ވިޔަފާރި / ބޭންކް

އޭޝިޔާގެ ބޭންކްތައް ރިފޯމް ނުކުރުމަކީ ނަސީބެއް!

ަކޮވިޑް-19 އާ ގުޅިގެން ދިމާވެފައިވާ ދަތިތަކުން އަރައިގަތުމަށް އަޅާނެ ފިޔަވަޅުތައް ސަރުކާރުން ހާމަކުރައްވަނީ: (ކ-ވ) މާލިއްޔަތު ކޮމިޓީގެ މުގައްރިރު ނާޝިޒް، އެމްއެމްއޭގެ ގަވަރުނަރު އަލީ ހާޝިމް، ފިނޭންސް މިނިސްޓަރު އަމީރު އަދި އިކޮނޮމިކް މިނިސްޓަރު ފައްޔާޒް.---ފޮޓޯ: އަހުމަދު އަވްޝަން/މިހާރު

ސައުތު އޭޝިއާގެ ގައުމުތަކަށް ބަލާއިރު ބޭންކިން ދާއިރާގެ 40 ޕަސެންޓު ހިއްސާ އޮތީ ސަރުކާރުތަކުގެ ކޮންޓްރޯލް ދަށުގަ އެވެ. މިއީ މުޅި ދުނިޔެ އަށް ބެލިއަސް ގައުމުތަކުގެ ނިސްބަތުން ސަރުކާރުތައް ކޮންޓްރޯލު ކުރާ ބޭންކްތައް އެންމެ ގިނަ ސަރަހައްދެވެ. އެގޮތުން މި ސަރަހައްދުގެ އެންމެ ބޮޑު ގައުމު، އިންޑިއާ އިން އެ ގައުމުގެ ބޭންކިން ދާއިރާގެ 62 ޕަސެންޓް ކޮންޓްރޯލު ކުރެ އެވެ. ބޫޓާނުން 56 ޕަސެންޓް ކޮންޓްރޯލް ކުރާ އިރު ރާއްޖެ އާއި ސްރީލަންކާއިން ބޭންކިން ދާއިރާގެ 40 ޕަސެންޓް ކޮންޓްރޯލް ކުރެ އެވެ.

ޕަބްލިކް ބޭންކުތައް ނުވަތަ ސަރުކާރު ހިއްސާވާ ބޭންކްތަކުގެ ހިއްސާ މާލީ ދާއިރާގައި ބޮޑުވުމުގެ ސަބަބުން، ބޭންކުތަކުން އާންމުންނަށް ލޯނު ދިނުމުގައި އިޖްތިމާއީ މަންފާ އަށް އިސްކަން ދިނުމަށް ފުރުސަތު ބޮޑުވެ އެވެ. އަދި މާލީ އެހީ އެންމެ ބޮޑަށް ބޭނުންވެފައިވާ މީހުންނަށް އެހީތައް ލިބުމަށް ފުރުސަތު އޮވެ އެވެ. މިއީ ކޮވިޑް-19 ގެ ހާލަތުގައި ވެސް ކަންތައް ވާނެ ގޮތެވެ.

އެހެން ނަމަވެސް ގައުމެއްގައި އަމިއްލަ ބޭންކްތަކުގެ ހިއްސާ ބޮޑު ނަމަ، ބޭންކްތަކުން ލޯނު ދިނުމުގައި މާލީ ގޮތުން އެ މީހަކަށް ފައިސާ އަނބުރާ ދެއްކޭނެތޯ ބަލާނެ އެވެ. އަދި އެންމެ ބޮޑު އިސްކަމެއް ދޭނީ، އަމިއްލަ ފަރުދުންގެ މަސްލަހަތަށް ވުރެ ބޭންކްގެ މަސްލަހަތަށެވެ.

މި ސަރަހައްދުގެ ގައުމުތަކުގެ ބޭންކްތައް ކޮންޓްރޯލު ކުރުމުގައި ސަރުކާރުގެ ދައުރު ބޮޑުވުމުގެ ސަބަބުން، އިގްތިސާދީ ކާރިސާތަކުގައި ބޮޑު ނަސީބަކަށްވީ ނަމަވެސް ބޭންކިން ދާއިރާ މިގޮތަށް އޮތުމުގެ ސަބަބުން މާލީ ދާއިރާގެ ވާދަވެރިކަން ކުޑަވެ، މާލީ ދާއިރާ ކުރިއަރަން ހުރަސްތަކާ ކުރިމަތިވެ އެވެ.

