ފަހު ވަގުތު އަލީ އަޝްފާގް (ދަގަނޑޭ) ފޮނުވާލި ޕެނަލްޓީން ނިއު ރޭޑިއަންޓުން ޗެމްޕިއަން މާޒިޔާ ހުއްޓުވައިފި އެވެ.
ދިރާގު ދިވެހި ޕްރިމިއާ ލީގުގައި ރޭ ކުޅުނު މެޗަށް ނުކުތުމުގެ ކުރިން މާޒިޔާ އަށް އޮތީ ލީގު ޗެމްޕިއަންކަން ކަށަވަރުވެފަ އެވެ. އެއީ ދެވަނައިގައި އޮތް އޮޑި ސްޕޯޓްސް، އިއްޔެ ހަވީރު ކުޅުނު މެޗުން މޮޅު ނުވެވުމުންނެވެ.
ގައުމީ ފުޓްބޯޅަ ދަނޑުގައި ރޭ ކުޅުނު މެޗު އެއްވަރުވީ 2-2 ންނެވެ.
މެޗުގެ ހުރިހާ ލަނޑުތަކެއް ވެސް ޖެހީ ދެވަނަ ހާފުގަ އެވެ. އެ ހާފުގެ ކުރީކޮޅު ހަސަން ނަޒީމް (ޗޯޓް) އާއި ކެޕްޓަން ސަމޫހް އަލީ ޖެހި ލަނޑާ އެކު މާޒިޔާއިން ދެ ލަނޑުގެ ލީޑެއް ނެގި އެވެ. އެކަމަކު މާޒިއެ ލީޑްގައި މާޒިޔާ އަށް ހިފަހައްޓާ ނުލެވުނެވެ.
ނިއުގެ ފުރަތަމަ ލަނޑު ޖެހީ ނައިޖީރިއާގެ ފޯވާޑް އަލްހާޖީ ޖޭރޯ އެވެ. އޭނާ ލަނޑު ޖެހީ 58 ވަނަ މިނެޓްގަ އެވެ.
އަޝްފާގް ކުޅެން ނުކުތީ ބަދަލު ކުޅުންތެރިޔެއްގެ ގޮތުގައި މެޗުގެ 82 ވަނަ މިނެޓްގަ އެވެ. ޕެނަލްޓީން އޭނާ ލަނޑު ޖެހީ އިތުރު ވަގުތުގެ 10 ވަނަ މިނެޓްގަ އެވެ.
އެ ޕެނަލްޓީއާ އެކު މެޗު ވެސް ނިމުނެވެ. ވިދިވިދިގެން ދެ މެޗުގައި އަޝްފާގް މިހާރު ވަނީ ލަނޑު ޖަހައިފަ އެވެ. ނިއު އަށް ލީގުގައި ބާކީ އޮތީ އެންމެ މެޗެކެވެ. އަންނަ ބުރާސްފަތި ދުވަހު ކުޅޭ އެ މެޗުގައި ނިއުއިން ނުކުންނާނީ ގްރީން ސްޓްރީޓާ ދެކޮޅަށެވެ.