އެއް ބާރު ހުއްޓި، ބަރުލަމާނީ ތާރީހުގައި ހުސް ދުވަހެއް!

މީގެ މަހެއްހާ ދުވަސް ކުރިން ރޯވި "ސިޔާސީ އަލިފާންގަނޑު" ގެ ހުޅުފަޅައިގެން ގޮސް ދައުލަތުގެ ބިޔަ އެއް ބާރު އެކީގައި މިއަދުން ފެށިގެން އެއްކޮށް ހުއްޓުނީ އެވެ. ގާނޫނު މާނަކުރުމުގެ ބަހާނާގެ ތެރެއިން ރައްޔިތުންގެ މަޖިލީހުގެ ހައިބަތު ބޮޑު، ގަދަރުވެރި ރިޔާސަތު މިއަދު އެ ހުރީ ފަޅަށެވެ. ބޮޑު ސިންގާ ޗުއްޓީއަކަށް ފަހު، ގަވާއިދުގައި ވާ ގޮތުގެ މަތިން މަޖިލިހުގެ ޖަލްސާތައް ވެސް އަންނަ އޮގަސްޓް މަހު ފެށޭނެ ކަމެއް އަދި ނޭނގެ އެވެ.

މިއީ، ސަބަބުވެރި އިންސާނެއްގެ ވިސްނުމަށް ސާފުވާ ވަރުގެ އާދައިގެ ކަމެއްގައި ވެސް އަކުރެއް ނޫނީ ފިއްޔެއްގައި ހިފައިގެން ގޮތްދޫނުކޮށް ތިބުމުގެ ހިތި ނަތީޖާ އެވެ. އެކަމަކު ސިޔާސީ މައިދާނުގައި އާންމުކޮށް ކަން ހިނގާ އުސޫލުން މިފަދަ ކަޅު ދުވަހެއްގައި ވެސް ޒިންމާ ނަގާނެ ފަރާތެއް ނުވި އެވެ.

ނަޝީދުގެ ވިސްނުން ސާފު

މި ހުރިހާ ހައިޖާނެއްގެ ތެރެއިން ގިނަ އިނގިލިތައް އަމާޒުވަނީ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށެވެ. އެކަމަކު ނަޝީދު ގަބޫލުފުޅު ކުރައްވާ ގޮތުން ނަމަ މި ކަމުގައި އެ މަނިކުފާނަށް ކުރެއްވޭނެ ހަމަ އެއްވެސް ކަމެއް ނެތެވެ. ނަޝީދުގެ ވިސްނުމުގައި އެ މަނިކުފާނުހާ ސާފު ބޭފުޅަކު ނެތެވެ. އެކަމަކު، ރައްޔިތުންގެ މަޖިލިހުގެ ރައީސްގެ މަގާމުގައި ހުންނަވާ ބޭފުޅާއަކީ ހިޔާލު ތަފާތުވުމުން ވެސް އެންމެން ގޮވައިގެން އުޅުއްވޭ ވަރުގެ ގާބިލް ބޭފުޅެއްކަން ނަޝީދުގެ އަމަލުތަކުން ނުދެއްކެވުނުކަން މިދިޔަ މަހެއްހާ ދުވަހުގެ މަންޒަރުތަކުން އެނގެ އެވެ.

ހިޔާލު ތަފާތު ބައެއް މެމްބަރުންނާ ރިޔާސަތުގައި އިންނަވައިގެން ޖަދަލު ކުރެއްވުމާއި މަޖިލިހުގެ އިދާރާގެ ކުޑަދަށުގައި ވެސް އެ ގޮތްގޮތަށް އުޅުއްވުމުން ފެނުނީ މައްސަލައިގެ ހައްލަށް ވާސިލް ވުމަށް މިހާރުގެ ރިޔާސަތުން ނުކުޅެދިފައިވާ ތަނެވެ. މުޅިން ވެސް އުޅުއްވީ ހައްލު އޮތީ އަނެއްކޮޅުގައި ކަން ދެއްކެވުމަށެވެ. ނަޝީދުގެ ފަޅިން ނުވަތަ އެ މަނިކުފާނަށް ތާއީދު ކުރައްވާ މެމްބަރުން ގޮތް ދޫކުރައްވާ އެއްވެސް ކަމެއް ކުރިއަކަށް ނުނެރުއްވި އެވެ.