ލޯނު ނުދެއްކުން އިތުރުވޭ

ސައުތު އޭޝިއާގެ ގައުމުތަކުގެ ބޭންކިން ދާއިރާގައި ލޯނަށް އަނބުރާ ފައިސާ ނުދައްކާ ރޭޓް، އެއް އަހަރުން އަނެއް އަހަރަށް ދަނީ އިތުރުވަމުންނެވެ. މީގެ ތެރެއިން ވެސް ލޯނު ނުދައްކާ ރޭޓު އެންމެ ބޮޑީ ސަރުކާރު ހިއްސާވާ ބޭންކްތަކުގަ އެވެ. މިކަމުގެ ސަބަބުން އަމިއްލަ ބޭންކްތަކަށް ވުރެ ޕަބްލިކް ބޭންތަކަށް ލިބޭ ފައިދާ ވެސް ކުޑަވެ އެވެ. މި ސަރަހައްދުގެ ގިނަ ގައުމުތަކުގެ ޕަބްލިކް ބޭންކްތައް ހިންގަނީ ގެއްލުމުގަ އެވެ.

ފިނޭންސް މިނިސްޓަރު (ކ) އާއި ބީއެމްއެލްގެ ސީއީއޯ އަދި އެމްޑީ (ވ) ބިޒްނަސް ސެންޓާ ހުޅުއްވައިދެއްވަނީ-- ފޮޓޯ: ބީއެމްއެލް

ސަރުކާރު ހިންގަން ބަރޯސާ ވަނީ ބޭންކްތަކަށް

މި ސަރަހައްދުގެ ބޭންކްތަކުގައި ސަރުކާރުގެ ބޮޑު ހިއްސާއެއް އޮތުމުގެ ސަބަބުން، އެ ބޭންކްތަކުގެ އެންމެ ބޮޑު ފައިދާ ވެސް ހޯދަނީ ސަރުކާރުތަކުންނެވެ. އާންމުންގެ ދިރިއުޅުމުގެ ކަންކަން ހަމަޖެއްސުމަށް ކޭޝް ފްލޯ ތާށިވާ ކޮންމެ ދަނޑިވަޅެއްގައި ދަނީ ބޭންކްތަކަށެވެ. މިހެން ހެދުމުގެ ސަބަބުން، އަމިއްލަ ވިޔަފާރިތައް ކުރިއެރުމަށް ބޭންކްތަކުން ދޫކުރަން ހުންނަ ފައިސާ މަދުވެ އެވެ. އަދި ވިޔަފާރިތައް ކުރިއަރުވަން އޮންނަ ފުރުސަތު ކުޑަވެގެންދެ އެވެ.

ޕާކިސްތާނުގައި ބޭންކްތަކުން ޕްރައިވެޓް ސެކްޓަރަށް ދޫކުރާ ލޯނުގެ އަދަދު މިދިޔަ 11 އަހަރު ތެރޭ ވަނީ 29 ޕަސެންޓުން 15 ޕަސެންޓަށް ވެއްޓިފަ އެވެ. މި މުއްދަތުގައި ސަރުކާރުގެ އެތެރޭގެ ދަރަނި ވަނީ 30 ޕަސެންޓުން 54 ޕަސެންޓަށް އިތުރުވެފަ އެވެ.

ސަރުކާރު ބޭންކްތައް ސިޔާސީ ހަބަކަށް

ވޯލްޑް ބޭންކުން ހާމަކޮށްފައިވާ ގޮތުގައި ސަރުކާރު ހިއްސާވާ ބޭންކްތައް ގިނަވުމުގެ ސަބަބުން ސިޔާސީ މީހުންނަށް އެމީހުންގެ އަމިއްލަ އެޖެންޑާތައް އިސްކޮށް، އަމިއްލަ މަންފާ ހާސިލު ކުރުމަށްޓަކައި ބޭންކްތައް މެދުވެރިކޮށް މަސައްކަތް ކުރުމުގެ ފުރުސަތު ބޮޑުވެ އެވެ.

