ޔަންގް ބޯއީޒް އިން ޒުވާން ކުޅުންތެރިންނާ އެކު ނުކުތް ޔުނައިޓެޑް ހިފަހައްޓައިފި

މެންޗެސްޓާ (ޑިސެމްބަރު 9) - ޗެމްޕިއަންސް ލީގު ގުރޫޕް ސްޓޭޖު ފަހު މެޗުގައި ސްވިޒަލެންޑުގެ ޔަންގް ބޯއީޒް އިން، ،ޒުވާން ސްކޮޑަކާ އެކު ނުކުތް މެންޗެސްޓާ ޔުނައިޓެޑް 1-1 އިން ހިފަހައްޓައިފި އެވެ.

ޔަންގް ބޯއީޒްއާ އެކު ޔުނައިޓެޑުގެ ދަނޑުގައި ކުޅުނު މި މެޗް އެއްވަރުވީ 1-1 އިންނެވެ. މި މެޗުގެ ކުރިން ވެސް ޔުނައިޓެޑަށް އޮތީ ގުރޫޕުގެ އެއްވަނައިގެ ގޮތުގައި ދެވަނަ ބުރު ޔަގީންވެފަ އެވެ. ޔުނައިޓެޑާ އެކު ދެން މި ގުރޫޕުން ދެވަނަ ބުރަށް ދާ ޓީމެއް ޔަގީން ވާނީ، އިޓަލީގެ އެޓަލާންޓާ އާއި ސްޕެއިންގެ ވިޔަރެއާލް ބައްދަލުކުރާ މެޗަށް ފަހު އެވެ. ރޭ ކުޅެން ހަމަޖެހިފައި އޮތް މެޗު ފަސްކުރީ، ނުކުޅެވޭ ވަރަށް ދަނޑަށް ސްނޯ ފައިބަމުން ދިޔުމުގެ ސަބަބުންނެވެ.

ޔުނައިޓެޑުގެ އާ ކޯޗު ރާލްފް ރަންގްނިކް ވަނީ އޭނާގެ ފުރަތަމަ މެޗުގައި، ޔުނައިޓެޑުން ލީގުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުގެ ފުރަތަމަ 11 ގައި ހިމެނުނު ހުރިހާ ކުޅުންތެރިންނަށް ރެސްޓު ދީފަ އެވެ. އަދި ރޭގެ މެޗަށް ނެގި 11 ކުޅުންތެރިންގެ ތެރެއިން ހަ ކުޅުންތެރިން މި ސީޒަނުގައި ޕްރިމިއާ ލީގު މެޗެއްގައި ވެސް ސްޓާޓު ކޮށްފައެއް ނުވެ އެވެ.

ޔުނައިޓެޑު ކެޕްޓަނެއްގެ ގޮތުގައި ރޭ ކުޅުނު ނެމަންޔާ މަޓިޗް ކުޅުނީ އެރިކް ބާއިއާ އެކު ސެންޓަ ބެކަށެވެ. ފުލްބެކް ވަން ބިސާކާ އާއި ލޫކް ޝޯ މި މެޗުގައި ސްޓާޓް ކުރިއިރު، ހުއާން މަޓާ އާއި ޑޮނީ ވެން ޑަ ބީކް އަދި ޖެސީ ލިންގާޑާއި މޭސަން ގްރީންވުޑްގެ އިތުރުން އައިވަރީ ކޯސްޓުގެ އަމަޑް ޑިއާލޯ އާއި ސްވިޑެންގެ އެންތަނީ އެލަންގާ ވެސް ވަނީ މެޗު ސްޓާޓް ކޮށްފަ އެވެ. ޔުނައިޓެޑުގެ ގޯލު ބެލެހެއްޓީ ޑީން ހެންޑަސަން އެވެ.

މެޗުގެ ނުވަ ވަނަ މިނިޓުގައި ޔުނައިޓެޑުގެ ލޫކް ޝޯގެ ކްރޮހަކުން ގްރީންވުޑް ޖެހި ރީތި ގޯލުން އެ ޓީމު ލީޑު ނަގާފައި ވަނިކޮށް، ޔަންގް ބޯއީޒް އިން ވަނީ ފުރަތަމަ ހާފު ނިމުމުގެ ކުރިން ނަތީޖާ އެއްވަރު ކޮށްފަ އެވެ.