މަޖިލިސް އެކީގައިހެން ހުއްޓިފައި އޮންނަތާ ތިން ހަފުތާއެއްހާ ދުވަސް ފަހުން، ނޫސްވެރިންނާ ބައްދަލުކުރައްވައި ނަޝީދު އިއްޔެ ވިދާޅުވީ މަޖިލީހުގެ ރައީސާއި ނައިބު ރައީސް އީވާ އަބްދުﷲ ގެ އިތުބާރު ނެތް ކަމުގެ މައްސަލަ މަޖިލިސް ކޮންޓްރޯލްކުރާ އެމްޑީޕީން އެއްފަހަރާ ހުށަހެޅީ މަޖިލިސް ހުއްޓުވުމުގެ ނިޔަތުގައި ކަމަށެވެ.

ނަޝީދު ވިދާޅުވީ ރިޔާސަތާ ދުރަށް ވަޑައިގަންނަވަން ނިންމެވީ، ދުނިޔޭގެ ބެސްޓް ޕްރެކްޓިސްއާ އެގޮތަށް އަމަލު ކުރައްވަން ކަމަށެވެ.

"މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގައި މަޖިލިސް ހުއްޓާލުމުގެ ނިޔަތެއް އޮވެގެން ނޫނީ މައްސަލަ އެއްފަހަރާ ހުށަހެއް ނާޅުއްވާނެ،" ނަޝީދު ވިދާޅުވި އެވެ.

އެ މަނިކުފާނު ވިދާޅުވި ގޮތުގައި، މަޖިލީހުގެ މިއަދާއި މާދަމާގެ ޖަލްސާއާ އެކު، މި ދައުރުގައި މަޖިލީހުގެ ޖަލްސާތައް ބޭއްވޭނެ އެއްވެސް ގޮތެއް ނެތެވެ.

ނަޝީދާއި މަޖިލިހުގެ ނައިބު ރައީސް އީވާ އަބްދުﷲ ރިޔާސަތު ނުބަލަހައްޓަވާތީ، ފާއިތުވި ތިން ޖަލްސާގެ ރިޔާސަތު ބެލެހެއްޓެވީ ވިލުފުށި ދާއިރާގެ މެމްބަރު ހަސަން އަފީފެވެ. އެކަމަކު މަޖިލީހުގެ ރައީސާއި ނައިބު ރައީސް ނެތް ނަމަ އެހެން މެމްބަރަކަށް ރިޔާސަތު ބެލެހެއްޓޭނީ ވިދިވިދިގެން ތިން ޖަލްސާގައި ކަމަށް މަޖިލީހުގެ ގަވާއިދުގައި ވެ އެވެ.

"މާދަމާގެ ޖަލްސާ ވެސް ބޭއްވޭކަށް ނެތް. ދެން މި ދައުރުގައި އިތުރު ޖަލްސާއެއް ބޭއްވޭނެ ގޮތެއް ނެތް،" ނަޝީދު އިއްޔެ ވިދާޅުވި އެވެ.

އެހެންވެ، ރައީސް އިބްރާހިމް މުހައްމަދު ސޯލިހުގެ އަރިހުން ނަޝީދު އެދިވަޑައިގަތީ މަޖިލިސް ހުއްޓޭ ގޮތަށް އަމަލު ނުކުރައްވައި، އީވާގެ މައްސަލަ އަނބުރާ ގެންދެވުމަށެވެ.

"... މަޖިލީހުގެ ނައިބު ރައީސްގެ އިތުބާރުނެތް ކަމުގެ މައްސަލަ އަނބުރާ ނަންގަވާށޭ. އޭގެ ފަހުން އަޅުގަނޑުގެ އިތުބާރު ނެތް ކަމުގެ މައްސަލަ މަޖިލިސް ނުހުއްޓުވާ ރީތިކޮށް ގެންގޮސް ނިންމޭނެ،" އެ މަނިކުފާނު ވިދާޅުވި އެވެ.

އެމްޑީޕީން ބުނަނީ މަޖިލިސް ނުހުއްޓޭ ކަމަށް

އެކަމަކު އޭގެ އަނެއް ކޮޅުން ނަޝީދުގެ ވާހަކަތައް ގަބޫލުކުރަން އެމްޑީޕީން އެއްގޮތަކަށް ވެސް ބޭނުމެއް ނުވެ އެވެ.

