ރައްޔިތުންގެ މަޖިލިހުގެ ޖަލްސާއެއް ކުރިއަށް ދަނީ. އެންއައިސީގެ މެމްބަރެއްގެ މަގާމު ހުސްވީ އެތަނުގައި ހުންނެވި ފަރުހާދު އިސްތިއުފާ ދެއްވުމާ ގުޅިގެން.--- ފޮޓޯ: މަޖިލިސް
22 ޖުލައި 2019 - 14:35
11 comments
ނޭޝަނަލް އިންޓެގްރިޓީ ކޮމިޝަން (އެންއައިސީ)ގެ މެމްބަރު ކަމަށް ކުރިމަތިލި މީހުންގެ ތެރެއިން ނަމެއް ފާސް ކުރުމުގެ ބަދަލުގައި އެ ކޮމިޝަނަށް އަލުން ކުރިމަތިލާން ހުޅުވާލަން ރައީސް އިބްރާހިމް މުހައްމަދު ސޯލިހަށް ލަފާ އަރުވަން ރައްޔިތުން މަޖިލިހުން މިއަދު ފާސްކޮށްފި އެވެ.
އެންއައިސީގެ މެމްބަރު ކަމަށް ހުށަހެޅުމުގެ ފުރުސަތު ރައީސް އޮފީހުން ހުޅުވައިލީ އެ ކޮމިޝަންގެ ރައީސްކަން ކުރެއްވި މެމްބަރު މުހައްމަދު ފަރުހާދު އިސްތިއުފާ ދެއްވުމުންނެވެ. އެގޮތުން އެންއައިސީގެ މެމްބަރު ކަމަށް ކުރިމަތިލުމުގެ ފުރުސަތު ހުޅުވާލުމާ ގުޅިގެން 26 މީހަކު މެމްބަރު ކަމަށް ކުރިމަތިލި އެވެ.
އެންއައިސީގެ މެންބަރު ކަމަށް ކުރިމަތިލި މީހުންގެ ނަންތައް ދިރާސާ ކުރަން މަޖިލިހުގެ މިނިވަން މުއައްސަސާތަކުގެ ކޮމިޓީ އަށް ފޮނުވުމުން އެ ކޮމިޓީން އެންމެ މަތިން މާކްސް ދިނީ ޕޮލިސް އިންޓަގްރިޓީ ކޮމިޝަން (ޕީއައިސީ)ގެ މެމްބަރު ކަން ކުރެއްވި ރުކްޝާނާ އިބްރާހިމަށެވެ. އަދި ދެން ކުރިމަތިލި މީހުންނަށް ލިބުނު މާކްސްތަކާ އެކު، ކޮމިޓީ ރިޕޯޓު މަޖިލިހުގެ ތަޅުމަށް ފޮނުވި އެވެ.
އެކަމަކު، މަޖިލިހުގެ ތަޅުމުން އަލުން ވަނީ ރިޕޯޓު ކޮމިޓީ އަށް ފޮނުވައިފަ އެވެ. ކޮމިޓީ އަށް އެ ރިޕޯޓު އަލުން ފޮނުވުމުން ކޮމިޓީގެ މެންބަރުން ނިންމެވީ މަޖިލީހުގެ ތަޅުމަށް ފެންނަ ގޮތަކަށް އެކަން ނިންމުމަށެވެ.
އެކަމާ ގުޅިގެން އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި މެދުހެންވޭރު ދާއިރާގެ މެމްބަރު އަލީ އާޒިމް ޖަލްސާގައި ވިދާޅުވީ އެންއައިސީ އަށް މެމްބަރަކު އައްޔަން ކުރެއްވުމަށް ރައީސް ނަންތައް ފޮނުވާފައި ވަނީ 18 ވަނަ ރައްޔިތުންގެ މަޖިލިހަށް ކަމަށެވެ. އަދި 19 ވަނަ މަޖިލިހުގެ މިނިވަން މުއައްސަސާތަކުގެ ކޮމިޓީން ދިރާސާ ކުރަން ޖެހޭނީ އާ ނަންތަކެއް ކަމަށް ވެސް އާޒިމް ވިދާޅުވި އެވެ.
