ޕްރިމިއާ ލީގުގެ ތާވަލުގެ އެންމެ ފުލުގައި އޮތް ވުލްވްސް އަތުން 2-1 އިން ބަލިވެ، ލިވަޕޫލަށް ގަދަ ހަތަރަކަށް އެރުމުގެ ފުރުސަތަށް ހުރަސްތަކެއް ކުރިމަތިވެއްޖެ އެވެ.
ވުލްވސްގެ މޯލިނިއު ސްޓޭޑިއަމްގައި ރޭ ކުޅުނު މެޗުން ވުލްވްސް މޮޅުވީ މެޗުގެ އިތުރު ވަގުތުގެ ތެރޭގައި އަންދްރޭ ކާމިޔާބުކޮށްދިން ލަނޑުންނެވެ. މިއީ 2017 ވަނަ އަހަރު ކްރިސްޓަލް ޕެލަސް އަތުން ޗެލްސީ ބަލިވި ފަހުން، ލީގުގެ އެންމެ ފުލުގައި އޮތް ޓީމެއް އަތުން އެންމެ ފަހުގެ ޗެމްޕިއަނުން ބަލިވި ފުރަތަމަ ފަހަރެވެ.
މެޗުގެ ފަހު ކޮޅުގައި ރޮޑްރިގޯ ގޯމޭޒް ޖެހި ލަނޑުން ވުލްވްސް ލީޑް ނެގި އެވެ. އޭގެ ފަސް މިނެޓް ފަހުން މުހައްމަދު ސަލާހު ވަނީ ލަނޑެއް ޖަހައި މެޗުގެ ނަތީޖާ ލިވަޕޫލަށް ހަމަހަމަކޮށްދީފަ އެވެ. މިއީ މިދިޔަ ނޮވެމްބަރު މަހަށްފަހު ލީގުގައި ސަލާހު ޖެހި ފުރަތަމަ ލަނޑެވެ.
މެޗު ނިމެން ދަނިކޮށް އަންދްރޭ ޖެހި ލަނޑާއެކު ލިވަޕޫލަށް ވަނީ މި ސީޒަނުގައި އިތުރު ހިތްދަތިކަމަކާ ކުރިމަތިލާން ޖެހި ފައެވެ. ތަފާސްހިސާބުތަކުން ދައްކާ ގޮތުގައި، މި ސީޒަނުގައި މެޗުތަކުގެ ފަހު 15 މިނެޓުގެ ތެރޭގައި ލިވަޕޫލް ކޮޅަށް 14 ލަނޑު ވަނީ ވަދެފައެވެ. މީގެ ތެރެއިން 5 ލަނޑަކީ 90 މިނެޓު ހަމަވެގެން ދެއްކި އިތުރު ވަގުތުގައި ވަދެފައިވާ ލަނޑުތަކެވެ.
މެޗަށްފަހު ވާހަކަ ދައްކަމުން ކޯޗު އާނެ ސްލޮޓް ވަނީ މެޗުގެ ފަހު ވަގުތު، ބައިކޮޅަށް ލަނޑު ވަދެ ލިވަޕޫލަށް ހިތްދަތި ނަތިޛާއާ ކުރިމަތިލާން ޖެހޭކަން ފާހަގަ ކޮށްފަ އެވެ.
"މިއީ ވަރަށް ދެރަ ނަތީޖާއެއް. އަހަރެމެންނަށް މާ ގިނަ މެޗުތަކުން ބަލިވެ، ޕޮއިންޓްތައް އެބަ ގެއްލޭ،" ސްލޮޓް ބުންޏެވެ.
އޭނާ ބުނީ އެންމެ ފަހުން ކުޅުނު 22 މެޗުގެ ތެރެއިން ލިވަޕޫލް ބަލިވި ތިން މެޗަކީވެސް މެޗުގެ އިތުރު ވަގުތުގައި ވަން ލަނޑުތަކުން ބަލިވި މެޗުތަކެވެ. މި ނަތީޖާއާއެކު ލިވަޕޫލް ތާވަލުގެ 5 ވަނައިގައި އޮތް ނަމަވެސް، މިރޭ އެސްޓަން ވިލާ އަތުން ޗެލްސީ މޮޅުވެއްޖެނަމަ ލިވަޕޫލް 6 ވަނައަށް ފުރޮޅާލާނެ އެވެ.
މި މެޗުގެ 18 ވަނަ މިނެޓުގައި، ދެ ޓީމުގެ ސަޕޯޓަރުން ވަނީ ކުރިން ވުލްވްސް އަދި ލިވަޕޫލަށް ކުޅުނު ޑިއޯގޯ ޖޮޓާގެ ހަނދާނުގައި ވަގުތުކޮޅެއް ހާއްސަކޮށްފަ އެވެ. ޖޮޓާ އަކީ މޯލިނިއު ސްޓޭޑިއަމްގައި 18 ނަމްބަރު ޖާޒީ ބޭނުންކުރި ކުޅުންތެރިޔެކެވެ.
މިދިޔަ އަހަރު މެޑްރިޑްގައި ހިނގި ކާރު އެކްސިޑެންޓެއްގައި ޖޯޓާ ވަނީ މަރުވެފަ އެވެ.
ވުލްވްސްގެ މައްޗަށް ބަދަލުހިފުމުގެ ފުރުސަތު އަންނަ ހުކުރު ދުވަހު ލިވަޕޫލަށް ލިބޭނެ އެވެ. އެފްއޭ ކަޕްގެ ފަސްވަނަ ބުރުގައި ވުލްވްސްއާ ދެކޮޅަށް އެރޭ ލިވަޕޫލުން ކުޅޭނެ އެވެ.