އެމްޑީޕީގެ ޕާލަމެންޓަރީ ގުރޫޕުގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް "މިހާރު" އަށް ވިދާޅުވި ގޮތުގައި މަޖިލީހުގެ ރައީސާއި ނައިބު ރައީސްގެ ޒިންމާތަކާއި މަސްއޫލިއްޔަތުން ރެކިވަޑައިތުމަކީ މަޖިލިސް ހިންގުމަށް ހުރަސްއެޅޭނެ ކަމެކެވެ.

"ޖަލްސާ ހަމަ ބާއްވަވަން ޖެހިވަޑައިގަންނަވާނީ. ރިޔާސަތުގަ އިންނަވަން ބޭނުންފުޅު ނޫނިއްޔާ، ޖަލްސާ ފައްޓަވާފައި އެހެން ބޭފުޅަކާ ރިޔާސަތު ހަވާލުކުރެއްވީމާ ޖަލްސާ ކުރިއަށް ދާނެ،" އަސްލަމް ވިދާޅުވި އެވެ.

އޭނާ ވިދާޅުވި ގޮތުގައި، ނަޝީދާއި އީވާގެ އިތުބާރު ނެތް ކަމަށް މިހާރު މެމްބަރުންގެ އަޣުލަބިއްޔަތުން އޮތީ ނިންމައިފަ އެވެ. އެހެންކަމުން، "ހިތު ހުރި" ގޮތަކަށް މަޖިލީހުގެ ގަވާއިދު މާނަކުރައްވައިގެން، ޒިންމާތަކުން ރެކިވަޑައިގެންނެވުމުގެ ބަދަލުގައި ރީތިކޮށް އިސްތިއުފާ ދެއްވަންޖެހޭ ކަމަށް އަސްލަމް ވިދާޅުވި އެވެ.

މަޖިލިހުގެ ރިޔާސަތު ކުރިން ބެލެހެއްޓެވި ބޭފުޅަކު މަސްލަހަތަށްޓަކައި ނަން ހާމަނުކުރަން އެދިވަޑައިގަންނަވަމުން ވިދާޅުވީ، އަފީފްގެ ރިޔާސަތުގައި މިދިޔަ ތިން ދުވަހު ޖަލްސާތައް ގެންދިޔައިރު، މަޖިލިހުގެ ރައީސާއި ނައިބު ރައީސްގެ އިތުބާރު ނެތް ކަމުގެ މައްސަލަ ފިޔަވައި އެހެން ކަންކަން އެޖެންޑާގައި ހިމަނައިގެން ޖަލްސާތައް ގެންދެވި ގޮތަށް އެ ފުރުސަތު މި ދެ ދުވަހު ވެސް ލިބިވަޑައިގަންނަވާނެ ކަމަށެވެ. އެއީ ގާތްގަނޑަކަށް އަސްލަމް އެ ވިދާޅުވި އުސޫލެވެ.

"ނަޝީދު މި ހައްދަވާ ގޮތަކީ ވަގުތުން ރިޔާސަތުގެ ގޮނޑިން ފިއްލަވަނީ. މިއަދުގެ ޖަލްސާ ފައްޓަވާފައި އެޖެންޑާގައި ރައީސާއި ނައިބު ރައީސްގެ ނޯ ކޮންފިޑެންސްގެ މައްސަލަ ނުހިމެނުއްވީމާ ނިމުނީ. ދެން މާދަމާ އަފީފް [ރިޔާސަތުގައި] އިންނަވާނީ. އޭރަށް މަޖިލިސް ނުހުއްޓި އެހެން ކަންކަން ކުރިއަށް ގެންދެވޭނެ،" އޭނާ ވިދާޅުވި އެވެ.

"އެކަމަކު، މީގެ މޮޅު ކަމަކީ ނަޝީދު ބޭނުންފުޅެއް ނުވޭ މީގެ ހައްލެއް. ކުޑަވަރެއްގެ ހައްލެއް އޮތަސް އެ އިން ކުރިއަށް ދެވޭތޯ ބައްލަވަން ވެސް ނޫޅުއްވަނީއޭ. އިތުބާރު ނެތްކަމުގެ މައްސަލަ އަކީ ހުއްޖަތެއް ނަމަ މަޖިލިހުގެ ރައީސްގެ ހުރިހާ ޒިންމާއަކުން ވާނެ ދުރުގައި ހުންނަވަން. ޑިމޮކްރެޓިކް އުސޫލާއި ދުނިޔޭގެ ބެސްޓް ޕްރެކްޓިސް ގެންގުޅުއްވަން ވާނެ ހުރިހާ ކަމަކަށް."

