ރ. މަޑުއްވަރީ: އެ ރަށުގައި ހައްދުފަހަނާޅައި ދިއުމުގެ ފިކުރު ފެތުރޭތާ އަހަރުތަކެއް ވެއްޖެ.
24 ނޮވެމްބަރ 2019 - 13:37
36 comments
ރ. މަޑުއްވަރީގައި ހަރުކަށި ފިކުރު ފެތުރި، ނުރައްކަލަކަށް ހުށަހެޅިފައި އޮތް ކަން އެނގުނީ މިދިޔަ ބުރާސްފަތިދުވަހުގެ ރޭ ހިނގި ހާދިސާއަކުން ނޫނެވެ؛ ކަނޑުމަތީގައި މީހަކު މަރާލުމުގެ ހުކުމް ނެރެ، ގަތުލު ކޮށްލަން އުޅުމުގެ މާ ކުރިން ވެސް އެ ރަށުގެ ހާލަތު ކަމާ ބެހޭ އިދާރާތަކަށް އެނގެ އެވެ. އެކަމަކު މިހާތަނަށް އެކަށީގެންވާ ފިޔަވަޅެއް އެޅި ހެއްޔެވެ؟
ވަކިން ޖަމާއަތް ހަދައިގެން އެ ރަށުގައި ނަމާދުކުރާތާ އެތައް އަހަރެއް ވެއްޖެ އެވެ. ބޭރު ރަށްރަށުގެ މީހުން ގެނެސް އެ މީހުން ގަބޫލުކުރާ ދީނީ މިންގަނޑުތައް އުނގަންނައި ދިނުން ވެސް ފުޅާ ދައިރާއެއްގައި ކުރިއަށް ގެންދިޔަ އެވެ. އޭގެ ނަތީޖާއެއްގެ ގޮތުން ސީރިއާ ހަނގުރާމަ އަށް ވެސް ބައެއް މީހުން ދިޔަ އެވެ. އަނެއް ބަޔަކު އެއާޕޯޓުން ހުއްޓުވާފައި ވެސް ވެ އެވެ.
އެ ފިކުރުގެ ތެރެއިން ކައިވެނީގެ ނަމުގައި ކުޑަކުދިންނަށް ޖިންސީ ގޯނާކުރުމުގެ އަމަލުތަކެއް ވެސް މިވަނީ ފެންމަތިވެފަ އެވެ. އައިސިސްގެ ނިޝާން ޖަހައިގެން ސެޓްފިކެޓްތައް ހަދައި، 18 އަހަރު ފުރިފައި ތިބޭ މީހުންނާ ވެސް ކޯޓުން ބޭރުގައި ސައްހަ ނޫން ކައިވެނިތައް ދަނީ ކުރަމުންނެވެ.
މަޑުއްވަރީގައި ހަރުކަށި ފިކުރު ފެތުރި އާއްމުންނަށް ނުރައްކަލަކަށް ވުމުން، 2010 ގައި އިސްލާމިކް މިނިސްޓްރީގެ ޓީމެއް އެ ރަށަށް ދިޔަ އެވެ. ވަކިން ޖަމާއަތް ހަދައިގެން ނަމާދުކުރި މީހުންނަށް ނަސޭހަތް ދޭން އުޅުމުން ދެއްކީ ނުކިޔަމަންތެރިކަމެވެ؛ ގަދަވީ ވެސް އެ މީހުންގެ ކޮޅެވެ! މިނިސްޓްރީގެ ޓީމަށް ޖެހުނީ އެނބުރި އަންނާށެވެ.