މި ސަރަހައްދުގެ ގިނަ އިކޮނޮމިސްޓުން ގަބޫލު ކުރާ ގޮތުގައި ސައުތު އޭޝިއާގެ ޕަބްލިކް ބޭންކްތަކުގެ ތެރެއިން އުމްރާނީ އަދި އިޖްތިމާއީ ތަރައްގީގެ ހަރަކާތްތައް ވަކި އިތުރެއް ނުވެ އެވެ. އަދި ޕަބްލިކް ބޭންކްތައް މެދުވެރިކޮށް ޕޮލިޓީޝަނުން އެ މީހުންގެ އަމިއްލަ ވިޔަފާރިތައް ކުރިއަރުވަން ބޭނުންވާ ފައިސާ ހޯދާ ކަމަށް މި ސަރަހައްދުގެ ގިނަ އިކޮނޮމިސްޓުން ދެކެ އެވެ.

ބީއެމްއެލުން ބޭއްވި ޕްރެސް ކޮންފަރެންސެއްގައި. ސަރުކާރުން ބީއެމްއެލްގެ 62 ޕަސެންޓް ހިއްސާވޭ

މިކަންކަން އެންމެ ބޮޑަށް ފާހަގަ ވަނީ ސަރަހައްދުގެ ގައުމުތަކުގެ ތަފާސްހިސާބުތަކުންނެވެ. އިންޑިއާގައި ކޮންމެ އިންތިހާބުތަކާ ދިމާކޮށް ދަނޑުވެރިންނަށް ލޯނު ދޫކުރާ ވަރު އިތުރުވެ އެވެ. އެއްވެސް ޕްލޭނެއް ނެތި ސިޔާސީ ބޭނުންތަކަށް ދަނޑުވެރިންނަށް ލޯނު ކުރުމުގެ ސަބަބުން އެކަމުންވާ ފައިދާ އަށް ވުރެ އިގްތިސާދަށް ވަނީ ގެއްލުމެވެ. އިންޑިއާގެ އިތުރުން ޕާކިސްތާނުގައި ސިޔާސީ ނުފޫޒު އޮތް ބޮޑެތި ކުންފުނިތަކަށް ޕަބްލިކް ބޭންކްތަކުން އާދަޔާ ހިލާފަށް ލޯނު ދޫކޮށް، އެ ލޯނު ނުދައްކާ ހުންނަ ކަން ވެސް ވަނީ ފާހަގަކުރެވިފ

ދާދި ފަހުން ޕަބްލިކް ބޭންކްތައް މެދުވެރިކޮށް ބަންގްލަދޭޝްގައި ވަނީ ލޯނު ސްކޭމްތަކެއްގެ މައްސަލަ ފެންމަތި ވެފަ އެވެ.

މިފަދަ ސަބަބުތަކަށްޓަކައި މި ދާއިރާ ވަރަށް ބޮޑަށް ރީފޯމްކޮށް، "ބެސްޓް ޕްރެކްޓިސް"ތަކަށް ރުޖޫއަ ވާން ޖެހޭ ކަމަށް ވޯލްޑް ބޭންކުން ދެކެ އެވެ. އެހެން ނަމަވެސް، ތަރައްގީ ވަމުން އަންނަ ގައުމުތައް ހިމެނޭ ސައުތު އޭޝިއާގެ ގައުމުތަކަށް ކޮވިޑް-19 ފަދަ ހާލަތެއްގައި ބޭންކްތައް ސަރުކާރުގެ ކޮންޓްރޯލު ދަށުގައި އޮތުން މިވަނީ ބޮޑު ނަސީބަކަށްވެފަ އެވެ.

އިގްތިސާދު ހަމަ މަގަށް އަޅުވަން ޕަބްލިކް ބޭންކްތަކުގެ ރޯލު ބޮޑު

ފާއިތުވެދިޔަ 15 ވަރަކަށް އަހަރުގެ ތެރޭގައި ޕަބްލިކް ބޭންކްތަކުން އެންމެ ބޮޑަށް މަސައްކަތް ކުރީ މާލީ ހާލަތު ހަމަ މަގަށް އެޅުވުމަށެވެ. ފަހުގެ ތާރީހެއްގައި ޕަބްލިކް ބޭންކްތަކުގެ ދައުރު އެންމެ ބޮޑަށް ފެނުނީ "ގްލޯބަލް ފައިނޭޝަލް ކްރައިސިސް" ދުވަސްވަރު އެވެ. އެ ހާލަތުގައި ވެސް އިންޑިއާގެ ބޭންކްތަކުން އާންމުންނަށް ލޯނު ދޫކުރުމަކަށް ހުއްޓުމެއް ނާދެ އެވެ. އެހެން ނަމަވެސް އަމިއްލަ ބޭންކްތަކުން ލޯނު ދޫކުރުން ހުއްޓުމަކަށް ގެނަ އެވެ. ނަތީޖާއަކަށްވީ ޕަބްލިކް ބޭންކްތައް އިތުރަށް ކުރިއަރައިގެން ދިއުމެވެ.

