ގިރިފުށީގައި ވަޒަން ބޭނުން ކުރުން ހުއްޓާލައި ބަދަލުތަކެއް ގެންނަނީ

ސިފައިންގެ ތަމްރީން ރަށް، ގިރިފުށީގައި ޓްރެއިނިންއެއް ހަދަމުން ދަނިކޮށް، އެ ރަށުގެ ބޭރުގައި އޮތް ސަފާރީއެއްގައި ހުރި ޓޫރިސްޓެއްގެ ގަޔަށް އިއްޔެ ވަޒަނެއް އެރުމުން، ލައިވް ވަޒަން ބޭނުން ކުރުން ވަގުތީ ގޮތުން ހުއްޓާލައިފި އެވެ.

ވަޒަން އެރީ ގިރިފުށީ ބޭރުގައި އޮތް ސަފާރީގައި ހުރި ޖަރުމަނުގެ 41 އަހަރުގެ ޓޫރިސްޓެއްގެ ކޮނޑަށެވެ. އޭނާގެ ހާލު ސީރިއަސްއެއް ނޫނެވެ. އެމްއެންޑީއެފުން ބުނިގޮތުގައި އެ ވަޒަން ގޮސް އޭނާގެ ގައިގައި ޖެހުނީ އެހެން ތަނެއްގައި ޖެހި ބާރުކެނޑިފައި ވަނިކޮށެވެ.

އެމްއެންޑީއެފުން ރޭ ނެރުނު ބަޔާނެއްގައި ބުނީ ލައިވް ވަޒަން ބޭނުންކޮށްގެން ހަދާ ތަމްރީނުތައް ކޮންމެހެން ވެސް މުހިންމު ކަމަށެވެ. އަދި އެ ސަރަހައްދުން ދަތުރުކުރާ މީހުންގެ ރައްކާތެރިކަން މާ މުހިންމު ކަމަށް ވެސް ބަޔާނުގައި ބުނެފައިވެ އެވެ.

އިއްޔެގެ ހާދިސާއާ ގުޅިގެން ކޮންމެ ދުވަހަކު ވެސް ތަމްރީންތަކަށް ވަޒަން ބޭނުންކުރާ ގިރިފުށީގައި މިހާރު ވަޒަން ބޭނުންކޮށްގެން ތަމްރީން ހެދުން ވަނީ މެދުކަނޑާލާފަ އެވެ.

އެމްއެންޑީއެފްގެ ތަރުޖަމާން، މޭޖާ އިބްރާހިމް އާޒިމް ވިދާޅުވީ އެ ހާދިސާ ހިނގަން މެދުވެރިވި ސަބަބު ބަލަމުން އަންނަ ކަމަށެވެ. ދެން އަލުން ވަޒަން ބޭނުން ކުރަން ފަށާނީ އެފަދަ ހާދިސާއެއް ތަކުރާރުނުވާނެ ގޮތަށް ބަދަލުތައް ގެނެސް ކަމަށް ވެސް އޭނާ ވިދާޅުވި އެވެ.

"މިހާރު އަމަލުކުރާ ގޮތަށް ބަދަލުތަކެއް ގެންނަން ޖެހޭނަމަ ގެންނާނަން،" އާޒިމް ވިދާޅުވި އެވެ.

ގިރިފުށީގެ އިތުރުން ސިފައިންގެ ތަމްރީންތައް ބާއްވަނީ ޅ. މާފިލާފުށީގަ އެވެ. އެ ރަށުގައި ވެސް ލައިވް ވަޒަން ބޭނުންކޮށްގެން ތަމްރީންތައް ހަދަ އެވެ. ނަމަވެސް މާލޭގައި މަސައްކަތް ކުރާ ސިފައިން ކޮންމެ މަހަކުހެން ބަޑި ޖެހުމުގެ ޓްރެއިނިން އަށް ދަނީ ގިރިފުއްޓަށެވެ.

ޒަމާނުންސުރެ ސިފައިންގެ ތަމްރީނަށް ބޭނުންކުރާ ގިރިފުއްޓާ ކައިރީގައި އޮންނަ، ކ. ހިންމަފުށީ ދެ ގެއަކަށް ވެސް ވަޒަން އެރި މައްސަލަތަކެއް މީގެ ދެތިން އަހަރު ކުރިން ފެންމަތިވި އެވެ. އެ ފަހަރު ސިފައިން ވަނީ އެއީ ގިރިފުށިން ޖެހި ވަޒަނެއް ނޫން ކަމަށް ބުނެފަ އެވެ.