ނަޝީދުގެ ސެކިއުރިޓީއާ ބެހޭ ގޮތުން ލިޔުނު ރިޕޯޓެއްގެ މައްސަލަ 241 ކޮމެޓީން ބަލަނީ

މި މަހުގެ ހަ ވަނަ ދުވަހުގެ ރޭ ރައްޔިތުން މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް ދިން ހަމަލާއާ ގުޅިގެން "މިހާރު" ނޫހުގައި އިއްޔެ ޝާއިއުކުރި ރިޕޯޓުގެ މައްސަލަ ބެލުމަށް މަޖިލީހުގެ ގައުމީ ސަލާމަތާ ބެހޭ ކޮމިޓީން ނިންމައިފި އެވެ.

މަޖިލީހުން މިއަދު ނެރުނު ނޫސްބަޔާނެއްގައި ބުނީ "ކެނެރީގޭގައި ސެކިއުރިޓީ ނުދެވޭނެ ކަމާއި ނުރައްކާ އޮތް ކަން ނަޝީދަށް އެމްއެންޑީއެފުން އެންގި" މި ސުރުހީގެ ދަށުން "މިހާރު"ގައި ޝާއިއުކުރި ރިޕޯޓްކުރި މައްސަލަ ބަލަން ނިންމީ އޭގައި ހުރި މައުލޫމާތުތަކަކީ ނަޝީދާއި އޭނާގެ އާއިލާގެ ހިމާޔަތާއި ރައްކާތެރިން ގެއްލިގެންދާނެ ފަދަ މައުލޫމާތުތަކެއް ކަމަށް އެ ކޮމިޓީ އަށް ފެންނާތީ ކަމަށް ބުނެފައިވެ އެވެ.

ސިފައިންގެ މަސްއޫލިޔަތާއި ވާޖިބު އަދާކުރުމުގައި ލިބޭ އެއްވެސް މައުލޫމާތެއް ސިފައިންގެ ގާނޫނުގައި ބަޔާންކޮށްފައިވާ ފަރާތްތައް ފިޔަވައި އެ ނޫން އެއްވެސް ފަރާތަކަށް ހިއްސާކުރުމަކީ މަނާކަމެއް ކަމާއި ދިވެހިރާއްޖޭގެ ގާނޫނުލްއުގޫބާތުގެ ދަށުން ކުށެއް ކަމަށް ބުނެފައިވެ އެވެ.

"މި މައްސަލައަކީ ގައުމީ ސަލާމަތާ ގުޅުންހުރި މައްސަލައަކަށް ވެފައި، ސަލާމަތީ ހިދުމަތްތައް ހިނގާ ނުހިނގާ ގޮތް ބަލަމުން ގެންދިއުމަކީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 241 ވަނަ މައްދާގެ ދަށުން މިކޮމިޓީގެ ދުސްތޫރީ ޒިންމާއަކަށް ވީހިނދު، މި ކޮމިޓީ އިން މި މައްސަލަ ބެލުމަށް ނިންމާފައިވާ ކަމުގައި ދަންނަވަމެވެ،" އެ ނޫސްބަޔާން ނިންމާލަމުން ބުނެފައިވެ އެވެ.

Kenereegeygai security nudheveyne kamaai nurakkaa oiy kan Nasheed ah MNDF in engi!

The most trusted news source in the Maldives

Mihaaru

ނަޝީދަށް ދިން ހަމަލާއާ ގުޅޭގޮތުން "މިހާރު" ނޫހުގައި ޝާއިރުކުރި ރިޕޯޓް.

ނަޝީދުގެ ސެކިއުރިޓީއާ ބެހޭ ގޮތުން ޝާއިއުކުރި ރިޕޯޓް ޓްވީޓްކުރައްވައި ނަޝީދުގެ ބޭބޭފުޅު ޑރ. އިބްރާހިމް ނާޝީދު މިއަދު ކުރެއްވި ޓްވީޓެއްގައި ވެސް އެމްއެންޑީއެފަށް ވަރަށް ބޮޑަށް ފާޑު ވިދާޅުވެފައިވެ އެވެ. ނާޝިދުގެ ޓްވީޓްގައި ވިދާޅުވީ ދައުލަތަށް ނަޝީދުގެ ސެކިއުރިޓީ އެންމެ ރަނގަޅަށް ބެލެހެއްޓިފައި އޮތީ އެ މަނިކުފާނު ޖަލުގައި ހުންނެވި އިރު ކަމަށެވެ. ދެން ވެސް އެކަން ވާން އޮތީ އެގޮތަށް ތޯ އޭނާ ސުވާލު އުފެއްދެވި އެވެ.

