މޯލްޑިވިއަން އަށް ސާޓާގެ އެވޯޑެއް ލިބިއްޖެ

ސައުތު އޭޝިއަން ޓްރެވެލް އެވޯޑް (ސާޓާ) ގެ ލީޑިން ޓޫރިސްޓް ޓްރާންސްޕޯޓް ޕްރޮވައިޑާ އެވޯޑް މޯލްޑިވިއަން އަށް ލިބިއްޖެ އެވެ.

ވާޗުއަލްކޮށް މިއަދު ބޭއްވި އެވޯޑް ހަފްލާގައި އެވޯޑާ ހަަވާލުވެ، މޯލްޑިވިއަންގެ ޑެޕިއުޓީ މެނޭޖިން ޑިރެކްޓަރު އާއިޝަތު ޖެނިފާ ދެއްވި މެސެޖްގައި މި އަހަރަކީ މި އިންޑަސްޓްރީއަށް ގޮންޖެހުންތައް ކުރިމަތިވި އަހަރެއްކަން ފާހަގަ ކުރެއްވި އެވެ.

ކޮވިޑާ ގުޅިގެން ބޯޑަރު ބަންދު ކުރުމުގެ ސަބަބުން އެހެން އެއާލައިންތަކޭ އެއްގޮތަށް މޯލްޑިވިއަން އަށް ވެސް ވަނީ މާލީ ދަތިތަކައި ކުރިމަތިވެފަ އެވެ. އެހެންވެ ދަތުރުފަތުރުގެ މި އެވޯޑް ވެގެންދާނީ އަނެއްކާ ވެސް ކުރިއަށް ދިޔުމަށް ލިބޭ ހިތްވަރަކަށެވެ.

ވައިގެ މަގުން ގުޅުވައިދިނުމަށް މޯލްޑިވިއަންގެ މުއައްޒަފުން ވަރުބަލި ކަމެއް ނެތި ކުރި މަސައްކަތަށް އޭނާ ޝުކުރުއަދާކުރެއްވި އެވެ. އަދި ޓޫރިޒަމާއި އޭވިއޭޝަން އަކީ ގުޅިލާމެހިފައިވާ ދެ އިންޑަސްޓްރީކަން ފާހަގަކުރައްވައި، މި އެވޯޑް ލިބުމަކީ ޕާޓްނަރުންނާއި ކަސްޓަމަރުން މޯލްޑިވިއަން އަށް ކުރާ އިތުރުބާރު ދައްކުވައިދޭ ކަމެއް ކަމަށް ޖެނިފާ ވިދާޅުވި އެވެ.

މި ކެޓަގަރީން މީގެ ކުރިން ދެ ފަހަރެއްގައި މޯލްޑިވިއަން އަށް ވަނީ ސާޓާ އެވޯޑް ލިބިފަ އެވެ. މޯލްޑިވިއަން އިން އަންނަނީ ރާއްޖޭގެ 15 ސަރަހައްދުތަކަށް ދަތުރު ކުރަމުންނެވެ. މީގެ އިތުރުން ބަންގްލަދޭޝް އާއި އިންޑިޔާ އާއި ތައިލެންޑަށް ދަތުރުތައް ކުރެ އެވެ.