އިންތިހާބާ ހަމައަށް ދިގުލާނެ؟

ސިޔާސީ ކޮންމެ ނަޒަރިއްޔާއިން ބެލި ނަމަވެސް، ގާނޫނު ހަދާ މަޖިލިސް އެއްވެސް ބައެއްގެ ފައިދަށުވެ، ހުއްޓިފައި އޮންނަން ވާނެ ކަމަށް ގަބޫލުކުރާނެ މިހާކު ނުހުންނާނެ އެވެ. ކުރިއަށް ދެ ތިން މަސް ތެރޭގައި ރިޔާސީ އިންތިޚާބު އަރާ ހަމަކުރާނެ އެވެ. އޭގެ ކުރިން އިލެކްޝަންސް ކޮމިޝަނަށް މެމްބަރަކު އައްޔަން ކުރަންޖެހެ އެވެ. މަސައްކަތްތެރިންގެ ހައްގުތަކާ ގުޅޭ މުހިންމު ބިލެއް އޮތީ ތާށިވެފަ އެވެ. ޖޭއެސްސީ އެކުލެވިގެންވާ ގޮތް ނިންމަން ޖެހެ އެވެ. މަޖިލީހުގައި ކޮންމެހެން ކުރަންޖެހޭ މަސައްކަތްތައް ހުރީ ފުނިޖެހިފަ އެވެ. އިލެކްޝަންސް ކޮމިޝަނަށް މެމްބަރަކު އައްޔަން ކުރުން ފަދަ ކަންކަން އެކަހެރި ކޮށްގެން ތިބުމުން އޭގެ ގެއްލުން ސަރުކާރަށް ވާނެ އެވެ. އެ ގެއްލުން މުޅި ރާއްޖެ އަށް ކުރާނެ އެވެ.

"ސަރުކާރަކަށް އެފޯޑެއް ނުކުރެވޭނެ މަޖިލިސް ހުއްޓާލައިގެން ތިބޭކަށް. އޭގެ ގެއްލުން ސިޔާސީ ގޮތުން އެންމެ ބޮޑަށް ކުރާނީ ވެސް ރައީސް އިބްރާހިމް މުހައްމަދު ސޯލިހަށް. ކުރަން ޖެހޭ އެތައް ކަމެއް ހުއްޓޭނެ. މުޅި ސަރުކާރު ހުއްޓޭ ކަންކަން ވެސް އަތުވެދާނެ. ރައްޔިތުންގެ ތާއީދު ހޯދަން ބޭނުންވާ އެތައް ކަމެއް ހުއްޓޭނެ،" އަސްލަމް ވިދާޅުވި އެވެ.

ވިލިމާލެ ދާއިރާގެ އެމްއެންޕީ މެމްބަރު އަހުމަދު އުޝާމް ވިދާޅުވި ގޮތަށް މި ކަމުގެ ފުރިހަމަ ޒިންމާ ނަގަން ޖެހޭނީ މަޖިލީހުގެ ހުރިހާ މެމްބަރުންނެވެ.

"ވަކި ޕާޓީއެއް ކިޔާނެ ކަމެއް ނެތް. ރިޔާސަތެއް ކިޔާނެ ކަމެއް ނެތް. ވަކި މެމްބަރެއް ކިޔާނެ ކަމެއް ނެތް. އަޅުގަނޑުމެން އެންމެން ވެސް މަޖިލީހުގެ ގަވާއިދާއި އުސޫލުތަކާ ހިލާފަށް ކަންކަން ކުރުމުގެ ނަތީޖާ މިއަދު ފެނިގެން މިދަނީ،" އުޝާމް ވިދާޅުވި އެވެ.

އެކަމަކު ދައުލަތް ހިންގުމުގެ ބިޔަ ބޮޑު އެއް ބާރުގައި ބުރަކިޖެހޭ ފަދަ ގޮތަކަށް އެއްވެސް ގާނޫނެއް ނޫނީ ގަވާއިދެއް ވެސް އޮވެދާނެ ކަމަށް ގަބޫލުކުރަން ވަރަށް ދައްޗެވެ.

ކަން އޮތީ ވެސް އެހެން ކަން މަޖިލީހުގެ އަމީންއާންމު ނަޝީދަށް ދެއްވި ހައްލުތަކުން ވެސް ސާފުކޮށް އެނގެ އެވެ.

