މާލޭ ދެކުނު ފަރާތު ފަޅުތެރޭގައި އޮތް ތިން ލޯންޗެއްގައި މިއަދު ހެނދުނު އަލިފާން ރޯވެ އަނދައިފި އެވެ.
އެމްއެންޑީއެފުން ބުނީ އަލިފާން ރޯވި ކަމުގެ ރިޕޯޓް ލިބުނީ ހެނދުނު 6:13 ހާއިރު ކަމަށާއި އަނިޔާވި އެކަކަށް އައިޖީއެމްއެޗްގައި މިހާރު ފަރުވާ ދެމުން އަންނަ ކަމަށެވެ.
ސިފައިން ބުނި ގޮތުގައި އަލިފާން ކޮންޓްރޯލް ކުރެވުނީ 6:16 ހާއިރު އެވެ. އަދި ރޯވެފައިހުރި އަލިފާންގަނޑު އެއްކޮށް ނިއްވާލެވުނީ 6:45 ގައި ކަމަށް ބުންޏެވެ.
މި ހާދިސާގައި އަނިޔާވި މީހާ ބެހޭ މައުލޫމާތެއް އަދި ނޭނގެ އެވެ.
ފޮޓޯތަކުން ފެންނަ ގޮތުގައި ލޯންޗްތައް ވަނީ ބޭނުން ނުކުރެވޭ ވަރަށް އަނދައިފަ އެވެ. ބެލެވޭ ގޮތުން މީގެ ތެރޭގައި ފަސިންޖަރުން އުފުލާ ލޯންޗަކާއި ސްޕޯޓްސް ފިޝިން އަށް ބޭނުންކުރާ ދެ ލޯންޗެއް އޮތެވެ.
ހާދިސާ ހިނގަން މެދުވެރިވި ސަބަބެއް އަދި ނޭނގެ އެވެ.
މީގެ އަހަރުތަކެއް ކުރިން ވެސް މި ސަރަހައްދުގައި ވަނީ އަލިފާނުގެ ހާދިސާއެއް ހިނގައި އުޅަނދުތަކަކަށް ބޮޑެތި ގެއްލުންތަކެއް ވެފަ އެވެ.
