އދ. ދިގުރަށުން ދިމާވި އެންމެން ކަހަލަ ގޮތަކަށް ތުނޑިއަށް ދިޔައިންތޯ އެހި ސަބަބެއް އޮތެވެ; މި ދިގު ތުނޑީގެ އާދަޔާ ޚިލާފު ރީތި ކަމަކީ މި ރަށުގެ ފަޚުރު ކަމުގައި ބުނެދިނުމެވެ. ދެ ފަރާތުން ރާޅު ޖަހަޖަހާ އޮންނަ ހުދު ދޮންވެލީގެ ދިގު ތުނޑިއަކީ މިފަދަ ދެވަނައެއް ނެތްހާ ހިތްގައިމު ކަމެކެވެ. ދުނިޔޭގެ ސަމާލުކަން ހުއްޓިފައިވާ ގުދުރަތީ އަޖައިބެކެވެ.
މި ރަށުގެ މީހުން ދިރިއުޅޭ ސަރަހައްދާ ދުރުގައި ވަކިން އޮންނަ ތުނޑިއަށް "މިހާރު" ޓީމުން ދިޔައީ ހަވީރުކޮޅެވެ. ރަށު ޕިކަޕުގައި ވެސް ދެވެ އެވެ.
ކިތަންމެ ޝައުގުވެރި ދަތުރަކަސް ރަށުގެ ދެކުނު ކޮޅުގައި އޮންނަ ރީތިކަން ދެކިލަން ދިއުން އެހާ ފަސޭހައެއް ނޫނެވެ. އަޑިގުޑަން މަގުތަކުން އެ ހިސާބަށް ދާން ރަށު ޕިކަޕުގެ ދަތުރު އުނދަގުލެވެ. ހިރަފުސް ބޯ ދުވަސްތަކުގައި އުފުލަންޖެހޭ ތަކުލީފް ވެސް ބޮޑެވެ.
ހަނި މަގުން ސައިކަލުގައި ދުއްވާފައި ގޮސް ވަކި ހިސާބަށް މަޑުކުރުމަށް ފަހު ދެން ފައިބަން ޖެހުނީ މޫދަށެވެ. އެއީ މަގު ކުރުކޮށް ތުނޑިއަށް ފަސޭހައިން އެރެން އޮތް ގޮތެވެ.
ގަސްތަކުގެ ތެރެއިން ވަދެގެން ގޮސް، ލޮލުގެ ކޮޅަށް ދަމާލާފައި އޮތް ތުނޑީގައި ފައިބީއްސާލެވުނީ އިރުކޮޅަކު ހިނގި ފަހުންނެވެ. ރާޅު ޖަހާ އަޑާ އެކު ވަށައިގެން ނޫކުލައިގެ ސާފު މޫދާއި ދިގު ތުނޑި އޮތީ ކުރިމަތީގަ އެވެ. ކިތަންމެ ދިގަސް މި ހިތްގައިމު ކަމުގައި ހިނގާ ހިނގާ ވަރުބައްޔެއް ނުވާނެ އެވެ.
"ކޮންމެ ދުވަހަކު ވެސް މިތަނަށް ފައިބާނެ ސަފާރީތަކުން. ދެން މިއުޅެނީ މި ރަށުގެ ގެސްޓް ހައުސްތަކަށް އައިސް ތިބި ޓޫރިސްޓުން. މިތަނުގެ އެންމެ ބޮޑު ހިތްހަމަޖެހުމަކީ މިއީ ވަރަށް ބޮޑު ތުނޑިއެއް ކަމުން ތޮއްޖެހިގެން އުޅެން ނުޖެހޭކަން. ވަރަށް ހިތްފަސޭހަ އަރާމު, ޖާގަ ލިބިގެން ތިބެވޭ ތަނަކަށް ވުން." ތުނޑީގައި ތިބި މީހުންނަށް އިޝާރާތްކުރައްވައި ކައުންސިލްގެ ނައިބު ރައީސް އިބްރާހިމް އަބްދުއްރަހީމް ވިދާޅުވި އެވެ.
އޭނާ ވިދާޅުވި ގޮތުގައި ޒަމާނުއްސުރެން މި ތުނޑިއަކީ ކައިރި ރަށްތަކުގެ ޕިކްނިކް މަންޒިލެވެ. މިތަނަށް ދުނިޔޭގެ ސަމާލުކަން ހުއްޓުނީ މި ރަށް ލޯކަލް ޓޫރިޒަމަށް ހުޅުވި ކުރިއަރަން ފެށުމުންނެވެ.
މި ރަށަށް އަންނަ ޓޫރިސްޓުން އެނބުރި ގޮސް މިތަނާ ބެހޭ ރިވިއުތަކުގައި މިވަރުގެ ރީތި ކަމެއް ނުދެކޭ ކަމަށް ލިއެފައި ހުރެ އެވެ. ބައެއް މީހުން ސިފަކޮށްފައި ވަނީ އަޖައިބެއްހާ ރީތި ތަނެއްގެ ގޮތުގަ އެވެ.