މަޖިލީހުގެ އަމީންއާންމު ފާތިމަތު ނިއުޝާ، ނަޝީދަށް ފޮނުއްވި ތިން ސަފުހާގެ ދިގު ސިޓީއެއްގައި އޭނާ ވަނީ އީވާގެ މައްސަލަ ކުރިއަށް ގެންދެވޭނެ ހުރިހާ ހައްލުތަކެއް ހިމަނުއްވައިފަ އެވެ.

ކޮމިޓީތައް އެކުލަވާލަން ޕާޓީތަކުގެ މެދުގައި އެއްބަސް ނުވެވުނަސް، ތަޅުމަށް ގެނެސްގެން އެ ބަދަލުތައް ފާސްކުރެވޭނެ ކަމަށް އެ ސިޓީގައި އޮތެވެ.

އީވާ ވަކިކުރުމުގެ މައްސަލައިގެ ރިޔާސަތު ބަލަހައްޓަވަން ނަޝީދު އުޒުރިވެރިވެވަޑައިގަންނަވާ ނަމަ އެ މަސްއޫލިއްޔަތު، މަޖިލީހުގެ ގަވާއިދުގައިވާ ގޮތަށް އެހެން ފަރާތަކާ ހަވާލުކުރެއްވުން ވެސް ނިއުޝާ ހުށަހެޅުއްވި ހައްލުތަކުގެ ތެރޭގައި ހިމެނެ އެވެ.

"...ރިޔާސަތު ބެލެހެއްޓެވުމުގެ މަސްއޫލިއްޔަތު މަޖިލީހުގެ ގަވާއިދާ އެއްގޮތްވާ ގޮތުގެ މަތިން މަޖިލީހުގެ ރައީސް ކަނޑައެޅިގެން އެހެން ފަރާތަކާ ހަވާލުކުރައްވައ،ި އެ ޖަލްސާގައި މަޖިލީހުގެ ގަވާއިދުގެ 205 ވަނަ މާއްދާގެ (ކ) ގައި ބުނާ ބަހުސްގެ ވަގުތުތަކާއި އަދަދުތައް މަޖިލީހުން ކަނޑައަޅައި، އެ ގަރާރުގެ މަސައްކަތް ކުރިއަށް ގެންދިއުމެވެ،" ދެވަނަ ހައްލެއްގެ ގޮތުގައި ނިއުޝާ ހުށަހެޅުއްވި އެވެ.

އެ ސިޓީގައި ނަޝީދަށް ހުށަހެޅުއްވި ތިން ވަނަ ހައްލަކީ އީވާގެ މައްސަލައިގެ ބަހުސް ކުރިއަށް ގެންދާނެ ގޮތަކާ މެދު މަޖިލީހުން ގޮތެއް ކަނޑައެޅުމަށްޓަކައި އާންމު ޖަލްސާއަކަށް އެކަން އެޖެންޑާ ކުރުމެވެ.

އެ ސިޓީއަށް އެކަނި ބެލި ނަމަވެސް، މަޖިލިސް ހުއްޓިގެން މި އުޅެނީ ހަމައެކަނި މަޖިލީހުގެ ގަވާއިދުގައި ހުރި އުނިކަމެއްގެ ސަބަބުން ނޫން ކަން ވަރަށް ސާފެވެ. އެ އިން ކޮންމެވެސް އެއް ހައްލެއް ހިޔާރު ކުރިޔަސް މަރުތަޅު ނެއްޓި، މަޖިލިސް އަލުން ހިނގައިގަންނާނެ އެވެ.

އަމީން އާންމު ހުށަހެޅުއްވި ހައްލުތަކުގެ ބަހުސާ ހަމައަށް ވެސް ގެންދާނެ ފުރުސަތެއް މަޖިލިހުގެ ރިޔާސަތުން ނުދިނެވެ. މަޖިލިހުގެ ރިޔާސަތަކީ ޖަލްސާތަކުގެ އެޖެންޑާތައް ކަނޑައެޅުމާއި މަޖިލިހުގައި މަޝްވަރާ ލީޑް ކުރައްވާ އެންމެ އިސްފަރާތް ކަމަށް ވިޔަސް އެ ލީޑަޝިޕެއް ވެސް ނުފެނުނެވެ.

