ކޮވިޑް-19އިގައި މަރުވި ފުރަތަމަ މީހާ ހިނަވައި ވަޅުލުމުގައި ބައިވެރިވި އެމްއެންޑީއެފްގެ މީހުން: މިއީ ހިތްދަތި، އުނދަގޫ ތަޖުރިބާއެއް
30 އެޕްރީލް 2020 - 13:04
25 comments
ހަލުވި ކަމާއެކު މިހާރު ފެތުރެމުންދާ ކޮވިޑް-19ގައި މީހަކު މަރުވެއްޖެ ނަމަ، އަމަލު ކުރަންވީ ގޮތް ކިޔައިދީ އެކަމަށް ސިފައިން ވަނީ ތަމްރީނުކޮށްފަ އެވެ. އެކަމަކު އެ ބަލީގައި ފުރަތަމަ ފަހަރަށް ރޭ މީހަކު މަރުވި އިރު، މިއީ އެހާ ހިތްދަތި ތަޖުރިބާއަކަށް ވާނެ ކަމަކަށް އެކަކު ވެސް ހިއެއް ނުކުރެ އެވެ. އެކަމަށް ތައްޔާރުވި ސިފައިންގެ މީހުން ވެސް އެކަން ސިފަކުރީ ދުވަހަކު ވެސް އުއްމީދު ނުކުރާ، ބިރުވެރިކަމެއްގެ ގޮތުގަ އެވެ.
ކޮވިޑް-19ގައި ރޭ މަރުވީ އުމުރުން 83 އަހަރުގެ އައިމިނަތު އާދަމް އެވެ. އެއީ އެމްއެޗުއޭގެ ވެރިޔާ ހުސެން އަބްދުﷲގެ އަނބިކަނބަލުންނެވެ. އެކަމަކު، ބަލީގެ ނުރައްކާތެރިކަމާ ހެދި، އައިމިނަތު ވަޅުލީ މޫނު ދެއްކުމެއް، ބޮޑު ޖަނާޒާއެއް ނެތި އެވެ. އޭނާ ހިނެވީ ވެސް އަދި ވަޅުލީ ވެސް އެކަމަށް ހާއްސަކޮށްފައި ތިބި ސިފައިންގެ މީހުންނެވެ. އެ އެންމެން ވެސް ތިބީ ރައްކާތެރިކަމުގެ ހެދުންލައި، އެއްކޮށް ނިވާކޮށްގެންނެވެ.
"މި ކަހަލަ ހާލަތަކަށް އަޅުގަނޑުމެން މި ތިބީ ތައްޔާރުވެގެން. ފިޒިކަލީ އަދި މެންޓަލީ ވެސް. އެކަމަކު އަމަލީ މަސައްކަތަށް ނިކުމެ، މި ފަދަ ގޮތަކަށް މީހަކު ހިނަވައި ވަޅުލުމަކީ ހަގީގަތުގައި ވެސް ވަރަށް ހިތްދަތިވި ކަމެއް،" އެކަމުގައި ބައިވެރިވި ސިފައިންގެ މީހަކު، ނަން ހާމަ ނުކުރުމަށް އެދި ބުންޏެވެ.
Yesterday we had so many positive cases @MNDF_Official but last night our TROOPS were there to bury our 1st #COVID related death. MEN WOMEN alike in uniform they stand, BRAVELY doing what the NATION asks of them. Today with tears of SORROW but with PRIDE, we SALUTE YOU🙏 pic.twitter.com/5CoUUkBP1d
— Mariya Didi 🎈 (@MariyaDidi) April 30, 2020
އެ ތަޖުރިބާއާ ގުޅޭގޮތުން ވާހަކަ ދައްކާކަށް އޭނާ އަށް ފަސޭހައެއް ނުވި އެވެ. ދެން ބުނިހާ ވެސް އެއްޗަކީ މިއީ އެއްވެސް މީހަކު އެދޭނެ ގޮތެއް ނޫން ކަމަށާއި އެހެންވެ، އެންމެން ވެސް ރައްކާތެރިވެ ތިބުމަށެވެ.