އިންޑިއާގެ އެކްސްޕޯޓަރުންގެ ތެރެއިން ޕަބްލިކް ބޭންކްތަކާ ގުޅިފައިވާ ކުންފުނިތަކަށް ފައިނޭޝަލް ކްރައިސިސްގައި އެއްވެސް ގެއްލުމަކާ ކުރިމަތި ނުވި އިރު ޕްރައިވެޓް ބޭންކްތަކާ ގުޅިފައިވާ އެކްސްޕޯޓަރުންގެ އާމްދަނީ ގާތްގަނޑަކަށް އަށް ޕަސެންޓް ދަށްވި އެވެ. އިންޑިއާގެ ގިނަ އެކްސްޕޯޓަރުން ޕަބްލިކް ބޭންކްތަކަށް ބަރޯސާވެފައި އޮތުމުން އެފަހަރު އިގްތިސާދަށް އެންމެ ކުޑަ އަސަރެއް ކުރީ އިންޑިއާއަށެވެ.

އިގްތިސާދީ ލޮޅުންތައް ކުރިމަތިވާ ހާލަތުގައި އަމިއްލަ ރައްކާތެރިކަން ހޯދުމަށްޓަކައި އާންމުން ވެސް ޕްރައިވެޓް ބޭންކްތަކުގެ ބަދަލުގައި ފައިސާ ޖަމާ ކުރަނީ ޕަބްލިކް ބޭންތަކަށެވެ.

އިގްތިސާދު ކުރިއަރުވަން ބޮޑު އެހީއެއް

ޕަބްލިކް ބޭންކުތައް މެދުވެރިކޮށް، މާލީ ގޮތުން މުޖުތަމައުގެ ބައިވެރިވުން އިތުރު ކުރުމަށް ވަރަށް ބޮޑަށް އެހީތެރިވެ އެވެ. އަދި އާންމުންގެ މާލީ ގާބިލުކަމާއި ފުދުންތެރިކަން އިތުރު ކުރަން ވެސް އެހީތެރިވެ އެވެ. އިންޑިއާ އިން ކުރިއަށް ގެންދިޔަ "ފައިނޭންޝަލް އިންކްލޫޝަން ޕްރޮގްރާމު"ގެ ދަށުން 255 މިލިއަން އާ ބޭންކް އެކައުންޓްތައް ހުޅުވުނެވެ. އެހެންވެ ދަނޑުވެރިކަމާއި ކުދި ވިޔަފާރިތަކަށް ބޭނުންވާ ލޯނުތައް ދިނުން އިތުރުވި އެވެ. ބަންގްލަދޭޝް ފަދަ ގައުމުތަކުގެ ފަގީރުކަން ކުޑަ ކުރުމަށް މިފަދަ ކުދި ލޯނުތަކުން އެހީތެރިވި އެވެ.

5 ކޮމެންޓް, 9 ރިއެކްޝަންސް

icon happy icon happy 22%
icon sad icon sad 0%
icon angry icon angry 78%
icon wow icon wow 0%
icon inlove icon inlove 0%
The name is already taken The name is available. Register?

ކޮމެންޓްތައް

އެންމެ ފަސް މަގުބޫލް

ޕްރޮޕެގެންޑާ

13 April 2020

"ވޯލްޑް ބޭންކުން ހާމަކޮށްފައިވާ ގޮތުގައި ސަރުކާރު ހިއްސާވާ ބޭންކްތައް ގިނަވުމުގެ ސަބަބުން ސިޔާސީ މީހުންނަށް އެމީހުންގެ އަމިއްލަ އެޖެންޑާތައް އިސްކޮށް، އަމިއްލަ މަންފާ ހާސިލު ކުރުމަށްޓަކައި ބޭންކްތައް މެދުވެރިކޮށް މަސައްކަތް ކުރުމުގެ ފުރުސަތު ބޮޑުވެ އެވެ." ޕްރައިވެޓް ބޭންކުތަކުންވެސް ހަމަ އެބައެއްގެ އެޖެންޑާ ކުރިއަރުވާނީ. މިސާލަކަށް އެމެރިކާގެ ގިނަ ބޭންކުތައް ކޮންޓްރޯލްކުރާ މީހުންނާ އެތާގެ ހުރިހާ ސަރުކާރުތައް އެމީހުންގެ ދަށުވެފަ ތިބޭވަރު ބަލާ.

