ރާއްޖޭގައި އިންޓަނޭޝަނަލް ފެންވަރުގެ ފުޓްބޯޅަ ޓްރެއިނިން ފެސިލިޓީތަކެއް އެޅުމަށް ސަރުކާރުން އިއުލާނުކޮށް އެކަުމުގެ ބޭނުމަށް އެފްއޭއެމް އާއި އެޗްޑީސީއާ ދެމެދު ވީ އެއްބަސްވުންތަކުގެ ތެރެއިން އެފްއޭއެމުން ސަބްލީޒްކުރި ބިންތަކުން ލިބުނު ފައިސާއިން ގާތްގަނޑަކަށް 30 މިލިއަން ރުފިޔާއަށް ވީގޮތެއް ނޭންގި ގެއްލިފައިވާ ކަމަށް އޮޑިޓް ރިޕޯޓުން ދައްކައިފި އެވެ.
އެކަމާ ގުޅިގެން އޮޑިޓް އޮފީހުން ކުރިއަށްގެންދިޔަ ހާއްސަ އޮޑިޓުގެ ރިޕޯޓުގައިވާ ގޮތުން އެފްއޭއެމް އާއި އެޗްޑީސީއާ ދެމެދު ޖުލައި 11 2018 ގައި ވީ އެއްބަސްވުމުގެ ދަށުން ހުޅުމާލެއިން 230،000 އަކަފޫޓުގެ ބިމުގެ ސްލޮޓްތަކެއް ކުރަށް ދޫކޮށްފައިވެ އެވެ. އަދި އެފްއޭއެމުން އެ ބިންތައް 15 ފަރާތަކަށް ދޫކޮށްފައިވެ އެވެ. އެ މުއާމަލާތްތައް ހިންގާފައިވަނީ 2021 އިން 2024 އާ ދެމެދުގަ އެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުން މިދިޔަ އަހަރުގެ ނިޔަލަށް އެ އެއްބަސްވުންތަކުގެ ދަށުން 52 މިލިއަން ރުފިޔާ އެފްއޭއެމްއަށް ލިބެން ޖެހެ އެވެ. ނަމަވެސް އޭގެ ތެރެއިން 40 ޕަސެންޓް ފައިސާ އެފްއޭއެމްއަށް ވަދެފައިވާކަން ރެކޯޑުތަކުން ފެންނާކަށް ނެތް ކަމަށް ރިޕޯޓުގައިވެ އެވެ.
ގެއްލުނު ފައިސާގެ ތެރޭގައި ބިމުގެ ސްލޮޓްތަކާއި އިމާރާތުގެ ފްލޯތައް ކުއްޔަށް ނެގި ފަސް ފަރާތަކުން ނަގުދު ފައިސާއިންނާއި ޗެކުން ދެއްކި ފައިސާ އެމްއޭއެމްގެ ބައެއް އިސްވެރިން ސޮއި ހިމެނޭ ރަސީދުތަކާއި ޕޭމެންޓް ވައުޗާތަކުން ލިބުނު 14 މިލިއަން ރުފިޔާ ހިމެނެ އެވެ. އެކަމަކު އެ ފައިސާ އެފްއޭއެމްގެ އެކައުންޓްތަކަށް ޖަމާކޮށްފައެއް ނުވެ އެވެ. އަދި ނަގުދު ފައިސާގެ ގޮތުގައި ވެސް ލިބިފައިވާކަން ވެސް އެފްއޭއެމްގެ ހިސާބުތަކުން ނުދައްކަ އެވެ.
އެފައިސާގެ ތެރެއިން 9.9 މިލިއަން ރުފިޔާގެ ރަސީދުތަކުގައި ސޮއިކޮށްފައިވަނީ، މިހާރު ވެސް އެފަދަ މައްސަލައަކާ ގުޅިގެން ޝަރީއަތް ނިމެންދެން ބަންދުކޮށްފައިވާ އެފްއޭއެމްގެ އޭރުގެ ޑިރެކްޓާ އޮފް ފައިނޭންސް މުހައްމަދު އަގީލެވެ. ތިން މިލިއަން ރުފިޔާގެ ރަސީދެއްގައި އޭރުގެ ރައީސް ބައްސާމު އަލީ ޖަމީލު ސޮއިކޮށްފައިވާ އިރު އޭރުގެ ޖެނެރަލް ސެކްރެޓަރީ ހުސެއިން ޖަވާޒް 1.2 މިލިއަން ރުފިޔާގެ ރަސީދެއްގައި ސޮއިކޮށްފައިވެ އެވެ. މީގެ ތެރެއިން ބައްސާމު މިހާރު ވެސް ހުރީ އެފްއޭއެމްގެ ހިޔާނާތާ ގުޅޭ މައްސަލައެއްގައި 23 އަހަރަށް ޖަލަށް ލާން ހުކުމްކޮށްފަ އެވެ.