ސިފައިން ބިރުވެރިކަމުގައި، އެކަމަކު ކުރިއަށް ނެރުނީ ގައުމު
ރާއްޖެ މިހާރު މިއޮތީ މިފަހަކުން ދުވަހަކު ވެސް ތަހައްމަލު ނުކުރާހާ ދަތިހާލުގައި، ބިރުވެރިކަމެއްގަ އެވެ. ހުރިހާ މަސައްކަތްތަކެއް ހުއްޓާލައި، އެންމެން ކަހަލަ ގޮތަކަށް ގޭގައި ބަންދުވެފަ އެވެ. އެކަމަކު ސިފައިންނަށް އެ ފުރުސަތެއް ނެތެވެ. ގައުމީ ހިދުމަތުގައި ގިނަ ސިފައިން މަސައްކަތަށް ނުކުންނަން ޖެހިފައިވާއިރު، މި ބަލިމަޑުކަމުގައި މިހާރު އެންމެ ބޮޑަށް ނުރައްކަލަށް ހުށަހެޅިފައި ތިބީ ވެސް އެ މީހުންނެވެ.
މާލެ އިން ކޮވިޑް-19 އަށް އެންމެ ފުރަތަމަ ޕޮޒިޓިވްވި މީހާ ފެނުނު ފަހުން މިއަދަދަށް 15 ދުވަސްވެފައިވާއިރު އޭގެ ތެރޭގައި ނިސްބަތުން ސިފައިން ގިނަ އެވެ. މީގެ ތިން ދުވަސް ކުރިން، ފަސް ސިފައިންގެ މީހަކު އެ ބައްޔަށް ޕޮޒިޓިވް ވިއިރު، އިއްޔެ އެކަނި ވެސް 15 ސިފައިން ޕޮޒިޓިވްވި އެވެ. އެ ބިރުވެރިކަމުގައި ތިއްބާ ރޭ އެ މީހުންނަށް ޖެހުނީ، ކޮވިޑް-19 ޖެހިގެން ރާއްޖޭން އެންމެ ފުރަތަމަ މަރުވި މީހާ ވަޅުލާށެވެ.
ކޮވިޑް-19އިގައި މަރުވި ފުރަތަމަ މީހާ ހިނަވައި ވަޅުލުމުގައި ބައިވެރިވި އެމްއެންޑީއެފްގެ މީހުން: މިއީ ހިތްދަތި، އުނދަގޫ ތަޖުރިބާއެއް
ޑިފެންސް މިނިސްޓަރު މާރިޔާ އަހުމަދު ދީދީ މިކަން ފާހަގަކުރެއްވީ ކަރުނައާ އެކުގަ އެވެ. އޭނާ ވިދާޅުވި ގޮތުގައި ކިތަންމެ ބިރުވެރި އަދި ހިތާމަވެރި ވަގުތެއް ނަމަވެސް، ސިފައިން އެކަމާ ކުރިމަތިލީ، އެއް ޔުނީފޯމެއްގައި ތިބެގެން ހިތްވަރާއެކުގަ އެވެ. އެއީ ގައުމު އެމީހުންނަށް މަތިކުރި ވާޖިބެވެ.
"އެހެންވެ، ހިތާމައިގެ ކަރުނަ އަޅާ ހާލު އަޅުގަނޑު ދިވެހި ސިފައިންނަށް ސެލިއުޓް ކުރަން،" މާރިޔާ ކުރެއްވި ޓްވީޓެއްގައި ވިދާޅުވި އެވެ.