ކެނެރީގޭގައި ސެކިއުރިޓީ ދިނުމުގައި ހުރި ގޮންޖެހުންތައް އެންގެވިކަން ހާމަވުމާ އެކު ސެކިއުރިޓީ އަކީ ވަކި ގެޔަކުން ދެވޭ އެއްޗެއް ނޫން ކަމަށް ވިދާޅުވެ، ނަޝީދުގެ އާއިލާ އިން ވެސް ވަނީ ނުރުހުން ފާޅުކޮށްފަ އެވެ.

ނަޝީދަށް ހަމަލާ ދީފައިވަނީ ގެއިން ނުކުމެވަޑައިގެން، އެ ގެ ހުންނަ ހަނި މަގުން މަޖީދީމަގަށް ނުކުންނެވި ވަގުތު، ކަންމަތީގައި ޕާކުކޮށްފައި ހުރި ސައިކަލެއް ގޮއްވާލައިގެންނެވެ. އެ ގެ ހުންނަ މަގުގެ ހަނިކަމުން، އެ މަގުގައި ވެހިކަލް ޕާކްކުރުން މަނާކޮށްދިނުމަށް ހަމަލާގެ މާކުރިން އެމްއެންޑީއެފުން، މާލޭ ސިޓީ ކައުންސިލްގައި ވެސް އެދިފައިވެ އެވެ. ނަމަވެސް ހަމަލާ ދިން ރޭ ނަޝީދަށް ސެކިއުރިޓީ ދިން ގޮތާ މެދު އެތައް ބަޔަކު އަންނަނީ ސުވާލު އުފައްދަމުންނެވެ.

މ. ޔާގޫތުގެއިން އެ މަނިކުފާނު މިދިޔަ އަހަރުގެ އޮކްޓޫބަރުގައި ބަދަލުވެ ވަޑައިގަންނަވާތީ ސިފައިން ވަނީ ކެނެރީގޭގެ ސެކިއުރިޓީ އެސެސްމަންޓެއް ހަދައިފަ އެވެ. އެ އެސެސްމަންޓްގައި ހުރި ކަންބޮޑުވުންތަކާ އެކު، މިދިޔަ އަހަރުގެ އޮކްޓޫބަރު 11 ގައި ޑިފެންސް މިނިސްޓަރު މާރިޔާ އަހުމަދު ދީދީ އާއި ޗީފް އޮފް ސްޓާފް މޭޖަ ޖެނެރަލް އަބްދުﷲ ޝަމާލް އާއި އެސްޕީޖީގެ ހެޑް ރައްޔިތުންގެ މަޖިލީހުގެ އިދާރާ އަށް ވަޑައިގެން ނަޝީދާ ބައްދަލު ކުރެއްވި އެވެ. ނަމަވެސް އެ ކަންކަމަށް ނުބައްލަވައި ނަޝީދު އެ ގެޔަށް ބަދަލުވެވަޑައިގަތީ އެވެ.

ކެނެރީގޭގައި ނަޝީދު ހުންނެވުމަށް ރައްކާތެރި ނުވާ ގިނަ ސަބަބުތަކެއް ސެކިއުރިޓީ އެސެސްމަންޓުން ފާހަގަވިކަން ނަޝީދަށް އެންގެވި ކަމަށް ބުނާތީ އެމްޑީޕީގެ ރައްޔިތުންގެ މަޖިލީހުގެ ބައެއް މެމްބަރުންނާއި އާއްމު މެމްބަރުން ވެސް ދަނީ އެ ވާހަކަތަކާ މެދު ނުރުހުން ފާޅުކުރަމުންނެވެ.