ކަނޑުމަތީގައި މަރާލަން އުޅުނު މީހާ، ސިފައިންގެ އެހީތެރިކަމާ އެކު ކޯސްޓް ގާޑަށް އަރުވަނީ.---ފޮޓޯ: އެމްއެންޑީއެފް
އޭގެ ފަހުން، 2014 ގައި މަޑުއްވަރީން މީހަކު ގެއްލިގެން ވެސް މައްސަލަ ބޮޑުވި އެވެ. އިމިގްރޭޝަނާއި ކަމާ ބެހޭ އެހެން އިދާރާތަކަށް ލިޔެގެން ހޯދި މައުލޫމާތުތަކުން އާއިލާ އަށް ސާފުވީ އޭނާ ބޭރަށް ފުރި ކަމެވެ. އޭގެ ހަގީގަތް ބެލިއިރު، އެ އަތޮޅު މީދޫ ބަޔަކާ އެކު ސީރިއާ އަށް ހަނގުރާމަ އަށް ދިޔައީ އެވެ. އޭގެ ފަހުން އޭނާގެ ޚަބަރެއް ނުވެ އެވެ. އާއިލާ އާއި ރަށުގެ ގިނަ ބަޔަކު ގަބޫލުކުރަނީ އެތަނުގައި އޭނާ މަރުވީ ކަމަށެވެ.
އޭނާގެ ފަހުން ވެސް މަޑުއްވަރީން ސީރިއާ އަށް ދާން ބަޔަކު ރޭވި އެވެ. އޭގެ ތެރެއިން އެކަކު އެއާޕޯޓުން ހިފެހެއްޓި އެވެ.
އެ ހަރަކާތްތައް މަޑުޖެހުމެއް ނެތި ހިނގަމުން އައިސް މިދިޔަ ބުރާސްފަތި ދުވަހު އެ އުޅުނީ ކަނޑުމަތީގައި މީހަކު ގަތުލުކޮށްލާށެވެ. އެއީ، އެ މީހުން ރޭވި ކަމަކަށް އޭނާ ބައިއަތު ނުހިފުމުން ކަމަށްވެ އެވެ.
މަޑުއްވަރީން "މިހާރު" އަށް ވާހަކަ ދެއްކެވި ސަރުކާރުގެ އިދާރާއެއްގެ އިސް ބޭފުޅަކު، ނަން ހާމަނުކުރަން އެދިވަޑައިގެން، ވިދާޅުވީ އެ ރަށުގައި ދީނީ ގޮތުން ހައްދުފަހަނާޅާފައިވާ ފިކުރުގެ ބިރުވެރިކަން އޮތް މިންވަރު ތަކުރާރުކޮށް ސަރުކާރުގެ ކަމާ ބެހޭ އިދާރާތަކަށް ހުށަހެޅި ކަމަށެވެ. ކުރީގެ ސަރުކާރުތަކުން ފެށިގެން ވެސް އެކަން ސަމާލުކަމަށް ގެންނަމުން އައިސް މި އަހަރުގެ ތެރޭގައި ލިއުމުން ދެ ފަހަރަށް ހުށަހަޅާފައިވާ ކަމަށް އޭނާ ވިދާޅުވި އެވެ.
"އިސްލާމިކް މިނިސްޓްރީ އާއި ހޯމް މިނިސްޓްރީގެ އިތުރުން ސަރުކާރުގެ އިސް ބޭފުޅުންނާ ބައްދަލުކޮށްފައި ވެސް މި ވާހަކަ ދެންނެވިފައި ވާނެ،" އޭނާ ވިދާޅުވި އެވެ.
"ސީރިއަސްކޮށް ބަލާނެ ކަމާއި ފިޔަވަޅު އަޅާނެ ކަމަށް ޖަވާބު ދެއްވާ."
މިހާތަނަށް އެކަށީގެންވާ ފިޔަވަޅު އެޅި ކަމަކަށް އޭނާ ގަބޫލެއް ނުކުރައްވަ އެވެ.
އޭނާ ވިދާޅުވި ގޮތުގައި ހަރުކަށި ފިކުރުގެ މީހުން ތަބާވެ ކުރިއަރުވަނީ، އިސްލާމްދީނުގައި މަޑުއްވަރީގެ އާއްމު ރައްޔިތުން ދެކޭ މިންގަނޑަށް ވުރެ މުޅިން އެހެން ކަހަލަ ފިކުރުތަކަކާއި ވިސްނުންތަކެކެވެ.
