މައުމޫން ފައުންޑޭޝަންގެ ޖަލްސާއެއްގައި އެމަނިކުފާނު ވާހަކަ ދައްކަވަނީ: ކާޑުގެ ބާވަތްތައް އަގުބޮޑުކުރަން ސަރުކާރުން ނިންމި ނިންމުމަށް ބަދަލު ގެންނަން ޖެހޭ ކަމަށް ވިދާޅުވި. --ފޮޓޯ: މުހައްމަދު ޝަރުހާން
02 އޮކްޓޯބަރ 2016 - 13:43
57 comments
ކާޑުގެ އަގު ދެ ގުނަ ބޮޑުކުރަން ސަރުކާރުން ނިންމި ކުއްލި ނިންމުމާ މެދު ހިތްހަމަޖެހިވަޑައި ނުގެން އެނޫން އެހެން ގޮތެއް ހޯދައިދޭން ކުރީގެ ރައީސް އަދި ވެރިކަންކުރާ ޕާޓީ، ޕީޕީއެމްގެ ރައީސް މައުމޫން އަބްދުލްގައްޔޫމް އިއްޔެ އެދިވަޑައިގެންފި އެވެ.
ޕީޕީއެމް ޕާލިމެންޓަރީ ގްރޫޕްގެ ވައިބަ ގްރޫޕްގައި މައުމޫން ލިއުއްވީ ކާޑުގެ ބާވަތްތަކުގެ އަގު ކުއްލިއަކަށް މިހާތަން ބޮޑުވުމަކީ އާއްމުންނަށް ވަރަށް ދަތިވާނެ ކަމެއް ކަމަށެވެ. އެގޮތަށް ބަދަލު ގެނައުމަކީ ޕީޕީއެމްގެ ސަރުކާރަކުން ކުރާ ކަހަލަ ކަމެއް ނޫން ކަމަށް ވެސް އެމަނިކުފާނު ވިދާޅުވި އެވެ.
"މި ނޫން ގޮތެއް ހޯދުން މުހިއްމު،" ވައިބަ ގްރޫޕްގައި މައުމޫން ވިދާޅުވި އެވެ.
ސަރުކާރުން ކާޑަށް ދޭ ސަބްސިޑީ ކުއްލިއަކަށް ކަނޑާލައި ހަމައެކަނި ފަގީރުންނަށް ދޭ އެއްޗެއްގެ ގޮތުގައި ހަމަޖެއްސުމާ އެކު ކާޑުގެ ބާވަތްތަކުގެ އަގު ވަނީ ބޮޑުވެފަ އެވެ.
މާލޭގައި ކުރިން 3.98ރ. އަށް ލިބުނު ހަނޑޫ ކިލޯއެއް މިހާރު ގަންނަން ލިބޭނީ 7.96ރ. އަށެވެ. ކުރިން ހަތަރު ރުފިޔާ އަށް ވިއްކި ހަކުރު ކިލޯގެ އަގު ދެ ގުނަވެ އަށް ރުފިޔާ އަށް ވަނީ އަރައިފަ އެވެ. ފުށް ކިލޯއެއްގެ އަގު ވަނީ 2.96ރ. އިން 5.96ރ. އަށް ބޮޑުވެފަ އެވެ.
މި އަގުތަކަށް ވުރެ ރާއްޖޭގެ އެހެން ސަރަހައްދުތަކުގައި ކާޑުގެ ބާވަތްތަކުގެ އަގު ބޮޑުވާނެ އެވެ. ސަރުކާރުގެ އާ ކޮންޓްރޯލް އަގު އެކޮނޮމިކް މިނިސްޓްރީން ހުކުރުދުވަހު ވަނީ އާންމުކޮށްފަ އެވެ.
ރައީސް އަބްދުﷲ ޔާމީންގެ ބައެއް ނިންމެވުންތަކާ މެދު ހިތްޕުޅުހަމަޖެހިވަޑައިނުގެން މައުމޫން ހުންނެވިއިރު، ރައްޔިތުންގެ މަޖިލީހުގެ ޕީޕީއެމްގެ ސާފު އަޣުލަބިއްޔަތާ އެކު ސަރުކާރުން ނިންމާ ބައެއް ނިންމުންތަކަކީ ރައްޔިތުންނަށް ގެއްލުން ހުރި ކަންކަން ކަމަށް މައުމޫން ގެންދަވަނީ ވިދާޅުވަމުންނެވެ. އޭގެ ތެރޭގައި ބޭރުގެ ފަރާތްތަކަށް ރާއްޖެ އިން ބިން މިލްކުރެވޭ ގޮތަށް ގާނޫނު އަސާސީ އަށް ގެނައި އިސްލާހާއި އިއުލާން ނުކޮށް ރަށްތައް ދޫކުރަން ފާސްކުރުމާއި އެއްވެ އުޅުމާއި ހިޔާލުފާޅުކުރުމާއި މިނިވަން ނޫސްވެރިކަމަށް ހުރަސްއެޅޭ ގޮތަށް ގާނޫނަށް ގެނައި އިސްލާހުތައް ހިމެނެ އެވެ.
