އެމެޒޯންގައި ވިއްކާ ކުޑަކުދިންގެ ސްމާޓްގަޑިތަކެއްގައި ސެކިއުރިޓީ ބާގަނޑުތަކެއް

އެމެޒނުން ވިއްކަމުން އަންނަ ކުޑަކުދިންގެ ސްމާޓްގަޑިއެއް.

އަހުމަދު އަދްޝަން، މިހާރު

14 ޑިސެމްބަރ 2019 - 08:55

ކުޑަކުދިންނަށް ހާއްސަކޮށްގެން އެމެޒޯން އިން ވިއްކާ ސްމާޓްގަޑިތަކަކާ ގުޅޭ ގޮތުން ކަންބޮޑުވުންތަކެއް އުފެއްދިއްޖެ އެވެ.

މަޝްހޫރު އޮންލައިން ފިހާރައިން އަންނަނީ ކުޑަކުދިންނަށް ހާއްސަކޮށްފައިވާ ތިން މޮޑެލެއްގެ ސްމާޓްގަޑި ވިއްކަމުންނެވެ. އޭގެ ތެރޭގައި ހިމެނެނީ ޗިލްޑްރެންސް ސްމާޓްވޮޗާއި ޖީ36 ސްމާޓްވޮޗާއި ސްމާޓް ޓާޓަލްސް ކިޑްސް ސްމާޓްވޮޗެވެ. މި އެއްޗެހީގެ އަގު އުޅެނީ 27-47 ޑޮލަރާ ދެމެދުގަ އެވެ.

މި ގަޑިތައް ވިއްކަން ފެށުމާ އެކު މީގެ ސެކިއުރިޓީ ފީޗާތަކާ ދޭތެރޭ ދަނީ ކަންބޮޑުވުންފާޅުކުރަމުންނެވެ. ރެޕިޑް7 ގެ ސައިބަ ސެކިއުރިޓީ ރިސާޗަރުންގެ ޓީމުން ބުނެފައިވާ ގޮތުގައި އެމެޒޯން އިން ވިއްކާ މި ގަޑިތަކަކީ ސެކިއުރިޓީ ގިނަ މައްސަތަކެއް ހުރި އަދި އޭގެ ޒަރީރާ އިން ޖާސޫސްކޮށްފާނެ ކަމުގެ ބިރު ވެސް އޮތް އުފެއްދުންތަކެކެވެ.

As part of a recent #IoT hacking training exercise, our pentesting team looked at children's GPS-enabled smartwatches. The findings by our team sheds a light on why security of IoT devices, especially those used by children, is so important. https://t.co/31spO32Irj
— Rapid7 (@rapid7) December 11, 2019

އެގޮތުން މި ގަޑިތައް ފަރުމާކޮށްފައި ވަނީ އޭގައި ބޭނުންކުރާ ފޯނު ނަމްބަރު ފަސޭހައިން އަތުލައިގަތުމުގެ އިތުރަށް އޭގެ ޖީޕީއެސް މެދުވެރިކޮށް ވެސް ކުޑަކުދިންގެ ރައްކާތެރިކަން ގެއްލިދާނެ ފަދަ ގޮތަކަށް ކަމަށް ބުންޏެވެ. މީގެ އިތުރުން ހެކަރުންނަށް އޭގެ ފީޗާތަކާ ކުޅެލައިގެން ވަރަށް ފަސޭހަކަމާ އެކު، ކުޑަކުދިންނަށް މުއާމަލާތް ވެސް ކުރެވިދާނެކަން ފާހަގަކޮށްފައިވެ އެވެ.

އެހެންވެ އެމެޒޯނުން ވިއްކާ ކުޑަކުދިންގެ ގަޑިތައް ގަތުމުގެ ކުރިން ދެވަނަ ވިސްނުމަކަށް ދާން ރެޕިޑް7 އިން ވަނީ އިލްތިމާސްކޮށްފަ އެވެ. އެ ކުންފުނީގެ ރިސާޗް ޑިރެކްޓަރު ޓޮޑް ބިއާޑްސްލީ ވިދާޅުވީ ސެކިއުރިޓީ ބޮޑެތި ބާގަނޑުތަކެއް ހުރި ސްމާޓް ޑިވައިސްތަކެއް ކޮންޓްރޯލެއް ނެތް ގޮތަށް ކުޑަކުދިންނަށް ދޫކޮށްލުމަކީ އެއްގޮތަކަށް ވެސް ރައްކާތެރި ކަމެއް ނޫން ކަމަށެވެ.

"އެހެންވެ އެބަޖެހޭ މިފަދަ އެއްޗެހީގެ ސަބަބުން ހެކަރުންނަށް ނަގައިފާނެ ފައިދާތަކަށް ފާރަވެރިވާން،" އޭނާ ވިދާޅުވި އެވެ.

އެމެޒޯނުން ވިއްކާ ސްމާޓްގަޑިތަކެއްގެ މައްސަލައިގެ ވާހަކަ މީޑިއާތަކުގައި ދެކެވެމުން ދިޔަ ނަމަވެސް އެ ކުންފުނިން އަދި މިކަމާ ބެހޭ ގޮތުން އެއްވެސް އެއްޗެއް ނުބުނެ އެވެ. އަދި ގަޑިތައް ގަންނަން އެމެޒޯނުން ގަންނަން ލިބެން ހުރިކަން ފާހަގަކުރެވެ އެވެ.