ކޮރޯނާވައިރަސް ފެތުރެން ފެށުމުން ގައުމުތަކުން އެޅި ފިޔަވަޅުތަކާ ހެދި ދަތުރުފަތުރު ހުއްޓުމަކަށް އައުމުން ގައުމަށް ނުދެވިި، ރާއްޖޭގައި ތާށިވި ސައުތު އެފްރިކާ އާއި މޮރިޝަސް މީހުން ގޮވައިގެން މޯލްޑިވިއަން އިން ދިގު ދަތުރަކަށް މިއަދު ފުރައިފި އެވެ.
ސައުތު އެފްރިކާ އިން ރާއްޖެ އަށް ކަނޑައަޅާފައި ހުންނަވާ އޮނަރަރީ ކޮންސުލް މުހައްމަދު އަލީ ވިދާޅުވި ގޮތުގައި، ސައުތު އެފްރިކާގެ 40 މީހަކާއި މޮރިޝަސްގެ 11 މީހަކު ރާއްޖޭގައި ތާށިވީ އެމިރޭޓްސް އިން ޓިކެޓު ނެގި ފަހުން އެ އެއާލައިންގެ ދަތުރުތައް ރާއްޖެ އަށް މެދުކަނޑައިލުމުންނެވެ. އޭގެ ފަހުން ގަތަރު އެއާވޭސް އިން ޓިކެޓު ނެގި ފަހުން އެ އެއާލައިންގެ ދަތުރުތައް ވެސް، ކޮވިޑް-19 ގެ ސަބަބުން ވަގުތީ ގޮތުން މެދުކަނޑާލުމުން އެ މީހުންނަށް ގޮތް ހުސްވީ އެވެ.
އެ މީހުންގެ ތެރޭގައި ގިނައީ ޓޫރިސްޓުންނެވެ. ދެން ތިބީ އެކި ވޯކް ވިސާގައި ރާއްޖޭގައި ތިބި މީހުންނެވެ.
މި މީހުން ގޮވައިގެން ގައުމީ އެއާލައިން، މޯލްޑިވިއަން އިން ކުރާ ދަތުރުގައި އެންމެ ފުރަތަމަ ދާނީ މޮރިޝަސް އަށެވެ. މޮރިޝަސް އަށް 11 މީހުން ބޭލުމަށް ފަހު، ތެޔޮ އަޅައިގެން ދެން ފުރާނީ ސައުތު އެފްރިކާ އަށެވެ. ދަތުރަށް ފަހުން އެނބުރި ރާއްޖެ އަންނާނީ ވެސް މި މަގުންނެވެ.
މުހައްމަދު އަލީ ވިދާޅުވީ މޯލްޑިވިއަންގެ ފްލައިޓެއް ޗާޓަރުކޮށް، ސައުތު އެފްރިކާ އާއި މޮރިޝަސް މީހުން އަނބުރާ ފޮނުވައިލެވުނީ ތިން ހަފުތާއެއްހާ ދުވަހުގެ މަސައްކަތުން ކަމަށެވެ. އެކަމުގައި މޯލްޑިވިއަން އިން އެއްވެސް ފައިދާއެއް ނުނަގައި ދަތުރު ހަމަޖައްސައިދިންކަން އޭނާ ފާހަގަކުރެއްވި އެވެ.
"ފަސިންޖަރުންގެ މެދުގައި ޓިކެޓުގެ އަގު ހަމަޖައްސައިގެން ދަތުރުކުރީ. އެއީ ބައެއް މީހުންނަށް މާ ބޮޑު ހަރަދެއް ކުރެވެން ނެތީމަ، ވަކިން ގްރޫޕެއް ހަދައިގެން އެ މީހުން އަމިއްލައަށް ހަމަޖެއްސީ،" މުހައްމަދު އަލީ ވިދާޅުވި އެވެ.
އޭނާ ވިދާޅުވީ ސައުތު އެފްރިކާ މީހުން ގެންދެވޭނެ އިންތިޒާމް ހަމަޖެއްސުމަށް އެ ގައުމުގެ ސަރުކާރުން އެދުނު ކަމަށެވެ. އެހެންވެ އެމީހުން ފުރުވައިލެވޭނެ ގޮތެއް ބަލައި މޯލްޑިވިއަންއާ މަޝްވަރާކުރީ ކަމަށް ވިދާޅުވި އެވެ.
ދަތުރުތައް ކެންސަލްކުރިއިރު އެ މީހުން ތިބީ އެކި ރިސޯޓުތަކުގަ އެވެ. އެހެންވެ ދެމަފިރިއަކު ފިޔަވައި ބާކީ ތިބި އެންމެން އޮޅުވެލި ރިސޯޓަށް ބަދަލުކޮށް، އެ ތަނަށް ޓޫރިސްޓުންގެ އަތުން ދައްކަންޖެހޭ އަދަދު ވެސް ވަރަށް ބޮޑަށް ކުޑަކޮށްދިން ކަމަށް ވިދާޅުވި އެވެ.
ނުފުރި ރާއްޖޭގައި ތާށިވެފައި ތިއްބާ ސަރުކާރުން ކޮށްދިން ކަންތައްތަކުގެ ސަބަބުން ސައުތު އެފްރިކާ މީހުންގެ ހިތުގައި ރާއްޖެ އަށް ހާއްސަ ލޯތްބެއް އޮންނާނެ ކަމަށް ވިދާޅުވި އެވެ.
"އެ މީހުން ވަރަށް އުފަލުން ތިބީ ރާއްޖެ އިން ދިޔައިރު. މި ކަންތައްތަކުގެ ސަބަބުން ރާއްޖެއާ މެދު އެ މީހުން ވަރަށް ޕޮޒިޓިވްކޮށް ދެކޭނީ،" މުހައްމަދު އަލީ ވިދާޅުވި އެވެ.
މޯލްޑިވިއަން އިން އަންނަނީ އެހެން ގައުމުތަކުގައި ނާދެވިފައި ތިބި ދިވެހިން ގެންނަން ވެސް ދަތުރުތައް ކުރަމުންނެވެ. އަދި ކާގޯ ފްލައިޓްތައް ވެސް އަންނަނީ ބާއްވަމުންނެވެ.
