކުންފުނިތަކަށް ދޭ ރަށްތައް ހުންނަނީ ނޭދެވޭ އެތައް ކަމެއްގެ ތެރެއިން ވިއްކާލާފަ. ވިލާގެ ހޮލިޑޭ އައިލެންޑަކީވެސް މިގޮތަށް ވިލާއަށް ވިއްކާލާފާއޮތްރަށެއް.
އޮރިޖިނަލް މޮހަނު
09 July 2019
ހައިރާނެއްނުވޭ.. މިވެރިން ވެރިކަމަށް އަންނަ ކޮންމެ ފަހަރަކު ދައުލަތުގެ ކުންފުނިތަކާ މުއައްސަސާތައް ބައިބައިކުރަނީ ކީއްވެބާ؟ ކަން ނުވަންޏާ ރީތިގޮތުގަ އެއްބަސްވެ ލަފާ ހޯދުމަކީވެސް އޮތްކަމެއް. ހުރިހާ ހަޑިއެއްހާވަން ބޭރުގެ ފާރމްތަކުން މިލިއަނުން ކޮންސަލްޓޭޝަން ހޯދޭ. ދެން މިކަމަށް ލަފާ ހޯދައިގެންވެސް ކުންފުނި ހިންގަން ދަސްނުކުރަންވީ ސަބަބަކީ ކޮބާ؟!