ވިއްސާރައިގައި ފުވައްމުލަކަށް ބޮޑެތި ގެއްލުންތަކެއްވެެއްޖެ، ހާލަތު ވަރަށް ގޯސް

ރާއްޖެ އަށް މިހާރު ކުރަމުންދާ ގަދަ ވިއްސާރައިގައި ފުވައްމުލަކުގައި ވަރަށް ބޮޑަށް ފެންބޮޑުވެ، ބައެއް ގެތައް ފެން ވަދެ، އަދި ރުއްގަސް ވެއްޓި ބޮޑެތި ގެއްލުންތަކެއް ވެއްޖެ އެވެ.

ކައުންސިލް އިދާރާގެ އޮފިޝަލަކު "މިހާރު" އަށް މިއަދު ވިދާޅުވީ، އެ ސިޓީ އަށް ދޭތެރެދޭތެރެއިން ބޯކޮށް ވާރޭ ވެހޭތާ މިހާރު ތިން ވަރަކަށް ދުވަސް ވެދާނެ ކަމަށެވެ. އެކަމަކު، ވިއްސާރައިގެ ބޮޑެތި ގެއްލުންތަކާ ކުރިމަތިލާން ޖެހުނީ ރޭ ދަންވަރު 2:30 ހާއިރު ބޯކޮށް ވެހެން ފެށި ވާރެއާ އެކު ކަމަށް ވިދާޅުވި އެވެ. މަގުތަކުގައި ފެންބޮޑުވެ، ގެތަކަށް ފެން ވަދެ، ހިފައި ގެންގުޅޭ ތަކެއްޗަކަށް ވެސް ގެއްލުންވެފައިވެ އެވެ. މީގެ އިތުރުން ބައެއްގެ ގެތަކުގެ މައްޗަށް ރުއްގަސް ވެއްޓިފައިވެ އެވެ.

އޮފިޝަލް ވިދާޅުވި ގޮތުގައި ކައުންސިލާއި ފުލުހުންނާއި ސިފައިންނާއި އަދި ފުވައްމުލަކުގެ ކަމާ ގުޅުން ހުރި އެހެން މުއައްސަސާތައް ގުޅިގެން މިހާރު އަންނަނީ ލިބުނު ގެއްލުންތަކުގެ ތަފުސީލުތައް ނަގައި، ރައްޔިތުންނަށް އެހީވުމުގެ މަސައްކަތްކުރަމުންނެވެ.

"މި ވަގުތު ދަންނަވަން ދަތި ފެން ވަދެ ގެއްލުންވި ގެތަކުގެ އަދަދާއި ރުއްގަސް ވެއްޓި ގެތަކަށް ލިބުނު ގެއްލުން ތަކުގެ ތަފުސީލު ދޭން. އެ ޑޭޓާތައް ނަގަމުން މި އަންނަނީ،" އޭނާ ވިދާޅުވި އެވެ.

އޮފިޝަލް ވިދާޅުވީ، މިއީ ނޮވެމްބަރު 2007 ގެ ފަހުން ފުވައްމުލަކަށް މިހާ ބޮޑަށް ވިއްސާރަކޮށް ގެއްލުން ލިބުނު ފުރަތަމަ ފަހަރު ކަމަށެވެ.

"ހާލަތު ވަރަށް ގޯސްކޮށް އޮތީ. ޕަމްޕްތަކަށް ނުހިފަހައްޓައިގެން މަގުތަކުގައި ވަރަށް ފެން ބޮޑު. މި ރަށަކީ އަނެއްކޮޅުން މެދަށް އަޑިކޮށް ވަށައިގެން އުސްކޮށް އޮންނަ ރަށަކަށް ވުމާއެކު ގިނަ ގެތަކަށް ފެން ވަނުމުގެ ފުރުސަތު ވަރަށް ބޮޑު،" އޭނާ ވިދާޅުވި އެވެ.

އޮފިޝަލް ވިދާޅުވިގޮތުގައި، ވިއްސާރައިގެ ތެރޭގައި މިއަދު ހެނދުނު ކައުންސިލް އިދާރާގެ މުވައްޒަފަކަށް އަނިޔާ ވެފައިވެ އެވެ. އެއީ ސިޓީގެ ހާލަތު ބެލުމަށް ޓީމެއް ދަތުރުކުރި ޕިކަޕެއްގެ މައްޗަށް އަނބު ގަހަކުން ގޮފިގަނޑެއް ވެއްޓި އަނިޔާވެގެންނެވެ.

"އޭނާ ހޮސްޕިޓަލަށް ވެސް ގެންދަން ޖެހުނު. އެކަމަކު ނަސީބު ރަނގަޅު ކަމުން ސީރިއަސް ގެއްލުމެއް ނުލިބޭ. ވިއްސާރައާ ގުޅިގެން އިތުރު ބަޔަކަށް ވެސް މިހާތަނަށް އަނިޔާވި ކަމުގެ މައުލޫމާތެއް ލިބިފައެއް ނެތް،" އޮފިޝަލް ވިދާޅުވި އެވެ.

ފުވައްމުލަކުގެ އިތުރުން އައްޑު އަށް ވެސް ރެއިން ފެށިގެން ފަތިހާ ހަމައަށް ބޯކޮށް ވާރޭ ވެހި، އާންމުކޮށް ވެސް ފެންބޮޑުވާ ސަރަހައްދުތަކުގައި ފެންބޮޑުވެފައިވެ އެވެ.

ރާއްޖޭގެ އެންމެ ދެކުނަށް ކުރާ ވިއްސާރައާ ގުޅިގެން މޫސުމާ ބެހޭ އިދާރާ އިން އައްޑު އާއި ފުވައްމުލަކަށް އޮރެންޖް އެލާޓް މިއަދު ހެނދުނު 6:00-8:00 އަށް ނެރުނު ނަމަވެސް އެލާޓް މިހާރު ވަނީ ރީނދުލަށް ބަދަލުކޮށްފަ އެވެ. އެއީ ހެނދުނު 10:00 އާ ހަމައަށެވެ.