ކިމް ކާޑޭޝަންގެ ތަފާތު ޑޮކިއުމަންޓަރީއެއް

އަހުމަދު އަދްޝަން، މިހާރު

31 ޖުލައި 2019 - 07:26

ގާނޫނީ ވަކީލުކަން މިހާރު ކިޔަވަމުން އަންނަ އެމެރިކާގެ މަޝްހޫރު ރިއަލިޓީ ޝޯ ތަރި ކިމް ކާޑޭޝަން ކްރިމިނަލް ޖަސްޓިސްއާ ބެހޭ ޑޮކިއުމަންޓަރީއެއް ނެރެން ތައްޔާރުވެއްޖެ އެވެ.

ދެ ގަޑިއެއްހާ އިރުގެ މި ޑޮކިއުމަންޓްރީގައި މިދިޔަ ހަފުތާގައި ކިމް ވޮޝިންޓަން ޑީސީގެ ކޮލަމްބިއާ ކަރެކްޝަނަލް ޓްރީމަންޓް ފެސިލިޓީ އަށް ޒިޔާރަތްކޮށް އެތަނުގައި ތިބި ގައިދިންނާ އެކު ބޭއްވި ބައްދަލުވުންތަކުގެ މަންޒަރުތައް ވެސް ހިމެނެ އެވެ. ޑޮކިއުމަންޓަރީ އަށް ދީފައިވާ ނަމަކީ "ކިމް ކާޑޭޝަން ވެސްޓް: ދަ ޖަސްޓިސް ރިޕޯޓް" އެވެ.

މިއާ ބެހޭ ވާހަކަތައް ޓްވިޓާގައި ހިއްސާ ކުރަމުން ކިމް ބުނީ ގައިދީންނަށް ހިންގާ ޕްރޮގްރާމްތަކާ ދޭތެރޭ އޭނާ ވަރަށް ހިތްހަމަޖެހޭ ކަމަށެވެ. އަދި ޕްރޮފެސަރު ޑރ. މާކް ހަވަޑްގެ ބެލުމުގެ ދަށުން ހިންގާ ތައުލީމީ ކޯސްތަކުގެ ބޭނުންތެރިކަން ބޮޑު ކަމަށް ބުންޏެވެ.

Last week I was so moved by Dr. Marc Howard, a Georgetown professor who teaches a course inside of a DC prison where men & women can get Georgetown credits. I met so many amazing people that can’t wait to share their stories with you. pic.twitter.com/xxmnIPFy7j
— Kim Kardashian West (@KimKardashian) July 27, 2019

މިދިޔަ އަހަރުގެ ޖެނުއަރީ މަހުގެ ތެރޭގައި ލޯންޗް ކުރި ޖޯޖްޓައުން ޕްރިޒަން ސްކޮލާސް ޕްރޮގްރާމްގެ ދަށުން ދެ ޖިންސުންގެ ގައިދީންނަށް އަންނަނީ އިނގިރޭސި އާއި ފިލޯސަފީ އަދި ވެރިކަން ހިންގުން ފަދަ ދާއިރާތަކުގެ ކޯސްތައް ހިންގަމުންނެވެ.

We filmed a documentary I am working on that will be out on @oxygen and I hope you will learn about the justice system the way I have.
— Kim Kardashian West (@KimKardashian) July 27, 2019

"ގައިދީންނަށް ހިންގާ މިފަދަ ޕްރޮގްރާމްތަކުގެ ސަބަބުން އެ މީހުން އެނބުރި މުޖަތަމައަށް ނުކުމެ ރަނގަޅު މަސައްކަތްތަކެއް ކުރުމުގެ މަގުފަހިވެގެން ދާނެ،" ކިމް ބުންޏެވެ. "އަދި މިއީ އެތައް ބައެއްގެ ދިރިއުޅުމަށް ހެޔޮ ބަދަލެއް ގެންނާނެ ކަމެއް."

ކިމްގެ "ކިމް ކާޑޭޝަން ވެސްޓް: ދަ ޖަސްޓިސް ރިޕޯޓް" ޑޮކިއުމަންޓްރީ ދައްކަން ހަމަޖެހިފައި ވަނީ މި އަހަރުގެ ފަހުކޮޅު އޮސިޖެން ޗެނެލުންނެވެ. އެކަމަކު އަދި ވަކި ތާރީހެއް އިއުލާނެއް ނުކުރެ އެވެ. ކިމް ބުނި ގޮތުގައި އޭނާގެ ޑޮކިއުމަންޓީން އަދުލު އިންސާފުގެ ނިޒާމު އޮންނަން އޭނާ ބޭނުންވާ ގޮތުގެ ތަސައްވުރެ ޑޮކިއުމަންޓަރީން ބެލުންތެރިންނަށް ދައްކުވައިދޭނެ އެވެ.

ރެޕާ ކަންޔޭ ވެސްޓާ ކައިވެނިކޮށްގެން ހަތަރު ދަރިން ވެސް ތިބި ކިމް، 38، ގާނޫނީ ވަކީލުކަން ކިޔަވަމުން އަންނަ އިރު، އޭނާއަކީ މިހާރު ވެސް ގައިދީންނަށް ގާނޫނު އެހީތެރިކަން ފޯރުކޮށްދީ، އަހުލާގު ރަނގަޅު ގައިދީން ޖަލުން ސަލާމަތްކޮށް ދޭން މަސައްކަތްތަކެއް ކުރަމުން އަންނަ މީހެކެވެ.