ފުޓްބޯޅަ ޓްރެއިނިން ފެސިލިޓީ އެޅުމަށް އެފްއޭއެމްއިން ދޫކުރި ސްލޮޓްތަކުން ލިބުނު ފައިސާގެ ތެރެއިން އިތުރު 14 މިލިއަން ރުފިޔާގެ ތެރެއިން ބޭރު ފައިސާ ގަނެ ވިއްކުމަށް ރަޖިސްޓްރީކޮށްފައިވާ އަމިއްލަ ކުންފުންޏެއްގެ އެކައުންޓަށް ޖުމްލަ 8.9 މިލިއަން ރުފިޔާ ޖަމާކޮށްފައިވާ ކަން އެނގެ އެވެ. އަދި އެހެން ބައެއް އެކައުންޓުތަކަށް ވެސް އެފަދަ މުއާމަލާތްތައް ހިންގުމުގެ ނަމުގައި 5.1 މިލިއަން ރުފިޔާ ޖަމާކޮށްފައިވާކަން ވެސް އެނގެ އެވެ.
ބޭރު ފައިސާ ނުވަތަ ޑޮލަރުގެ މުއާމަލާތް ހިންގުމަށް 8.9 މިލިއަން ރުފިޔާ ޖަމާކޮށްފައިވަނީ އެމްއެސް ފައިނޭންސް ކަރެންސީ އެކްސްޗޭންޖު ކިޔާ ކުންފުންޏަކަށެވެ. އިކޮނޮމިކް މިނިސްޓްރީގެ ބިޒްނަސް ރަޖިސްޓްރީގައިވާ ގޮތުން އެ ކުންފުނީގެ ހިއްސާދާރުންނަކީ އިބްރާހިމް އަހުމަދާއި ނުޝްރަތް ޔޫސުފެވެ.
ޑޮލަރުގެ އެ މުއާމަލާތްތައް ހިންގާފައިވަނީ 2022 އިން 2023 ވަނަ އަހަރުގެ އެކި ތާރީހުތަކުން 13 ޓްރާންސެކްޝަނެއްގެ ގޮތުގަ އެވެ.. ނަމަވެސް އެކުންފުނިން އެފްއޭއެމްއަށް އެއްވެސް ފައިސާއެއް ދައްކާފައިވާކަން އެފްއޭއެމްގެ ރެކޯޑުތަކުން ނުފެންނަ ކަމަށް އޮޑިޓް ރިޕޯޓުގައި ފާހަގަކޮށްފައިވެ އެވެ.
އެފްއޭއެމަށް ލިބުނު 5.1 މިލިއަން ރުފިޔާގެ ތެރެއިން އަގީލާއި އަމިއްލަ ހަތް ފަރާތެއްގެ އެކައުންޓަކާއި ފަސް ކުންފުންޏެއްގެ އެކައުންޓްތަކަށް ވެސް ފައިސާ ޖަމާކޮށްފައިވެ އެވެ. ނަމަވެސް އެފަރާތްތަކުގެ އެކައުންޓަށް ފައިސާ ޖަމާކޮށްފައިވާ ބޭނުން ލިޔެކިޔުމުން ފެންނަން ނެތްކަން އޮޑިޓް ރިޕޯޓުގައި ފާހަގަކޮށްފައިވެ އެވެ.
އެފްއޭއެމްގެ އެކައުންޓުން އިތުރު 1.4 މިލިއަން ރުފިޔާ ނަގުދު ފައިސާގެ ގޮތުގައި ނަގާފައިވާ އިރު އެ ފައިސާ އެފްއޭއެމްގެ ބޭނުމަށް ހަރަދުކޮށްފައިވާކަން ވެސް އެނގެން ނެތް ކަމަށް އޮޑިޓް ރިޕޯޓުގައި ބުނެފައިވެ އެވެ.
އެފްއޭއެމްއިން އެ ބިންތައް ދޫކޮށްފައިވަނީ މާކެޓު ރޭޓުތަކަށް ވުރެ ގާތްގަނޑަކަށް 90 ޕަސެންޓް ދަށް ރޭޓުތަކެއްގަ އެވެ. އެގޮތުން ހުޅުމާލެއިން ބިންތައް ދޫކުރީ އަކަފޫޓެެއް 2.9ރ. ގެ ރޭޓުންނެވެ. އޮޑިޓް ރިޕޯޓުގައިވާ ގޮތުން މާކެޓު ރޭޓުތަކުގައިވާ 20ރ. ގެ މަގުން އަކަފޫޓެއް ދޫކުރި ނަމަ، އެ ބިންތަކުން އެއްބަސްވުމުގެ މުއްދަތުގެ ތެރޭގައި އެފްއޭއެމްއަށް 591 މިލިއަން ރުފިޔާ ލިބޭނެ އެވެ. އެހެންވެ ސަބްލީޒް އެގްރީމެންޓްތަކުން އެފްއޭއެމްއަށް 524 މިލިއަން ރުފިޔާގެ ގެއްލުމެއް ލިބުނު ކަމަށް އޮޑިޓް އޮފީހުން އަންދާޒާކުރެ އެވެ.