އާޒިމް ވިދާޅުވި ގޮތުގައި އެންއައިސީ އަށް މީހުން ކުރިމަތިލީ 18 ވަނަ މަޖިލިސް އެކުލެވިފައި އޮންނަ ގޮތަށް ވިސްނައިގެންނެވެ. އަދި 19 ވަނަ މަޖިލިސް އެކުލަވާލެވިފައި އޮންނަ ގޮތަށް ބަލައި މެމްބަރު ކަމަށް އާ ބޭފުޅުންތަކެއް ކުރިމަތިލައްވާނެ ކަމަށް ގަބޫލު ކުރައްވާ ކަމަށް އޭނާ ވިދާޅުވި އެވެ. އެހެންވެ، އާޒިމް ހުށަހެޅުއްވީ އެންއައިސީ އަށް އަލުން ކުރިމަތިލާން ހުޅުވާލަން ރައީސަށް ލަފާ އެރުވުމަށެވެ. މަޖިލިހުގެ ތަޅުމުން އެ ހުށަހެޅުން ފާސްވީ ވޯޓުގައި ބައިވެރިވެވަޑައިގެންނެވި 66 މެމްބަރުންގެ އިއްތިފާގުންނެވެ.
އެންއައިސީގައި މިހާރު ތިއްބެވީ ހަތަރު މެމްބަރުންނެވެ. އެއީ ކޮމިޝަންގެ ރައީސް އަހުމަދު ސުލައިމާނާއި ނައިބު ރައީސް ހައްސާން ހަމީދާއި މެމްބަރު ހަދީޖާ އަބްދުﷲ އަދި އަހުމަދު އަމީނެވެ. ފަސް މެމްބަރުން ހިމެނޭ ކޮމިޝަންގެ މެމްބަރުކަމަށް އައްޔަން ކުރަނީ ފަސް އަހަރު ދުވަހަށެވެ.
ސަރުކާރުން އެންއައިސީ އުފެއްދީ، ފުލުހުންގެ މައްސަލަތައް ބެލުމަށް ކުރިން އޮތް ޕޮލިސް އިންޓަގްރިޓީ ކޮމިޝަން (ޕީއައިސީ) އުވާލުމަށް ފަހު އެވެ. އަދި ކަސްޓަމްސް އިންޓަގްރިޓީ ކޮމިޝަނުން ބަލަމުން އައި މައްސަލަތަކާއި އިމިގްރޭޝަން އަދި ކަރެކްޝަނަލް ސާވިސްގެ މައްސަލަތައް ވެސް މިހާރު ބަލަނީ މި ކޮމިޝަނުންނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މުލޭ
22 July 2019
ސިޔާސީ މީހުންނަކީ އިންސާފުވެރި ބައެއްކަމަށް ދެކުމަކީ މޮޔަކަމެއްހެން ހީވާންފަށައިފި. ބާރު ލިބުނީމަ އެންމެންނަށްވެސް މިވަނީ އެއްގޮތެއް. މިރާއްޖެއަށް ހުރިގޮތްތަމީ. އިޚްލާސްތެރިން ހުސްވީމަވާނެގޮތް މިވަނީ. ރައްޔިތުމީހާ ދޭ ވޯޓުވެސް އަމިއްލަ އެދުމާގުޅުވާފަ ދިނީމަ ވާނެގޮތް މިވަނީ.
ާއާޒިމް
22 July 2019
އާޒިމް ހޮވަން ބޭނުންވާ މީހަކު ހުރީދޯ ކުރިމަތި ނުލާ. ހަމަ ބުއްދިން ވިސްނައިގެން ނުވިސްނޭ އަލުން ކުރިމަތިލާން ހުޅުވާލަން ޖެހޭ ކަމެއް. ކޮމިޝަންތަކަށް ކުރިމަތި ލަނީ މަޖިލިސްގައި ތިބީ ކޮން ބައެއްތޯ ބަލާފައެއް ނޫން. މަތިން މާކްސް ލިބިނު މީހުން ކަމުނުދާނަމަ ދެން އޭގެ ދަށުން ތިބި މީހުން ހޮވަން ފެނޭ. 26 މީހުން ތެރޭގައި ކަމުދާ އެކަކުވެސް ނެތީތަ އާޒިމް.
