ކޮވިޑްގެ ބަލިމީހުންނަށް ފަރުވާދޭ މަރުކަޒެއްގައި ސިއްހީ ހިދުމަތްތެރިން ހަރަކާތްތެރިވަނީ. ރާއްޖޭގައި ކޮވިޑް ޖެހޭ މީހުންގެ އަދަދު މިހާރު ވަނީ އަނެއްކާވެސް ދަށްވެފައި
14 ނޮވެމްބަރ 2020 - 00:33
މިދިޔަ 24 ގަޑިއިރުގެ ތެރޭގައި ރާއްޖެއިން ކޮވިޑް-19 އަށް އަލަށް ޕޮޒިޓިވްވި މީހުންގެ އަދަދު 30 އަށް ވުރެ ދަށުގައި މިއަދު ވެސް ހިފެހެއްޓިއްޖެ އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ އިއްޔެގެ ހަވީރު 6:00 އިން މިއަދު ހަވީރު 6:00 އާ ދެމެދު ރާއްޖެއިން އެބައްޔަށް އަލަށް ޕޮޒިޓިވްވީ 27 މީހުން ކަމަށެވެ. އޭގެކުރީ ދުވަހު ކޮވިޑަށް ޕޮޒިޓިވްވީ 26 މީހުންނެވެ.
މި މަސް ފެށުނީއްސުރެ މިހާތަނަށް ކޮވިޑް ކޭސްތަކުގެ އަދަދުތައް ވަރަށް މަދު ދުވަހެއްގައި ނޫނީ މުޅިން ވެސް ހުރީ 30 އަށް ވުރެ ދަށުގަ އެވެ. އެގޮތުން މިދިޔަ ބުދަދުވަހު 29 ކޭސް ފެނުނު އިރު ބުރާސްފަތި ދުވަގު ފެނުނީ 27 ކޭސް އެވެ.
ރަށްތަކުގައި ކޮވިޑް ބަލި މީހުންގެ ތިބި އަދަދު ވެސް މި ހަފުތާގައި އަންނަނީ ދަށްވަމުންނެވެ. އެގޮތުން މިދިޔަ އަންގާރަ ދުވަހު 13 ރަށަކާއި 26 ރިސޯޓެއްގައި އެބަލީގެ މީހުން ތިބި އިރު ޖެހިގެން އައި ދުވަހު ބަލިމީހުން ތިބީ 11 ރަށަކާއި 27 ރިސޯޓެއްގަ އެވެ. އަދި ބުރާސްފަތި ދުވަހު 10 ރަށަކާއި 25 ރިސޯޓެއްގައި ކޮވިޑްގެ ބަލިމީހުން ތިބި އިރު މިއަދު ތިބީ ނުވަ ރަށަކާއި 25 ރިސޯޓެއްގަ އެވެ.
ކޮވިޑުން ރައްކާތެރިވުމަށް އަޅާފައިވާ ފިޔަވަޅުތައް ވެސް މިދިޔަ ހަފުތާގައި ވަނީ ކޮންމެވެސް ވަރަކަށް ލުއިކޮށްްފަ އެވެ. އެގޮތުން ވަކި އުސޫލަކުން ބޭނުންކުރެވޭ ގޮތަށް މާލެ ސަރަހައްދުގެ ޕާކްތައް ވެސް މިދިޔަ ހަފުތާގައި ވަނީ ހުޅުވާލައިފަ އެވެ.
ރާއްޖެއިން ކޮވިޑް ޖެހުނު މީހުންގެ އަދަދު 12،000 އަށް ވުރެ މަތިވެފައި ވިޔަސް އެކްޓިވް ކޭސްތަކުގެ އަދަދަކީ މިހާރު 827 އެވެ. އެބަލީގައި ރާއްޖެއިން މަރުވި މީހުންގެ އަދަދަކީ 41 އެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
ބަސް
14 November 2020
الحمد لله އިރާދަކުރެއްވިއްޔާ ދެން ގޯސްނުވާނެ.
ގަޓް ބްރޯ
14 November 2020
ރާއްޖެއާ ޗައިނާ ފަދަ ގައުމުތަކުން ކޮވިޑް ކޮންޓްރޯލް ކުރަން ބޭނުންކުރާ އުކުޅުތައް ދުނިޔޭގެ އެހެން ގައުމުތަކުންވެސް މިހާރު ދަސްކުރަންވެއްޖެ. ދުނިޔޭގެ އެހެން ގައުމުތަކަށް ބޮޑު ބިރުވެރި ވަބާއަކަށް ކޮވިޑް ވެގެން އުޅޭއިރު ޗައިނާ އާ ރާއްޖޭން މިވަނީ ފެންތައްޓެއް ބޯލާހާ ފަސޭހައިން (ތަފާސް ހިސާބުތަކުންނަމަވެސް ) ކޮވިޑް ކޮންޓްރޯލް ކޮށްފަ!!