ވަކިން ޖަމާއަތް ހަދައިގެން ނަމާދު ކުރަނީ ވެސް އެހެންވެ އެވެ.
"ގާތްގަނޑަކަށް 26 އަށް ވުރެ ގިނަ މީހުން އެބަ އުޅޭ. އޭގެތެރޭގައި ރަށުން ބޭރުގެ މީހުން ވެސް އުޅޭ،" މަޑުއްވަރީގެ އިސް ބޭފުޅާ ވިދާޅުވި އެވެ.
ރ. މަޑުއްވަރީ ބަނދަރުމަތި: އެރަށުގައި ހަރުކަށި ފިކުރު ހުއްޓުވަން އެކަށީގެންވާ ފިޔަވަޅެއް ނާޅާ.
އެ މީހުން ގަބޫލުކުރާ ގޮތުގައި، މަޑުއްވަރީގެ ބޮޑު މިސްކިތް އަޅާފައި ވަނީ ގަބުރު މަތީގަ އެވެ. އެހެންވެ އެ މިސްކިތަށް ނަމާދަށް އެރުން ހުއްދައެއް ނުވާނެ އެވެ. ކުޑަ މިސްކިތަށް ނަމާދަށް އަރަނީ، ޖަމާއަތުން މީހުން ފޭބުމުން ވަކިންނެވެ. އަތޮޅުގެ އެކި ރަށްރަށުގެ މީހުން ގެނެސް ނަސޭހަތް ދިނުން ފަދަ ކަންކަން ވެސް ކުރިއަށް ގެންދެ އެވެ.
ހަރުކަށި ފިކުރު ފަތުރާ މީހުންނާއި ރަށްރަށް ދެނެގަނެވިފައިވާ ކަން ނެޝެނަލް ކައުންޓަ ޓެރަރިޒަމް ސެންޓަރުން 2017 ގައި ވަނީ ބުނެފަ އެވެ. އެކަމަކު އޭގެ ތެރޭގައި، މަޑުއްވަރީ ހިމެނޭ ކަން އެތަނުން އާއްމެއް ނުކުރެ އެވެ.
އޭރު ބުނެފައި ވަނީ، ބައެއް ރަށްރަށުގައި ދީނުގެ ނަމުގައި ހަރުކަށި މެސެޖްތަކާއި ނުބައި މައުލޫމާތު ފަތުރަމުންދާ ކަމަށެވެ. އެ ފިކުރު ކުރިއަރުވަނީ، ދީނުގެ ކަންކަމުގަ އާއި ހިލާފު އުފެދޭ ނުވަތަ ދެބަސްވެވޭ ކަންކަމުގައި ރުޅިވެރިކަމާއި ޖައްބާރުކަން އިސްކުރުމަށެވެ. އޭގެ ޝިކާރައަކަށް ޒުވާނުންވެ، ހަނގުރާމައަށް ދިއުމުގެ ވިސްނުމާއި ހިޔާލު ގެންގުޅޭ ކަން ކައުންޓަ ޓެރަރިޒަމް ސެންޓަރުން ބުނެފައިވެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އިހުސާނާ
28 November 2019
މީ ދެން ކިހާ ބޮޑު ބލވރކމއ މި ޤައުމަށް ކުރިމަތިވެފަ މި އޮތީ!
އާދޭސް.
25 November 2019
މިހާރު ވަގުތު ފާއިތުވެއްޖެކަމަށް ބަލަމާ! މައުމޫނުގެ ވެރިކަން ނިމުނު ހިސާބުން އެމީހުންނަށް ހިތްވަރުލިބި މިގައުވަނީ އެމީހުންގެ ހާއްޔަކަށް ހަދާފައި! ހިއެއްނުވޭ ދެން މިކަން ރަނގަޅުވާނެކަމަކަށް1 މައުމޫނު އެމީހުންނާ ދޭތެރޭ ގެންގުޅުނީ ވަރަށް އިންބާފުވެރި ނިންމުމެއް1 ޝުކުރިއްޔާ ޒަޢީމް.