ކާޑުގެ އަގު ބޮޑުކުރުމާ މައުމޫން ދެކޮޅު ހެއްދެވިއިރު، އެކަން ކުރަން ޖެހުނީ ސަރުކާރުން ބުނެފައިވާ ގޮތުގައި، ރާއްޖެ އަށް ބޭރުގެ ފަރާތްތަކުން މާލީ އެހީ ހޯދަން އުނދަގޫވެފައި ވާތީ އެވެ. ސަބްސިޑީ ކަނޑާލައިގެން 140 މިލިއަން ރުފިޔާ ސަލާމަތްކުރުމަށް ވުރެ ސަރުކާރަށް މުހިއްމީ، ބޮޑެތި މަޝްރޫއުތައް ހިންގަން ބޭރުގެ މާލީ އިދާރާތަކުން ދޭ ލޯނުގެ އެހީ މެދުކެނޑުމެއް ނެތި ލިބުން ކަމަށް ރައީސް އޮފީހުގެ މިނިސްޓަރު އަހްމަދު ޒުހޫރު އިއްޔެ ވަނީ ވިދާޅުވެފަ އެވެ.
އެކަމަކު ހަރަދު ކުޑަކުރަން މާލީ އިދާރާތަކުން ލަފާ ދޭ އެހެން ކަންކަން ހުރި ގޮތަށް ބަހައްޓާފައި ކާޑުގެ އަގު ބޮޑުކުރުމަކީ ރައްޔިތުންނަށް ނިކަމެތިކަން ލިބޭނެ ފިޔަވަޅެއްގެ ގޮތުގައި ގިނަ ބަޔަކު ދެކެ އެވެ.
ހަރަދުކުޑަކުރުމަށް، ޓެކްސް އަށް ބަރޯސާ ނުވާ ގައުމަކަށް ހެދުމާއި މުއްސަނދިންގެ އަތުން އިންކަމް ޓެކްސް ނެގުމާއި ސަރުކާރުގެ ހަރަދު ކުޑަކުރުމާއި ބޭކާރު ވަޒީފާތައް މަދުކުރުމާއި މުވައްޒަފުންގެ އަދަދު މަދުކޮށް، ދައުލަތުގެ މުވައްޒަފުންގެ މުސާރައިގެ ފަރަގު ކުޑަކުރުން ވެސް މާލީ އިދާރާތަކުން އަބަދުވެސް ލަފާދެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ދެކުނު ފަޑިޔާރު
03 October 2016
ސަރުކާރު ޕްރެޝަރަށް ވެއްޓޭ ކޮންމެ ވަގުތެއްގައި ސަރުކާރަށް އިތުރު އުދަގުލެއް ކުރިމަތިވާގޮތަށް ބަސްބުނުމަކީ 30 އަހަރު ދުވަހުގެ ތަޖްރިބާ އާއެކު ޕީޕީއެމްގެ އިސްފަޑީގައި މަނިކުފާނު ހުންނަވައިގެން ކުރުމަށް ދިވެހި ގައުމު އެދި ގޮވާލާ ގޮވުމެއްނޫން. އެކަމުގެ ސަބަބުން ގައުމަށް ބަނަކަން އިތުރުވުން ނޫން އެއްވެސް ކަމެއް އިތުރުވެގެން ނުދާނެ.
ލާހިފުތު
03 October 2016
އެގޮތަކީ: (1) މުދަލުގެ އަގު ކޮންޓްރޯލްކުރުން (2) ބިދޭސީންނަށް ސަބްސިޑީޒް ކަޑާލުން (3) ހޮޓާރެސްޓޯރަންޓް ކެފޭ ފަދަ ތަންތަނަށް ސަބްސިޑީޒް ކަޑާލުން (4) ރިޒޯޓްތަކުގެ މެނޭޖްމަންޓް %65 ދިވެހީންގެ އަތްމައްޗަށް އައުން (5) ރަށްރަށުގެ އާބާދީގެ %10 އަްވުރެ ބިދޭސީން އިތުރިނުވުން. (6) އެކިއެކި އިންވެސްޓްމަންޓާއި މަސައްކަތް ތަކުގައި މަދުވެގެން %65 ދިވެހިން ބޭނުންކުރުން. (7) ކުރީގެ ރައީސުންގެ އިނާޔަތުގެ %50 އުނިކުރުން.
