ކްލަބް އީގަލްސްއާ 1-1 އިން އެއްވަރުކޮށް އޮޓަމެޓިކް ރެލިގޭޝަނުން ސަލާމަތް ވާން ކްލަބް ގްރީން ސްޓްރީޓްސް މުހިއްމު ޕޮއިންޓެއް ހޯދައިފި އެވެ.
ލަނޑެއް ނުޖެހި އެއްވަރުވާން ދިޔަ މި މެޗުގެ 90 ވަނަ މިނިޓުގައި ގްރީން ވަނީ ގޯލެއް ޖަހައި ލީޑު ނަގައިފަ އެވެ. ކެޕްޓަން ރިލްވާން ވަހޫދު (ރިލޭ) ނަގައިދިން ކޯނަރު ބޮލުން ޖަހައި މި ލަނޑު އެ ޓީމަށް ޖަހައިދިނީ އުޒްބަކިސްތާން ޑިފެންޑަރު ސުކުރާލި ޕުލަޓޯވް އެވެ.
ނަމަވެސް އިރުރު ވަގުތުގެ ހަތްވަނަ މިނިޓު ތެރޭ އިސްމާއިލް އީސަ (މެސީ) ދިން ތުރޫ ޕާހަކުން އީގަލސް އަށް ނަތީޖާ އެއްވަރު ކޮށްދިނީ ހިސާމް ސަލީމް (ކޮކީ) އެވެ.
އީގަލްސް އާއި ގްރީން ފުރަތަމަ ބުރުގައި ބައްދަލުކުރި މެޗު ގްރީން ވަނީ މެޗުގެ އެންމެ ފަހު ވަގުތު ގޯލު ޖަހައިގެން 3-2 އިން މޮޅުވެފަ އެވެ. ނަމަވެސް އެ މެޗުގައި ގްރީން މޮޅު ކޮށްދޭން ދެ ލަނޑު ޖަހައިދިން އިރާގުގެ ފޯވާޑް އޮބައިދާ ކަދިމް އަހުމަދު މިހާރު އެ ޓީމަކު ނެތެވެ.
މިރޭގެ ނަތީޖާއާ އެކު އީގަލްސް ފަސްވަނައިގައި އޮތީ 17 މެޗުން ލިބުނު 23 ޕޮއިންޓާ އެކު އެވެ. ވިކްޓަރީ ހަވަނައިގައި އޮތީ ދެ ޕޮއިންޓް މަދުކޮށެވެ.
އީގަލްސް އަތުން ހޯދި މި ޕޮއިންޓާ އެކު އަށްވަނައިގައި އޮތް ގްރީން ސްޓްރީޓްސް ވަނީ 17 މެޗުން 12 ޕޮއިންޓް ހޯދައިފަ އެވެ. ޓީސީ ކުރީގައި އޮތީ ފަސް ޕޮއިންޓް އިތުރަށް ހޯދައިގެންނެވެ.
ލީގުގެ ފުލަށް ދާ ދެ ޓީމު އޮޓަމެޓިކުން ދެވަނަ ޑިވިޝަނަށް ރެލިގޭޓް ވާއިރު، ހަތްވަނަ އާއި އަށްވަނަ ޓީމު، ރެލިގޭޝަން ޕްލޭއޮފް ކުޅޭނެ އެވެ.
ލީގު ތާވަލްގެ ނުވަވަނައިގައި އޮތް ވެލެންސިއާ އަށް ވަނީ 16 މެޗުން އަށް ޕޮއިންޓް ލިބިފަ އެވެ. އަދި ފުލުގައި އޮތް ޔުނައިޓެޑް ވިކްޓަރީ (ޔޫވީ) އަށް ވަނީ ހަތް ޕޮއިންޓް ލިބިފަ އެވެ.
ލީގުގައި މާދަމާ ހަވީރު ޔޫވީ އާއި ވެލެންސިއާ ބައްދަލުކުރާނެ އެވެ.