The name is already taken The name is available. Register?

އޮނަރަބްލް އަފީފު ދީދީ

13 April 2020

%80 ބެންކް އެކައުންޓްގެންގުޅޭ 1.342ބ އާބާދީއޮތް އިންޑިޔާގައި މީގެ 126 އަހަރުކުރިންއުފެދުނު ޕީއެންބީ އަދި 24 ހާސް ބްރާންޗްހުރި އެސްބީއައި ހިމެނޭގޮތުން ޑަޒަނެއްހާ ބެންކްގެ ބޮޑު ޝެއަރ ދައުލަތަށް އޮތްކަމުގައިވިޔަސް މިއަދަދާއި ނުބައްދަލަށް ދައުލަތުގެ ޙިއްސާނެތް ޕަބްލިކް ބެންކާއި ޕްރައިވެޓް ބެންކްތައް އިންޑިޔާގައި އެބަހުރި. # އެކަމަކު ހަދާނުގައި ބަހައްޓާންވީ މިއިން އެއްވެސް ބޭންކަކަށް ސެންޓްރަލް ބެންކާއި މާލީ ޤާނޫނުގެ މައްޗަށް ބާރު ނުފޯރުވޭނެކަން.

The name is already taken The name is available. Register?

އޮނަރަބްލް އަފީފު ދީދީ

13 April 2020

ލިއުންތެރިޔާ ލިޔުން ލިޔެފައިވާ މަޤުސަދަކީ ކޮބާ؟ ސއ ގެ ބެންކިންގެ %40 ސަރުކާރުގައި އޮތްކަމަށް ބުނެފައިވަނީ ކޮންގޮތަކަށް ކޮބާ މައުލޫމާތު ހޯދިގޮތް؟ # އިޤްތިސޯދީ މިފަދަ ލިއުމުގެ ސައްޙަކަން ޔަޤީންކޮށްދިނުމަށް މައުލޫމާތުހޯއްދެވިގޮތް ހާމަކުރާންޖެހޭ. އަދި ލިއުމުގައި ބޭނުންކުރާ ބަސްބަހުގެ މާނަ ދަތިކަމެއްނެތި ހާމަވާންވާނެ. މިސާލަކަށް ލިއުމުގައި "މި ސަރަހައްދު" އޮތުމުން ސަރަހައްދުގެ މާނަ އިގޭގޮތެއްނުވޭ؟ ސާކް ކަމެއް މުޅި އޭޝިޔާ ބައްރު ކަމެއްނޭގޭ.

The name is already taken The name is available. Register?

ޖޯކުނުޖަހ

13 April 2020

ބެންކް ކޮންޓްރޯލް އޮންނަކަމަށް ބުނާއިރު އެއްވެސް ބޮޑު ރިސޯޓް މަހުޖަނެއް ޒަމާނުއްސުރެ އެއްވެސް ޖަމާނުކުރޭ މިރަށުގައި. ސަރުކާރު ކޮން ކޮންޓްރޯލެއް. ރާއްޖޭއަށް ﷲ ދެއްވި ގުދުރަތީ މުއްސަނދި ކަމުގެ ފައިދާ ޒަމާނުއްސުރެ ނަގަންދީފަ ބާއްވަނީ އެމީހުންނަށް ސަރުކާރުން. ދުނިޔޭގެ ކޮން ގައުމެއްގައި މިހުރިހާ ޑޮލަރެއް ރާސްޓަސް މިލިޔަނުން ބޭރަށް ދާން ފުރުސަތު ދޭނީ.

The name is already taken The name is available. Register?

ޔޫފައިގޫ

13 April 2020

މިވެސް އިގްސޯދީ މާހިރުންނޯ. އެމެރިކާ އަދި ޔޫރަޕްގައި ބޭންކުން ނޫނަސް ސަރުކާރުން ބެއިލް އައުކުރޭ ތިއަށްތުރެ ފުޅާކޮށް.

The name is already taken The name is available. Register?

އިތުރު ލިޔުންތައް

މަގްބޫލް ލިޔުންތައް

Daily News Digest

Deliver popular news headlines to your inbox!

Subscribe

Download Mihaaru News App

Offline Alerts

SMS 'sub mihaaru' to 5454