އިންސާފުގެ މައިދާން
22 July 2019
ކީއްވެބާ އޭސީސީއަށް ކުރިމަތިލީ 63 މީހުންގެ ނަންނުފޮނުވީ މަޖިލީހަށް އިންސާފުން ކަންކުރަންޔާ އެންމެންނާ އިންޓަވިއުކޮށްބަލަ
އޭނަ
22 July 2019
މަޖިލިސް ތެރެއަށް ކޮރޮޕްޝަން ވަދެނިމިފަ އިބޫ ސޯލިހަލީ ކިހާ ސޯލިހު މީހެއްކަން ދެންއިންގިދާނެ
ކޮސްބޭ
22 July 2019
ގާނޫނުގަ އޮތީ 30 ދުވަސްތެރޭ މެންބަރަކު ހޮވަންވާނޭ ހުސްވާ މަގާމަށް. ގާނޫނާ ހިލާފް ތިޔަވީ މަޖުލިހުން. ތިކަންވެސް ބެލޭނެ ދުވަސް އަންނާނެ އަވަހަށް. ވެގެން އުޅޭ ގޮތަކީ ބޭނުން މީހާ ނުލައިގެން އަނބުރާ ތިޔަ ފޮނުވާލީ. ކޮންކަމެއްތޯ މިނިވަން އީ. ކަލޭމެން ގެ ބާރު ދައްކައިގެން ހޮވާ މީހުން މިނިވަންވަނީ ކިހިނެއް. މިހާރުވެސް ތިހިރީ ގަންނަގަނޑު. ތިއެކުލަވަން ތިއުޅޭ މިނިވަން މުއައްސަސާއެއްދޯ. ވޯޓުލީ މީހުންނަށް ސަލާމް މިސަރުކާރު ގެންނަން. ފެނޭތަ އިހުލާސްތެރިކަން.
މުލޭ
22 July 2019
މަގާމްދޭންޖެހޭ އަސްލުމީހާއަށް ކުރިމަތިލެވިފައި ނެތީމަ ފުރުަސަތުދޭން މަޖުބޫރުވީދޯ. އެހެންނޫންނަމަ ނަންތައް ދިރާސާކޮށް ޕޮއިންޓް ދީ ހުރިހާ މަސައްކަތެއް ކުރުމަށްފަހު ތިގޮތަށް ނިންމުމުގެ މާނައެއްނެތް. ރައްޔިތުންގެ ބޮލުގައި ތެތް ގޯންޏެއް އަޅުވާލީދޯ. ގަދަ. މޮޅު ބަހަނާއެއް.
ދައްތި
22 July 2019
ހުރިހާ ކޮމިޝަންތަކަށްވެސް އަލުން މެމްބަރުން ޢައްޔަންކުރަންވީ. އަލުން ހުޅުވާލިޔަކަސް ކަމަށް ޤާބިލް ބަޔަކު ނެގިއްޔާތާ. ނުލާހިކު ތަޢުލީމީ ޤާބިލް މީހުން އެޕްލައި ކުރިޔަސް ރައީސް މަޖިލީހަށް މި ފޮނުވަނީ ސިޔާސީ ގޮތުން އެންމެ ބާރުގަދަ މީހަކު ބެއަޕްދޭ ފަރާތްތަކުގެ ނަން. މީ ދެން ދެރަކަމެއް.
އިންސާފުވެރި މީހާ
22 July 2019
ދެން ކީއްކުރަން އިންޓަރވިއު ކުރީ؟! ހަމަ ބޭނުންވާ ވަކި މީހަކަށް މަގާމް ދިނުމުގެ ބޭނުމުގައި. އިންސާފު ޤާއިމް ކުރަން އައި މަޖިލހުން ވަރަށް އިންސާފު ގާއިމް ކުރެވިއްޖެ.
މަޖިލީހޫ
22 July 2019
މީވެސް ކުރެވޭ ކަމެއްތަ މިމީހުންނަށް ހަމަހިތަށްއެރީމަ ހިތަށް އެރި ގޮތެއް
މޮޔައިންގެ މަޖިލީސް
22 July 2019
18 ވަނަ މަޖިލީސް އޮތީ އެމެރިކާގަތަ؟؟؟؟ 26 މީހުން ކުރިމަތި ލީމަ އެވަރުމަދުވީ!!!!އެންމެންނާ އިންޓަވިއުކޮށްފަ މާރކްސް ދިނީ ކުރާނެކަމެނެއް އެދުވަހު ނެތިގެނަބާއޭ މަހިތަށްއަރަނީ ހެހެހެހެ!!! 19 ވަނަ މަޖިލީލަށް މިހޮވުނީ މޮޔައިންތަކެއްތާދޯ!!!!