މިނިސްޓަރު އަމީރު ރައްޔިތުންގެ މަޖިލީހުގެ ޖަލްސާއެއްގައި ވާހަކަފުޅު ދައްކަވަނީ-- ފޮޓޯ: މަޖިލިސް އިދާރާ
04 ނޮވެމްބަރ 2019 - 10:47
3 comments
ކުދި އަދި މެދު ފަންތީގެ ވިޔަފާރިތައް ކުރިއެރުވުމަށް ހުޅުވި އެސްއެމްއީ ޑިވެލޮޕްމަންޓް ފިނޭންސް ކޯޕަރޭޝަން (އެސްޑީއެފްސީ) އަށް 450 މިލިއަން ރުފިޔާ ދިނުމަށް، އަންނަ އަހަރަށް ލަފާކުރާ ދައުލަތުގެ ބަޖެޓުގައި ހިމަނައިފި އެވެ.
ފިނޭންސް މިނިސްޓަރު އިބްރާހިމް އަމީރު ރައްޔިތުންގެ މަޖިލީހަށް ބަޖެޓް ހުށަހަޅުއްވަމުން މިއަދު ވިދާޅުވީ ރާއްޖޭގެ އިގްތިސާދުގެ ބޮޑު ބައެއް ހިއްސާކުރަނީ ކުދި އަދި މެދުފަންތީގެ ވިޔަފާރިތަކަށް ވުމުން އެފަދަ ވިޔަފާރިތައް ކުރިއެރުވުން މުހިންމު ކަމަށެވެ. އަންނަ އަހަރު ވެސް މިފަދަ ވިޔަފާރިތަކަށް އެސްޑީއެފްސީ މެދުވެރިކޮށް ލޯނު ދޫކުރާނެ ކަމަށް މިނިސްޓަރު ވިދާޅުވި އެވެ.
އެސްޑީއެފްސީ އަށް ދިނުމަށް ބަޖެޓުގައި ހިމެނި 450 މިލިއަން ރުފިޔާގެ ތެރެއިން 400 މިލިއަން ރުފިޔާ އަކީ ކެޕިޓަލްގެ ގޮތުގައި އެ ބޭންކަށް ދޭން ނިންމާފައިވާ އަދަދެވެ. އިތުރު 50 މިލިއަން ރުފިޔާ އަކީ އެސްއެމްއީ ގާނޫނުގެ ދަށުން ކުދި އަދި މެދުފަންތީގެ ވިޔަފާރިތަކަށް ލޯނު ދިނުމަށް އިންވެސްޓްކުރާ އަދަދެވެ.
ކޮންމެ އަހަރަކު ކެޕިޓަލްގެ ގޮތުގައި 400 މިލިއަން ރުފިޔާގެ ކެޕިޓަލެއް ދީގެން ކުރިއަށް އޮތް ތިން އަހަރު ތެރޭގައި، ސަރުކާރުގެ އެހީތެރިކަމެއް ނެތި އެސްޑީއެފްސީން ވިޔަފާރިތަކަށް ލޯނު ދޫކުރެވޭނެ ކަމަށް ވެސް މިނިސްޓަރު ވިދާޅުވި އެވެ.
"އެސްޑީއެފްސީ އަށް ކެޕިޓަލްގެ ގޮތުގައި 2020 ވަނަ އަހަރު 400 މިލިއަން ރުފިޔާ ދޫކުރާނެ. ސަރުކާރުގެ އަމާޒަކީ މި ތިން އަހަރު ކެޕިޓަލް ދޫކޮށް ސަރުކާރަށް ބަރޯސާނުވެ ލޯނު ދޫކުރެވެނެ ފަންޑެއް އެ ކުންފުނީގައި ގާއިމް ކުރުން،" އަމީރު ވިދާޅުވި އެވެ.
އެސްޑީއެފްސީ ކުރިއެރުވުމަށް ސަރުކާރުން ކުރާ މަސައްކަތުގެ ސަބަބުން ކޮންމެ އަހަރަކު 400 މިލިއަން ރުފިޔާގެ ލޯނު އެސްއެމްއީތަކަށް ދޫކުރެވޭނެ ކަމަށް ވެސް މިނިސްޓަރު ވިދާޅުވި އެވެ.
އަންނަ އަހަރަށް ލަފާކުރާ ބަޖެޓުގެ ގޮތުގައި 37.5 ބިލިއަން ރުފިޔާގެ ބަޖެޓެއް ސަރުކާރުން ވަނީ މަޖިލީހަށް ހުށަހަޅައިފަ އެވެ. މިއީ މިއަހަރުގެ ބަޖެޓަށްވުރެ ގާތްގަނޑަކަށް 8.5 ބިލިއަން ރުފިޔާ ބޮޑު އަދަދެކެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ފައްތާހް
04 November 2019
ތިޔަ ބޭންކް ގައި ފައިސާނެތީބާ..ފޯމްއެއް ލައިގެން އުޅޭތާ 3މަސްވެއްޖެ..ކައުންޓަރަށް ދާއިރަށް ބުނޭ އިރާދަކުރެއްވިއްޔާ ހަމަޖެހޭނެ އޭ..
މަމީ
04 November 2019
ތިޔަ ތަނުންވެސް ލޯން ހަމަދެނީ ޕާޓީގެ ކުދިންކޮޅަށް، ބޮޑު މީހެއްގެ އޯޑަރަށްނޫނީ ތިތަނުން ލޯނެއްވެސް އެޕްރޫވް ވާ ކަމަކަށްނުވޭ، ޔާމީން ސަރުކާރުގްވެސް ގެޓްސެޓް ލޯންވެސް ދިނީ ޕާޓީގެ ކުދިންކޮޅަށް، އެގޮތުން މަޖިލިސް ކޮންމެ މެންބަރަކު މެދުވެރިވެގެން އަންނަ ފަރާތަކަށް އެއްލޯން އޮންނަނީ ރިޒާވް ވެފަ،
ނަންނުޖަހާ
04 November 2019
އެސް،އެމް،އީ ބޭންކަށް ދޭ ލާރިއަކީ ބަހާލުމަށް ދެވޭ ލާރި. އެބޭންކުން ލޯނު ލިބެނީ މިލިޔަނަކަށް 2 ލައްކަ މެނޭޖަރަށް ދީގެންކަމަށް ވަނީ. މިކަން ބައްލަވާ އަވަސް ފިޔަވަޅު އަޅުއްވައި ދެއްވުން އެދެމެވެ،