އަހުމަދު
03 October 2016
ކާޑު އަގު ބޮޑުކޮށް ވިއަކާކަމުގެ މައުލޫމާތު ލިބޭ. ވިއަކާ ކަން އިގޭ. އެކަމަކު ފިޔަވަޅު ނާޅަމޭ ނުބުނެވޭ. ކޮންކަހަލަ ކަމެއް މިއީ. މޮޅުމީހާ އަށް މޮޅުގޮތް ދެރަމީހާ އަށް ދެރަގޮތް. އެގިތިބެ އަޅާނުލީމަ މިކަމުގަ އިހްމާލު ވަނި ކޮން ބައެއްބާ؟
ކަލޯގަޔާ
03 October 2016
މާލޭގައި ކުރިން 3.98ރ. އަށް ލިބުނު ހަނޑޫ ކިލޯއެއް މިހާރު ގަންނަން ލިބޭނީ 7.96ރ. އަށެވެ. ކުރިން ހަތަރު ރުފިޔާ އަށް ވިއްކި ހަކުރު ކިލޯގެ އަގު ދެ ގުނަވެ އަށް ރުފިޔާ އަށް ވަނީ އަރައިފަ އެވެ. ފުށް ކިލޯއެއްގެ އަގު ވަނީ 2.96ރ. އިން 5.96ރ. އަށް ބޮޑުވެފަ އެވެ. -ރަނގަޅު-
ބުއްދި
03 October 2016
ތިޔަ 104 މިލިއަން ރުފިޔާ ޞަދަޤާތު ފައުންޑޭޝަނުން ވެސް ދެއްވާފާނެ. އެބޭފުޅުން ފަންޑްރައިޒް ޙަރަކާތްތައް އަބަދުކުރިއަށްއެބަ ގެންދަވާ. ވީމާ ކާޑްގެ އަގު ބޮޑުނުކޮށް ވެދާނެ.
މިއަދުގެ އަރަތް
03 October 2016
ޕީޕީއެމް ވެރި ކަމެއްގައި އެޕާޓީގެ ރައިސް ކިޔާ އެއްޗަކާ އެޕާޓީ އިން ކުރާ ކަމަކާ އުޑާ ބިމާހާ ތަފާތު! ދެން ރައްޔިތުން މިތިބިނެޖެހެނީ އަނގަ އައްޕަޗެއް ހެން ހަދައިގެން ! މިއަށް ކިޔަނީ ރައްޔިތުން ގުނބޯ ހެއްދުން!
ހޭލާ
03 October 2016
އަހަރު 104 މިލިޔަން ރުފިޔާ ސަލާމަތް ކުރުމަށް ޖުމްލަކޮށް ގިނަ ރައްޔިތުންނަށް ތަކްލީފް އުފުލަންޖެހޭ ކަމެއް ކުރުންތޯ ނުވަތަ މި ސަރުކާރުން އެކިއެކި ނާޗަރަންގީ ސޯވް ތަކަށާއި ރައީސް ޔާމީނު ފްރޮމޯޓް ކުރަން 'ރަގަޅު' ކޭމްޕޭންގެ ޚަރަދުތައް މަދުކޮށްލުންތޯ މުހިއްމީ. ޕީޕީއެމްގެ ސަރުކާރަކުން ނުކުރާކަހަލަ ކަމެއް މި ސަރުކާރުން ކުރަމުންދާއިރު މިއީ ކޮން ޕާޓީއަކަށް ނިސްބަތްވާ ސަރުކާރެއްތޯއެވެ. ޕީއޭ؟؟؟؟
ގާހިރު
03 October 2016
އަޅުގަނޑު އަބަދުވެސް ގަންނަނީ އާދައިގެ ހަނޑޫ. އެކަމަކު ދުވަހަކުވެސް އެއްވެސް ފިހާރައަކުން 3.98ރ އަށް ހަނޑު ކިލޯއެއް ގަންނާކަށް ނުލިބެ. މުޅިންވެސް ފިހާރަތަކުން ވިއްކަނީ ހަނޑޫ ކިލޯއެއް 4.50ރ. އަށް އެހެންވީމާ، މިވާ ގޮތެއް ބުނެދީބަލަ.
ސުޕަރ މޭން
03 October 2016
ޕާޕާރު ކައިގެން ތިބޭނީ..
ބުހާޜީ
03 October 2016
ނޫނީ ޕޭޕަރުކާނީ ދޯ؟
މަރީ
03 October 2016
ތިބުނާ އަގުތަކަށް ކާޑުގެ ބާވަތް ގަންނަން ލިބޭތަނެއް އަންގާދީބަލަ. އެއްވެސް ފިހާރައަކުން ތިއަގުތަކަށް ގަންނާކަށް ނުލިބޭ. ތިއަށްވުރެ ބޮޑުއަގެއްގައި ލިބެނީ.