ރަންގްނިކް މި މެޗުގައި ވަނީ ޔުނައިޓެޑުގެ ޒުވާން ގިނަ ކުޅުންތެރިންތަކަކަށް ފުރުސަތު ދީފަ އެވެ. ޓެޑެން މެންގީ އާއި ޝޯލާ ޝޯއެޓީރޭ އާއި ޒިދާން އިގްބާލާއި ޗާލީ ސެވޭޖަށް، ފަހު ހާފުގައި ފުރުސަތު ދިންއިރު، ތިންވަނަ ކީޕަރު ޓޮމް ހީޓަން، 35، ވެސް ވަނީ ފަހު ހާފުގައި ކުޅެން އަރައިފަ އެވެ. މި މެޗަކީ ޔުނައިޓެޑުގެ އެކަޑަމީން ތަމްރީނު ވެގެން 2005 ވަނަ އަހަރު ޕްރޮފެޝަނަލް ފުޓުބޯޅަ ކުޅެން ފެށި ހީޓަން ޔުނައިޓެޑަށް ކުޅެދިން ފުރަތަމަ މެޗެވެ.

ޗާލީ ސެވޭޖް އަކީ ޔުނައިޓެޑުގެ އެކަޑަމީން ތަމްރީނު ވެގެން ޕްރޮފެޝަނަލް ފުޅުބޯޅަ ކުޅުނު، ކުރީގެ ވޭލްސް ގައުމީ ޓީމުގެ މިޑްފީލްޑަރު ރޮބީ ސެވޭޖްގެ ދޮށީ ދަރިފުޅެވެ. ބައްޕަ ރޮބީ ސެވޭޖް، 47، ޔުނައިޓެޑްގެ ސީނިއާ ޓީމަށް މެޗެއް ކުޅުމުގެ ފުރުސަތު ނުލިބުނުއިރު، ރޭގެ މެޗަކީ ދަރިފުޅު ޗާލީ ސެވޭޖް، 18، ޔުނައިޓެޑުގެ ސީނިއާ ޓީމަށް ކުޅެދިން ފުރަތަމަ މެޗެވެ.

ޗާލީ އާއެކު ކުޅެން އެރުވި އިގްބާލް ވެފައި ވަނީ ޔުނައިޓެޑްގެ ސީނިއާ ޓީމަށް ކުޅުނު، އިނގިރޭސި ވިލާތަށް އުފަން ދެކުނު އޭޝިއާ ދަރިކޮޅުގެ ފުރަތަމަ ކުޅުންތެރިޔާއަށެވެ. އިނގިރޭސިވިލާތުގެ އިތުރުން ޕާކިސްތާނާއި އިރާގަށް ވެސް ކުޅުމުގެ ފުރުސަތު އިގްބާލަށް އެބަ އޮތެވެ. އޭނާ ވަނީ މިއަހަރު، އިރާގުގެ 23 އަހަރުން ދަށުގެ ޓީމަށް ކުޅެން ފަށައިފަ އެވެ.

މެންޗެސްޓާ ޔުނައިޓެޑަށް ގުރޫޕުގެ އެއްވަނަ ލިބެނީ 11 ޕޮއިންޓާ އެކު އެވެ. ވިޔަރެއާލް ހަތް ޕޮއިންޓާ އެކު ދެވަނައިގައި އޮތްއިރު އެޓަލާންޓާ ތިންވަނައިގައި އޮތީ ހަ ޕޮއިންޓާ އެކު އެވެ. ފުލުގައި ނިންމާލަން ޖެހުނު ޔަންގް ބޯއީޒް އަށް ލިބިފައި ވަނީ ފަސް ޕޮއިންޓެވެ.

ޗެމްޕިއަންސް ލީގު ގުރޫޕް ޖީގެ އެއްވަނަ ހޯދީ، 11 ޕޮއިންޓާ އެކު ފްރާންސްގެ ލިލް އެވެ. އެ ޓީމު ވަނީ ޖަރުމަންގެ ވުލްވްސްބާގް 3-1 އިން ބަލި ކޮށްފަ އެވެ. ގުރޫޕުގެ ދެވަނަ ހޯދީ، ރޭ ސްޕެއިންގެ ސެވިއްޔާ ބަލިކުރި އޮސްޓްރިއާގެ ރެޑްބުލް ސަލްޒްބާގެވެ. ސަލްޒްބާގަށް ވަނީ 10 ޕޮއިންޓް ލިބިފަ އެވެ. ހަ ޕޮއިންޓާ އެކު ތިންވަނައިގައި ނިންމި ސެވިއްޔާ ވާދަކުރާނީ ޔޫރޮޕާ ލީގުގަ އެވެ.