ޒިޔަތުގެ މައްޗަށް ހުކުމް އިއްވުުން މާދަމާ އަށް ފަސްކޮޮށްފި

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ޚިޔާނާތާ ގުޅިގެން އެ ކުންފުނީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުގެ މައްޗަށް ކުރާ ދައުވާތަކުގެ ހުކުމް އިއްވުން މާދަމާ އަށް ފަސްކޮށްފި އެވެ.

އެމްއެމްޕީއާރުސީގެ 1.2 ބިލިއަން ރުފިޔާގެ ޚިޔާނާތާ ގުޅިގެން ޒިޔަތުގެ މައްޗަށް ޚިޔާނާތުގެ 32 ދައުވާއެއް ދައުލަތުން ކުރެ އެވެ. އެ ދައުވާތަކާ ގުޅިގެން ޒިޔަތުގެ ވަނީ ކުށަށް އިއުތިރާފްވުމަށާއި ތަހުގީގަށް އެއްބާރުލުން ދިނުމުގެ އެއްބަސްވުމެއް ދައުލަތާ އެކު ހަދައިފަ އެވެ. އަދި އެންމެ ފަހުން ބޭއްވި އަޑުއެހުމުގައި ވަނީ އޭނާ ވަނީ އެ ހުރިހާ ދައުވާތަކަށް އެއްބަސްވެފަ އެވެ.

އެ މައްސަލާގެ ހުކުމް މިއަދު އިއްވަން ކްރިމިނަލް ކޯޓުގައި ތާވަލް ކުރުމަށް ފަހު އިދާރީ މައްސަލަތަކާ ގުޅިގެން ކެންސަލް ކޮށްފައިވާ ކަމަށް އެ ކޯޓުން ބުންޏެވެ. އަދި މާދަމާ އެ މައްސަލާގެ ހުކުމް އިއްވަން ތާވަލް ކޮށްފައިވާ ކަމަށް ވެސް އެ ކޯޓުން ބުންޏެވެ.

ޒިޔަތުގެ މައްޗަށް ކުރާ ހުރިހާ ދައުވާތަކުގައި އޭނާ ޚިޔާނާތްތެރިވި ކަމަށް ތުހުމަތުކުރާ އަދަދު 50.7 މިލިއަން ޑޮލަރު (781 މިލިއަން ރުފިޔާ) އަށް އަރަ އެވެ. އެ ހުުރިހާ ދައުވާތައް ސާބިތުވިޔަސް، ދައުލަތުން ކޯޓުގައި ބުނެފައިވާ ގޮތުގައި އޭނާގެ މައްޗަށް އަންނާނީ 11 އަހަރުގެ ޖަލު ހުކުމެކެވެ. އެއީ ތަހުގީގަށް ޒިޔަތު އެއްބާރުލުން ދޭތީ އަދަބުގެ މިންވަރުގެ ދަށް ކުރުމުންނާއި ގާނޫނުލްއުގޫބާތުގައި ބަޔާންކުރާ އެއް ކުށަށް ވުރެ ގިނަ ކުށަށް އަދަބު ކަނޑައެޅުމުގެ އުސޫލުގެ ދަށުންނެވެ.

ގާނޫނުލް އުގޫބާތުގެ 1006 ވަނަ މާއްދާގައި ބަޔާންކުރާ އެއް ކުށަށް ވުރެ ގިނަ ކުށަށް އަދަބު ކަނޑައެޅުމުގެ އުސޫލު އޮންނަ ގޮތުން އެންމެ ބޮޑު ކުށަށް އަދަބުގެ އެންމެ ދިގު މުއްދަތު ކަނޑައެޅުމަށް ފަހު ދެން ހުރި ކުށްތަކުގައި ވަކި ތަރުތީބަކުން އަދަބުގެ މިންވަރު ދަށް ކުރަން ޖެހޭނެ އެވެ. އެގޮތަށް އަދަބުގެ މިންވަރު ދަށް ކުރަމުން ގޮސް، 12 ވަނަ ދައުވާގެ އަދަބަކީ އެންމެ ދުވަހަކަށް ޖަލަށްލުމެވެ. އަދި ބާކީ އޮތް 20 ދައުވާގައި އެއްވެސް އަދަބެއް ޒިޔަތުގެ މައްޗަކަށް ނާންނާނެ ކަމަށް ދައުލަތުން ބުނެފައިވެ އެވެ.

އެމްއެމްޕީއާރުސީގެ ޚިޔާނާތާ ގުުޅިގެން ޚިޔާނާތުގެ އެހެން ކުށެއް 2016 ވަނަ އަހަރު ސާބިތުވެގެން ޒިޔަތު މިހާރު ވެސް ގެންދަނީ އަށް އަހަރުގެ ޖަލު ހުކުމެއް ތަންފީޒު ކުރަމުންނެވެ.

ޒިޔަތުގެ އިތުރުން ކުރީގެ ނައިބު ރައީސް އަހުމަދު އަދީބާ އެކު ދައުލަތުން ހެދި އިއުތިރާފްގެ އެއްބަސްވުމެއްގެ ދަށުން އޭނާ ވެސް ވަނީ ދައުވާތަކަށް ކުރިން އެއްބަސްވެފަ އެވެ. އެ އެއްބަސްވުމުގެ ދަށުން އަދީބުގެ މައްޗަށް ކްރިމިނަލް ކޯޓުން ދާދިފަހުން ވަނީ 20 އަހަރުގެ ޖަލު ހުކުމަކާއި ދެ މިލިއަން ރުފިޔާގެ ޖޫރިމަނާގެ ހުކުމެއް އިއްވައިފަ އެވެ.