ޗީފް އޮފް ޑިފެންސް ފޯސް އަބްދުﷲ ޝަމާލް ވެސް ވަނީ މި ހިތްދަތި ވަގުތު، ސިފައިން ދައްކަމުން އަންނަ ސާބިތުކަމަށް ތައުރީފް ކުރައްވައިފަ އެވެ. އަދި ރޭ މަރުވި މީހާ ވަޅުލުމުގައި ބައިވެރިވި އެމްއެންޑީއެފްގެ ޖަމާއަތްތެރިންނަށް ވެސް އޭނާ ޝުކުރު އަދާކުރެއްވި އެވެ.
އޭނާ ވިދާޅުވީ ކުރީ ސަފުގައި މަސައްކަތްކުރާ ސިފައިންގެ ތެރޭގައި ބަލި ފެތުރި، ޕޮޒިޓިވްވާ މީހުންގެ އަދަދު އިތުރުވަމުން ދިޔަ ނަމަވެސް، ސިފައިންގެ ހިތްވަރަށް ބަދަލު ނާންނަ ކަމަށެވެ. އަދި ބިރުވެރިކަމުގައި ފަހަތަށް ނުޖެހި، ބަލިމަޑުކަމާ ކުރިމަތިލާނެ ކަމުގެ ޔަގީންކަން ޝަމާލް ދިވެހިންނަށް ދެއްވި އެވެ.
ސިފައިންގެ ތެރެއިން ބަލި ފެނުނީ މީގެ ތިން ދުވަސް ކުރިންނެވެ. ފުރަތަމަ ފަސް މީހުން ޕޮޒިޓިވްވުމާއެކު އެ މީހުންނާ ގުޅުން ހުރި ގިނަ ބަޔަކު ވަނީ އައިސޮލޭޓްކޮށްފަ އެވެ. އެކަމަކު އަދަދެއް އަދި ނޭނގެ އެވެ.
I salute the brave, female MNDF jamaitherin who performed the last rites.
— Chief of Defence Force MG.Abdulla Shamaal (@CDFofMNDF) April 29, 2020
Despite the tragic news & though the number of MNDF frontline workers testing positive keeps increasing, the Maldivian people can rest assured that we will not falter & that we will fight COVID-19 head on. pic.twitter.com/OLR5H5gDde
ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ކާނަލް ހުސައިން އަލީ ވިދާޅުވީ މިއީ ކުރިމަތިވާނެ ހާލަތެއްކަން އެނގޭ ކަމަށާއި ސިފައިންގެ ލީޑަޝިޕް އޮތީ އެކަމަށް ތައްޔާރުވެފައި ކަމަށެވެ. އަދި ކަރަންޓީނު ކުރާ ސިފައިން ވެސް އެނބުރި އަންނާނީ ހިދުމަތަށް ކަމަށް އޭނާ ވިދާޅުވެފައި ވެ އެވެ.
ކޮވިޑް-19 ފެތުރޭތީ ކުރާ މަސައްކަތްތަކުގެ ތެރެއިން ސިފައިން ކުރަމުން އަންނަ މުހިއްމު އެއް މަސައްކަތަކީ ކަރަންޓީން ފެސިލިޓީތައް މެނޭޖްކުރުމާއި އާ ފެސިލިޓީތައް ގާއިމް ކުރުމެވެ. އެގޮތުން ފަރުކޮޅުފުށި އައިސޮލޭޝަން ފެސިލިޓީ ގާއިމްކުރުމުގައި ވެސް ސިފައިން ބޮޑެތި މަސައްކަތްތަކެއް ކުރި އެވެ. އޭގެ އިތުރުން، މުދާ ޑެލިވަރީ ކުރުމާއި މީހުން އެއްތަނުން އަނެއް ތަނަށް ގެންދިޔުމުގައި ވެސް ސިފައިން އަމަލީ ގޮތުން ބައިވެރިވި އެވެ. މީގެ ތެރެއިން ގިނަ ސިފައިން ގެއަށް ނުވަންނަތާ މަހެއްހާ ދުވަސް ވެއްޖެ އެވެ.