އައްޔަ21
25 November 2019
ގަބުރު މަތީ ނަމާދު ކުރުމަކީ، މަޑުކަށި ފިކުރުދޯ، ކޮންމެގޮތެއްވިޔަސް އިސްލާމްދީނުގަ ހުއްދަ ކަމެއްނޫން ޤަބުރުމަތީ ނަމާދު ކުރުމަކީ
މާކެޔޮޅު
25 November 2019
ގުބާ މިސްކިތް ހެދީ ގަބުރު ކަށިތައް ފެނުމުން އެ ނަގާ އެހެން ތަނެއްގައި ވަޅުލާފައި. ނުފެންނާތީ މިސްކިތް އަޅާނީ. ފެނުނުނަމަ އެހެން ތަނަކަށް ބަދަލު ކުރާނެ. ވަކިވެގަންނަން ބަހަނާ ދައްކާތި. އައިއެސްއަކީ އެންމެ ގިނަ މުސްލިމުން މެރި މީޙުން. އެއީ މުސްލިމުން މަރާ ކަތިލާ ބައެއް.
ކޮރަލް
25 November 2019
ދީނައް ފުރައްސާރަ ކުރާ މީހުންގެ ރިޕޯޓް އެއް ލިޔެލަ ބަލާށެވެ .
މިވެސް ހައްޤު ބަސް
25 November 2019
ތި ހައްދު ފަހަނައެޅި ދީނީ މީހުން ސިޔާސީ ގޮތުން ތާއީދު ކުރަނީ ނަޝީދަ އަށެވެ.މައުމޫނަކަށްނުވަތަ ޔާމީނަކަށް، ނުވަތަ ޤާސިމަކަށް ވެސް ނޫނެވެ.މިވަނީ ކިހިނެއް ތޯއެވެ؟އެތާ ގިނަވާނީ އަންނި މެން ފަހަތުން މުޒާހަރާގައި އުޅުނު ބޯއީސް އެވެ
ކަޓޭ
25 November 2019
ސަަަފްކިޔާ ޖަމިއްޔާއަކުން ކޮންމެ ހަފްތާ ބަންދެއްގަ ރައްރަށައްގޮސް ދަސްކޮދޭ ދީން މިފެންނަނީ. 13 އަހަރުގެ ކުއްޖަކާ މީހަކު ބެހިގެން އެވާހަކަ ދެއްކީމަ ކޮންމެސް މީހަކު ބުންޏެއްނު، 13 އަހަރުގެ ކުދިންނެއް ނުތިބޭނެޔޭ. 13 އަހަރުވީމަ އެއީ އަންހެނެކޭ. ތިކަމުގެ ހުރިހާ ކްރެޑިޓެއް ލިބޭނީ މިއުޅޭ އަލީ ޒާހިރު، އަލީ ޒައިދު ކަހަލަ ސެއިޚުންނަށް. ކޮންމެ ހަފްތާ ބަންދެއްގަ ދަރުސްދޭން ރައްރަށަށް ދާވާކަހަ ޓްވީޓް ކޮއްފަހުންަތަންފެނޭ.
ގަޓް ބްރޯ
24 November 2019
ރައީސް ނަޝީދު ދައްކަވާ ވާހަކަ ގިނަ ބަކަށް ގަބޫލުކުރެވެނީ މިހެންވެ.