"މިސާލަކަށް އަމީން އާންމު ހުށަހެޅުއްވި ކަންކަމާ ގުޅޭ ގޮތުން މަޝްވަރާ ކުރަން މަޖިލިހުގައި ތިއްބަވާ ސިޔާސީ ޕާޓީތަކުގެ އިސްބޭފުޅުން އެއްމޭޒުދޮށަށް ރައީސް ނަޝީދު އިސްވެ ގެންނަވަން ވީ ނޫންތޯ؟ އަމީން އާންމު ހުށަހެޅުއްވި ހައްލުތަކާއި އެމްޑީޕީގެ ޕާލަމެންޓްރީ ގުރޫޕުން މަޖިލިހުގެ ގަވާއިދަށް ހުށަހެޅި އިސްލާހުތަކާ މެދު މަޖިލިހުގެ ފްލޯ އިން ބޭރުން މަޝްވަރާކޮށް، އެއްބަސްވުންތަކަކާ ހަމައަށް ދާން ވެސް ރައީސް ނަޝީދު މަސައްކަތްޕުޅެއް ނުކުރައްވައޭ. ދެން ކިހިނެއްތޯ ހައްލެއް ފެންނާނީ،" މަޖިލިހުގައި ކުރިން ރިޔާސަތު ބެލެހެއްޓެވި އޭރުގެ އެންމެ ސީނިއާ އެއް މެމްބަރު ވިދާޅުވި އެވެ.

އޭނާ ވިދާޅުވީ، އެ ދުވަސްވަރު ނަމަ މަޖިލިހުގެ ޖަލްސާ އިން ބޭރުން ގިނަ މަޝްވަރާތަކެއް ކޮށް ހައްލު ހޯދާ ކަމަށެވެ.

"ޖަލްސާގައި އަޅުގަނޑު އިށީންނާނީ އަންނާނެ ހުރިހާ ކަމަކަށް ވިސްނައިގެން. ދެ ފަޅީގެ ބައެއް އިސްވެރިންނަށް ވަކިން ފޯނުން ގުޅައިގެން އެ ބޭފުޅުންގެ އޮޕީނިއަން ހޯދަން. ކުރިއަށް ދެވޭނެ ގޮތެއް ހޯދައިގެން ޖަލްސާގެ ރިޔާސަތުގައި އަޅުގަނޑުމެންގެ ދުވަސްވަރު އިށީންނަނީ ވެސް. މާ ހޫނު ވެއްޖިއްުޔާ ޖަލްސާ މެދުކަނޑާލާފައި އެންމެން މަޝްވަރާ ކޮށްފައި އަންނައިރު ހައްލެއް ފެންނާނެ،" އޭނާ ވިދާޅުވި އެވެ.

ގާނޫނުއަސާސީ އިސްލާހު ކުރި ދުވަސް ވެސް ފެނިއްޖެ އެވެ. މި އަށް ވުރެ މާ ހޫނެވެ. އެކަމަކު، އޭރު ފެނުނީ ހައްލު ހޯދަން އިސްކަން ދިން ތަނެވެ. ރިޔާސަތުން މާ ބޮޑަށް ދޫދިން ތަން ފެނުނެވެ.

އެކަމަކު، މިހާރު ނަމަ އެއްވެސް ބަޔަކު ގޮތް ދޫކުރަން ބޭނުން ނުވާ ކަން ފާއިތުވި ދެ ހަފްތާގެ މަޖިލިސް ޖަލްސާތައް ބެލި މީހަކަށް އެނގޭނެ އެވެ. އެއް ބަޔަކު ބޭނުން ނުވާ ގޮތެއް ތަޅުމާ ހަމައަށް އައުމާއެކު، ގަޑުބަޑުކޮށް، ހައިޖާނު އުފައްދާ ޖަލްސާ ހުއްޓުވަނީ އެވެ. ސިޔާސީ ގޮތުން ލިބިދާނެ ދެރައެއް ނޫނީ މޮޅެއްގެ ދަހިވެތިކަމުގަ އެވެ.

އެ ހުރިހާ ހައިޖާނުގެ ނަތީޖާއަކީ މިހާރު އަމަލުކުރަމުންދާ ފެހި ގާނޫނުއަސާސީ ވުޖޫދުވީ ފަހުން މިއަދަކީ ރާއްޖޭގެ ބަރުލަމާނީ ތާރީހުގައި ލިޔެވޭނެ ހުތުރު ހާދިސާ އަށް ވުމެވެ. މަޖިލީހުގެ ވަރުގަދަ ރިޔާސަތުގައި އިށީންނާނެ ބޭފުޅަކު ނެތިގެން، ދައުލަތުގެ އެއް ބާރު ވާކޮށްލި ނާމާން ދުވަހެކެވެ. ފެނުނީ ރިޔާސަތެއްގެ ނާގާބިލް ކަމެވެ.