"މިއީ އަހަރުމެން ދުވަހަކު ވެސް ހިތަށް ނުގެނެވޭނެ ފަދަ ވަގުތެއް. ސިފައިން ކުރާ މަސައްކަތް ބަލައިގަންނަން." މީހަކު ޓްވިޓާގައި ލިޔުނެވެ.
"ޝުކުރިއްޔާ"
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މަޒް
03 May 2020
ދިވެހި ސިފައިނގެ ހިއްވަރަށް ހަމަ ސާބަސް.. ކޮންމެ ކަމަކަށް ކޮންމެ ހާލަތަކަށް ތައްޔަރުވާ ހަމަ އެކަނި މުއައްސަސާ.. އެހެން މުއައްސަސާތަކަށް ބުނި ބަދު ބަހެއް ނޫން.. އެކަމަކު މީ ހަމަ ވަރަށް ބޮދު ތެދެއް
ރީތި މޫސަ
01 May 2020
ސިފައިންނަކީ ހިތްވަރުގަދަ ރައްޔިތުންދެކެ ލޯބިވާބަޔެއް އެމީހުންގެ އަގުވައްޓާލި މީހުން މިޔަދު ވަރަށްލަދުގަންނާނެ މިޔަދުގެ ސަރުކާރު ފެއިލްވިޔަނުދީ އެކުރާހިތްވަރުން
ޢައުލާބީ
30 April 2020
ޒަމާނީ ޓެކްނޮލަޖީގެ އެހީގައި އާއިލާ އަށް މޫނު ދެއްކެން ވާނޭ.
ގުރޯސަރީ
30 April 2020
ތާރީހަށް ބަލާއިރުވެސް ސިފައިންނަކީ އަބަދުވެސް މާލޭގެ އެކި ގޭގޭމީހުންގެ ގައުމީ ކަންކަމުގައި ވަރަށްގާތުން ބޮޑެތި އެހީތައް ވަމުން އައިބައެއް. އެމީހުން އުފެދިގެން އައީވެސް މާލޭމީހުން ރަށުތެރޭ ކުރަންހުންނަ ކުދިކުދި ކަންކަމުގަ އަތްގާތްކުރަން. މިފަހަކަށްއައިސް މާލެނޫން ދެތިން ރަށެއްގަވެސް އުޅޭތަން ފެނޭ.
އަހަނ
30 April 2020
މާރިޔާ ސިފައިންނަށް ތައުރީފް ކުރީމާ ވަރަށް ރުޅި ގަދަވޭ އަދި އެހާމެ ދެރަވޭ. މާރިޔާމެން މިޤައުމުގެ ސިފައިންނާ ފުލުހުންގެ އަގު ވައްޓާލަ ޤާނުނު އަސާސީއަށް ކޮޅުފައިން އަރާ ލަދެއް ނުގަނޭތަ
ރައްޔިތުު
30 April 2020
މިއަދު އެމީހުންނަށް (ސިފައިނާއި ފުލުހުންނަށް ސަނާކިޔާނެއެވެ) މާދަމާވެސް އެއްވުމެއް ރޫޅާލަން ނުކުންނަ އިރަށް ނުބައި ނުލަފާ ބަޔަކު ނުތިބޭނެއެވެ. ރާއްޖޭގެ ބައެއް ޗެނަލްތަކުން ސިފައިންނާއި ފުލުހުން އެއްވުން ރޫޅާލަން ރައްޔިތުންނާއި ކުރިމަތިލާ މަންޒަރު ރިޕީޓުކޮށް އިސްތިހާރެއް ދައްކާހެން ދައްކައެވެ. މިއިން އަޅުގަނޑުމެންގެ ކުޑަކުދިން ސިފައިންނާއި ފުލުހުންނަށް ނަފްރަތު އުފެދި މުސްތަގުބަލުގައި އެތަންތަނުގައި މަސައްކަތް ކުރަން ނުކުންނަ ހިތްކެނޑޭނެއެވެ.