ހޭބަލިވާ
25 November 2019
އއ ހިމަންދޫ ގައި އެއްމެ ފުރަތަމަ އެހާ ފުޅާ ކޮށް ތިކަން އޮތީ؟މައުމޫނުގެ ރައީސް ކަމުގައި ސިފައިންނާއި އެމީހުނާއި ދެމެދު ބޮޑު ކުރިމަތި ލުމެއް ހިނގި އެވެ. ޢެއްމެ ފަހުން ފުލުހުން ބާރުގެ ބޭނުން ކޮށް، އެމީހުން ހިފާ ހައްޔަރު ކޮށް، ދޫނިދޫ ގައި ބަންދު ކުރިއެވެ. ދަންނަވަން މިއުޅޭ އެއްޗަކީ ދީނީ ހަރުކަށި ހިމަންދޫ މީހުނަށް ހިއްވަރުދީ ސަރުކާރާ ފޯރި ޖެއްސުވީ ތި ވިދާޅުވާ ނަޝީދު މެން އަދީގައި ތިބެގެން ކަން ސާފު ކޮށް އެއްމެނަށް އެގެއެވެ.ބަލަ ނަޝީދަކީ ނަޝީދެވެ.
ދޭޑޯންޓް
24 November 2019
ސަރުކާރުން އުފައްދާފައިވާ ކައުންޓަރ ޓެރެރިޒަމް އިދާރާގެ ބޭނުމެއް ނެތް ކަން އެއީ އެނގި ފާޅުވަމުން އަންނަ ކަމެކޭ ތިޔާ ކަން ކުދި އާބާދީ އޮންނަ ކޮންމެ ރަށެއްގައި ވެސް ހިނގައޭ ނޫނު އަތޮޅު އަދި ރާއަތޮޅު އަދި ށ. އަތޮޅު އެއީ މިކަމުގައި ވަރަށް ކުރީގައި އުޅޭ އަތޮޅު ތަކެއް ކަން އެއީ އެންމެން ވެސް ދަންނަ ބޮޑު ސިއްރެކޭ އެކަމަކު ސަރުކާރަށް މިކަން ނުބެލި ސިޔާސީ މީހުން ޖަލަށް ގަޅާލަައިގެން ވެރިކަމުގައި ބަގުޑި ބައްދަން ކޮންމެ އެއްޗެއް ވެރިކަމަށް އަޔަސް އުޅެނީ
ހިސެން
24 November 2019
ތި ކަން ހުއްޓުވަން މައުމޫން ކޮންމެސް މަސައްކަތެއް ކުރި.ތިކަ ހަލަ ޖަމާއަތެއް ހުއްޓުވަން ސިފައިން ކުޑަފަރީއައް ފޮނުވައިގެން އެމީ ހުނާ ކުރިމަތިލާންވެސް ޖެ ހުނު. އެކަމު އަނިޔާއޭ، ޑިކްޓޭޓަރޭ، ސޯސް ޖަ ހައިގެން ސޭ ހުން ތުބުޅި ބޭލުވިކަމައްވެ ރިޕޯޓު ހަދައިގެން ބޭރައް ފޮނުވާ އެކި ޖަމިއްޔާ ޖަމާއަތްތަކާ ގައުމުތަކާ ރާއްޖެ ޖައްސުވާ ސަރުކާރައް ފިޔަވަޅު އަޅަންގޮވާ ފައިދާ ނަގައިގެން އަދާލަތާ މޑޕ އެވިއްކައިގެން 2008ގަ ވެރިކަމައް އައީ. މިއަދު؟؟؟؟
ހިރިޔާ
24 November 2019
ދެންވެސް ވަގުތު ފާއިތުނުވަނީސް އަވަސް ހައްްލެއް ހޯދުމަށް ގޮވާލަން. ކޮންމެ މީހަކަށް ވިޔަސް ގައުމީ ސަލާމަތަށް ނުރައްކާ ކުރުވާފަދަ ވާހަކަ ދައްކާ ކޮންމެ މިހަކު ހުއްޓުވަންވެސް ޖެހޭ.ވިސްނުންތެރި ކަމާ އެކު އަވަސް ހައްލެއް ނުހޯދިއްޖެނަމަ ދަރިންގެ ދަރިންނާ ހަމައަށް ވާސިލް ވެގެން ހިނަގައިދާނެ ބިރުވެރި ހާލަތެއް މިތާންގަ އުފެދިދާނެ.