"ދުނިޔޭގެ އެންމެ ރީތި ބީޗުތަކުގެ ތެރޭގައި ދިގުރަށް ބީޗު ހިމެނޭ," މިތަނުގެ ރީތިކަމަށް ގިނަ ބަޔަކު ތައުރީފްކުރާކަން ފާހަގަކުރައްވައި އިބްރާހިމް ވިދާޅުވި އެވެ.
މި ތުނޑިއަކީ މިހާރު ރާއްޖޭގެ ވެސް ގިނަ ބައެއްގެ ހިތް ދޫވެފައިވާ މަންޒިލެކެވެ. އެކި ހިސާބުތަކުން ދަތުރު ހަދާފައި ތުނޑިއަށް އާދެ އެވެ. ދިގުރަށު ކައުންސިލަށް އާމްދަނީ ވަންނަ އެންމެ ބޮޑު ވަސީލަތަކީ ވެސް މި އެވެ.
މި ރަށު މީހުން ފިޔަވައި މިތަނަށް އަންނަ މީހުންގެ އަތުން ފީއެއް ނަގަ އެވެ. ދިވެއްސަކަށް 10ރ ނަގާއިރު ރިސޯޓްތަކާއި ސަފާރީތަކުން އަންނަ ގެސްޓުން އަތުން ނަގަނީ 5 ޑޮލަރެވެ.
"ތުނޑިއަށް އެބައާދޭ ދުވާލަކަށް 100 ގެސްޓުން ވެސް. ބައެއް މަސްތަކުގައި ފުދޭވަރެއްގެ ބޮޑު އާމްދަނީއެއް ވަދޭ," ކައުންސިލްގެ ރައީސް އިބްރާހިމް އުސްމާން ވިދާޅުވި އެވެ.
ތުނޑި ބަލާލުމުގެ އިތުރުން މި ރީތި ކަމުގައި ހަނދާންތައް ރައްކާކުރެވޭނެ ގޮތްތައް ކައުންސިލުން ވަނީ ފަހިކޮށްދީފަ އެވެ. ޚާއްސަ އިވެންޓްތަކާއި ބާބެކިއު ހެދެ އެވެ. ކައިވެނި ޕާޓީތަކަށް ވެސް ދޫކުރެ އެވެ.
"ގެސްޓުންގެ ވެޑިންތައް ބާއްވާ. ސަފާރީތަކުން އާއްމުކޮށް ބާބެކިއު ހަދަން އަންނާނެ. ގެސްޓް ހައުސްތަކުން ވެސް ޑިނާ ބާއްވާނެ. ގޮނޑި މޭޒު ދޫކުރަނީ ކައުންސިލުން,"
ތުނޑިއަށް އަންނަ މީހުން ގިނަކަމުން ބައެއް ފަހަރު މެނޭޖްކުރަން އުނދަގޫވާ ފަހަރުތައް ވެސް ދެ އެވެ.
ދިގުރަށް ޓޫރިޒަމްގެ ޑެސްޓިނޭޝަނެއްގެ ގޮތުގައި މާކެޓްކުރަން ކައުންސިލުން ގެންގުޅޭ ޕްލޭންގެ ކުރީގައި އޮތީ ތުނޑި އެވެ. ދުނިޔޭގެ ފެންވަރުގެ ފެއާތަކުގައި ބައިވެރިވާއިރު ވެސް މިރަށް ބްރޭންޑްކުރުމުގެ ވިސްނުން ހުރީ ތުނޑިއާ ގުޅުވަ އެވެ.
ތުނޑި މިހާރަށް ވުރެން ބޮޑަށް މާކެޓް ކުރެވޭނެ ގޮތަކަށް އުނދޯލި އެލުވައި ސޯލާއިން ކަރަންޓް ދެވޭނެ ގޮތަކާއި ޓަކްޝޮޕެއް ހުޅުވަން ޕްލޭންގައި ހިމަނާފައިވެ އެވެ.
"ކުރިއަށް އޮތް ތަނުގައި މިހާރަށް ވުރެން ވެސް ހިތްގައިމުކޮށް, ރީތިކޮށް ތުނޑި ފެންނާނީ," ކައުންސިލްގެ ރައީސް ވިދާޅުވި އެވެ.
ޓޫރިޒަމް ފައްކާވެފައި އޮތް މި ރަށުގެ ނަސީބުގައިވާ ތުނޑިއަކީ މުޅި ރާއްޖޭގެ ރީތިކަން ވެސް ސިފަކޮށްދޭން އޮތް ތަނެކެވެ. މި ހިތްގައިމު ކަމަކީ މި ރަށުގެ ކޮންމެ މީހަކު ވެސް ފަޚުރުވެރިވާ ފަދަ އަޖައިބެކެވެ.