124234
30 April 2020
ޢަމަލީ މައިދާނުގަ ސިފައިގެގޭގަތިބި ޖޫނިއާ ކުދިން ދައްކާ ހިތްވަރަށް ސާބަސް. ބޮޑެތި ކުލަބަރިޔާ ތަރިތަކާ ޔުނިފޯމުގަ ޖަހައިގެން އެއްބަޔަކު ފިނިކޮޓަރީގަ ފޮނިކޮޅުބޯލަން.
މަޒް
03 May 2020
ބަލަ އެއީ އެކަން ވާގޮތޭ.. އަލީބާބާ ގެ އޯނަރު ނީންނާނެ ކޮމްޕިއުޓަރު ދޮށުގަ އޯޑަރު ނަގާކަށް.. ހުރިހާ ތަނެއްގެވެސް އާދަ އެއީ
ފަރުދުން
30 April 2020
ކިތަންމެ މޮޅު ނިޒާމެއް އޮތަސް ކުރާނެ ފާއިދާއެއް ނެތް ފަރުދީ ޒިންމާ އަދާ ނުކުރެވެންޏާ. ބާޒާރު މަތީ އުޅެފައި އެތައް ބަޔަކާ ކޮންޓެކްޓުވެފައި ގެއަށް އައިސް ވަންނައިރު ރިސްކު އޮންނާނެ ގޭގެ އެންމެންނަށް. ވަކިން ހާއްސަކޮށް ގޭގައި އުޅޭ މުސްކުޅިންނަށް. އެތައް ފަހަރަކު ޑރ. ޕްރެސްތަކަށް އަރާ ބުނެފި ބަލި ބޮޑުވަނީ ޕޮޒިޓިވްވާ މީހުންގެ ތެރެއިން 20 އިންސައްތަ މީހުންނޭ، އެއީ މުސްކުޅިންނާ މެޑިކަލް ކޮންޑިޝަން ހުންނަ މީހުންނޭ. އެހެންވީމަ ވިސްނާ ކަތުން
ފިރުޝާން
30 April 2020
އަދިވެސް ނުވޭތޯ މަޖިލީހުގެ މުސާރަ 30ހާހަށް ކުޑަކުރަން.. އިންގިރޭސިވިލާތަށް ވުރެން ބޮޑު.. މިފައިސާ މިހޯދަނީ ދަރަޏަށް ނަގައިގެން.. ޓީ.ބިލް ވިއްކުމަކީ ދަރަނި ނެގުން. ހެޔޮނުވާނެ ލޯންނަގައިގެން މިހާބޮޑު މުސާރަ ދޭކަށް..އެހެން ނޫނަސް ކޮސްގޮވާ ގެއަކަށް މިތަނަކީ އެއްވެސް މަންފާއެއް ކުރާތަނެއް ނޫން ޢީބަ ބުނުމާއި ހަޑިއެއްޗެއްހި ކިއުން ނޫންނަމަ، ކެއުމުގެ ނަމުގަިއ އެކުރާ ބޮޑު ޚަރަދު މިވެސް ހުއްޓާލަން ޖެހޭ ދައުލަތުގެ އެހެން އޮފީސްތަކުގައިވެސް ކެއުމެއް ނުދޭ.
ގެރިގާ
30 April 2020
މައްޔިތާއަށް ފާފަ ފުއްސަވައި ހެޔޮ ރަޙުމަތް ލައްވާށި. އާއިލާއަށް ކެތްތެރިކަން ދެއްވާށި. ސިފައިންނަށް ހިތްވަރާއި ކެތްތެރިކަން ދެއްވާށި. ބަލިވި ހުރިހާ އެންމެނަށް އަވަސް ޝިފާއެއް މިންވަރުކުރައްވާށި. ދިވެހިންނަށް ހެޔޮވިސްނުން ދެއްވާށި.