ގޮތް ނޭނގޭ ގަތުލުތަކާއި މީހުން ގެއްލުވައިލުމުގެ މައްސަލަތައް ބަލާ ރިޔާސީ ކޮމިޝަންގެ ރައީސް ހުސްނުއް ސުއޫދާއި މެމްބަރު މިސްބާހް އައްބާސް. ފައިލްފޮޓޯ/މިހާރު
07 ސެޕްޓެމްބަރ 2019 - 23:50
ނޫސްވެރިޔާ އަހުމަދު ރިލްވާން ގެއްލުވައިލި މައްސަލަ ތަހުގީގުކޮށް ރިޔާސީ ކޮމިޝަނުން އެކުލަވައިލި ރިޕޯޓާ ގުޅޭ ގޮތުން މަޝްވަރާ ކުރަން ރައްޔިތުންގެ މަޖިލީހުގެ ގައުމީ ސަލާމަތުގެ ކޮމިޓީ (241 ކޮމިޓީ) އަށް ރިޔާސީ ކޮމިޝަންގެ މެމްބަރުން ހާޒިރުކުރަން އެޖެންޑާ ކޮށްފި އެވެ.
ރައްޔިތުންގެ މަޖިލީހުގެ އިދާރާއިން ބުނީ، ގޮތް ނޭނގޭ ގަތުލުތަކާއި މީހުން ގެއްލުވައިލުމުގެ މައްސަލަތައް ބަލާ ކޮމިޝަންގެ މެމްބަރުން، މާދަމާ ހެނދުނު 10:00 ގައި ގައުމީ ސަލާމަތުގެ ކޮމިޓީން ބާއްވާ ބައްދަލުވުމަށް ވަޑައިގަންނަވަން ހަމަޖެހިފައިވާ ކަމަށެވެ.
ރިލްވާންގެ މައްސަލައިގެ ރިޕޯޓާ ގުޅޭ ގޮތުން 241 ކޮމިޓީން ބުރާސްފަތި ދުވަހުގެ ރޭ ވަނީ ފުލުހުންގެ ވެރިންނާ ވެސް ބައްދަލުކޮށްފަ އެވެ. ސިއްރު ބައްދަލުވުމެއްގެ ގޮތުގައި ބޭއްވި އެ ބައްދަލުވުމަށް ފަހު ފުލުހުން ނެރުނު ބަޔާނެއްގައި ބުނީ ރިލްވާންގެ މައްސަލައިގެ ރިޕޯޓްގައި ތުހުމަތު ކޮށްފައިވާ ދެ ފުލުހަކު ހައްޔަރުކޮށްފައި ނުވަނީ އެ ދެ ފުލުހުން ހައްޔަރު ކުރާނެ ގާނޫނީ ސަބަބެއް ނެތް ކަމަށް ކޮމިޝަނުން ބުނެފައިވާތީ ކަމަށެެވެ. ފުލުހުން އެހެން ބުނި އިރު އެ ދެ މީހުން ހައްޔަރު ކުރަން އެޓާނީ ޖެނެރަލް އިބްރާހީމް ރިފްއަތު އޮތީ ފުލުހުންނަށް އަންގަވައިފަ އެވެ.
ރިލްވާން ގެއްލުވައިލި މައްސަލައިގައި ތުހުމަތު ކުރެވޭ ދެ ފުލުހުންގެ އިތުރުން އެ މައްސަލައިގައި ތުހުމަތު ކުރެވޭ އާއްމުންގެ މީހަކު ވެސް އަދި ހައްޔަރެއް ނުކުރެ އެވެ. އެހެންވެ ބައެއް ފަރާތްތަކުން ފުލުހުންނަށް ފާޑުކިޔަމުން ދަނިކޮށް ކަމިޝަނާ އޮފް ޕޮލިސް މުހައްމަދު ހަމީދު މިރޭ ވިދާޅުވީ އެ މައްސަލައިގައި މީހުން ހައްޔަރުކުރަން ކޯޓް އަމުރަށް އެދެވޭނީ ކޮމިޝަނަށް ކަމަށެވެ.
މިރޭ ކުރެއްވި ޓްވީޓްތަކެއްގައި ވިދާޅުވީ ރިޔާސީ ކޮމިޝަންގެ ގާނޫނު (ރިޔާސީ ކޮމިޝަންތަކަށް ބާރު ދިނުމުގެ ގާނޫނު)ގެ ދަށުން، ރިލްވާންގެ މައްސަލަ ބެލުމުގެ ބާރު މިހާރު އޮތް ހަމައެކަނި އިދާރާއަކީ ރިޔާސީ ކޮމިޝަން ކަމަށެވެ. [އެ މައްސަލަޔާ ގުޅޭ ގޮތުން] ހައްޔަރުކުރަން ޖެހޭ ކޮންމެ މީހަކު ހައްޔަރު ކުރުމަށް ކޯޓް އަމުރު ހޯދުުމުގެ ފުރިހަމަ ބާރު ހަމަ އެ ގާނޫނުން ކޮމިޝަނަށް ލިބިދީފައިވާ ކަމަށް ވެސް އޭނާ ވިދާޅުވި އެވެ.
"މި މައްސަލައިގައި ތަހުގީގީ އިދާރާއަކީ މޯލްޑިވްސް ޕޮލިސް ސާވިސް ކަމަށް ނުވާތީ، ތަހުގީގީ އިދާރާއެއްގެ ގޮތުން، ހައްޔަރު ކުރުމުގެ އަމުރުކަށް އެދި ހުށައެއް ނޭޅޭނެ،" ޓްވީޓްގައި ހަމީދު ވިދާޅުވި އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ނެޝަނަލިސްޓް
08 September 2019
ތިޔަ ބައްދަލުވުމަކީ ސިއްރު ބައްދަލުވުމަކަށް ހަދާނެ ކަމަށް އުއްމީދު ކުރަން! ތިޔަ ތަހުގީގުގެ ނަތީޖާ އަކަށްވާންވާނީ އެ އަމަލު ހިންގި މީހުންނާ، އެކަން ރޭވި މީހުންނާ އަދި އެކަމަށް ވަސީލަތްތައް ފޯރުކޮށްދިން މީހުން ހޯދާ ޝަރީއަތްކޮށް، ހައްގު އަދަބު ދިނުން!
އާރީ
08 September 2019
ތި ކޮމިސަނަށް ކުރި އިތުބާރު ގެއްލިޖެ
ގަލްފް
08 September 2019
ރައީސްވެސް މަޖިލީހުގެ ކޮމިޓީ ތަކަށް އަދި ގެންދާނެ..ގައުމު ހިންގަނީ މަޖިލީހުން
ރަދީފު ބިން ރަފައިދާ
08 September 2019
މިކޮމެޓީތައް އުވާލަންވީ. ދެއިރު ދެދަޅައަށް އެތަނަށްދާން ތައްާރުވާން ނުހަނު ގިނަ މަސައްކަތްކުރަންޖެހޭ. ގާނޫނީ ޓީމާވާހަކަދައްކަންޖެހޭ. ސުވާލަކަށް ޖަވާބުނުދެވެއްޖިއްޔާ އެހިސާބުން އެނިމުނީ.