އެފްއޭއެމުން ގެއްލުނު 29 މިލިއަން ރުފިޔާގެ ބޮޑު ބައެއް ޑޮލަރު ވިއްކާ ކުންފުންޏަކަށް، ޑޮލަރެއް ނުލިބޭ!

ހުޅުމާލެ އެކަކުން ފުޓްބޯޅަ ޓްރޭނިން ސްކޫލެއް އެޅުމަށް އެފްއޭއެމަށް ދޫކުރި ބިން، އަމިއްލަ ވިޔަފާރިތަކަށް ކުއްޔަށް ދީގެން ލިބުނު ފައިސާގެ ތެރެއިން ވީނުވީއެއް ނޭނގި ގެއްލިފައިވާ 29.6 މިލިއަން ރުފިޔާ އިން ބައެއް ޑޮލަރު ވިއްކާ ކުންފުންޏަކަށް ޖަމާކޮށްފައިވާ ކަމަށާއި ނަމަވެސް ޑޮލަރު ވެސް އެފްއޭއެމަށް ނުލިބި، އެ ފައިސާ އަނބުރާ ހޯދާފައި ނުވާ ކަމަށް އޮޑިޓަ ޖެނަރަލްގެ އޮފީހުން އިއްޔެ ބުނެފި އެވެ. 

ފުޓްބޯޅަ ސްކޫލްގެ ބިމުގެ މުއާމަލާތްތަކާ ބެހޭގޮތުން އޮޑިޓާ ޖެނެރަލްގެ އޮފީހުން ކުރި ހާއްސަ އޮޑިޓުގެ ރިޕޯޓްގައި ބުނީ ޖުލައި 11، 2018 ގައި އެޗްޑީސީ އާއި އެފްއޭއެމާ ދެމެދު ހެދި އެއްބަސްވުމުގެ ދަށުން ހުޅުމާލެއިން 230,000 އަކަފޫޓުގެ ބިމެއް ދޫކުރީ ފުޓްބޯޅަ ޓްރޭނިން ސްކޫލެއް ހެދުމަށް ކަމަށެވެ

ނަމަވެސް، ބިމުގެ ބޮޑު ސަރަހައްދަކާއި އެ ތަނުގައި ހަދާފައިވާ އެކޮމޮޑޭޝަން ބްލޮކްގެ އެކި ބައިތައް އެފްއޭއެމުން 15 ފަރާތަކަށް ސަބްލީސް އުސޫލުން ކުއްޔަށް ދީފައިވާކަން އޮޑިޓުން އެނގެ އެވެ.

އޮޑިޓް ރިޕޯޓްގައި ބުނީ، 2021 ވަނަ އަހަރުން ފެށިގެން 2024 ވަނަ އަހަރުގެ ނިޔަލަށް ހަދާފައިވާ 15 ސަބްލީސް އެއްބަސްވުމެއްގެ ދަށުން 56.1 މިލިއަނަށް ވުރެ ގިނަ ރުފިޔާ އެފްއޭއެމަށް ލިބެން ޖެހެ އެވެ. އޭގެ ތެރެއިން 52.2 މިލިއަން ރުފިޔާ އެ އިދާރާ އަށް ލިބި، ބަލައިގެންފައިވާކަން އެ އެސޯސިއޭޝަނުގައިވާ ރެކޯޑްތަކުން އެނގެން އެބައޮތް ކަމަށް އޮޑިޓަ ޖެނެރަލްގެ އޮފީހުން ބުންޏެވެ.

އޮޑިޓަ ޖެނެރަލްގެ އޮފީހުން ބުނި ގޮތުގައި، ސަބްލީސް އެއްބަސްވުންތަކުގެ ދަށުން އެފްއޭއެމަށް ލިބުނު ފައިސާގެ ތެރެއިން ޖުމުލަ 29,598,200 ރުފިޔާ އެއްވެސް ކަމަކަށް ބޭނުން ނުކުރެވި ވަނީ ގެއްލިފަ އެވެ. އޭގެ ތެރެއިން:

އޭގެ ތެރެއިން އެއްވެސް ފައިސާއެއް އެފްއޭއެމްގެ އެކައުންޓަކަށް ޖަމާކޮށްފައި ނުވާކަން އޮޑިޓްގައި ފާހަގަ ކޮށްފައިވެ އެވެ. އަދި ނަގުދު ފައިސާ އިން ލިބުނުކަން ނުވަތަ އެ ފައިސާ އެފްއޭއެމްގެ އެއްވެސް ބޭނުމަކަށް ހޭދަކޮށްފައިވާކަން އެނގޭކަށް ވެސް ނެތެވެ.

އެފްއޭއެމަށް ލިބިފައިވާ ކަމަށް ބުނާ 14.10 މިލިއަން ރުފިޔާގެ އެ އެސޯސިއޭޝަނަށް ޖަމާކޮށްފައިވާކަން  ބިމުގެ އެކި ތަންތަން ކުއްޔަށް ނަގާފައިވާ ފަސް ފަރާތަކުން ހިއްސާކޮށްފައިވާ ރަސީދުތަކާއި ޕޭމަންޓް ވައުޗަރުތކުގައި ބުނެފައިވާ ކަމަށް އޮޑިޓާ ޖެނެރަލްގެ ރިޕޯޓުގައި ވެ އެވެ. އަދި އެ ފައިސާގެ ޗެކާއި ނަގުދު ފައިސާ އިން އެފްއޭއެމަށް ލިބިފައިވާ ކަމަށް، އެ އިދާރާގެ ތައްގަނޑު ޖަހައި އޭރުގެ ތިން ވެރިޔަކު ސޮއިކުރައްވައި، އެ ލިޔުންތަކުން އެނގޭ ކަމަށް ވެސް ރިޕޯޓްގައި ވެ އެވެ.

14.10 މިލިއަން ރުފިޔާގެ ތެރެއިން:

- 9.9 މިލިއަން ރުފިޔާ އެފްއޭއެމަށް ލިބިފައިވާ ކަމަށް ސޮއިކޮށްފައި ވަނީ އޭރުގެ ފައިނޭންސް ޑައިރެކްޓަރު މުހައްމަދު އަގީލް

- ތިން މިލިއަން ރުފިޔާ އެފްއޭއެމަށް ލިބިފައިވާ ކަމަށް ސޮއިކޮށްފައި ވަނީ އޭރުގެ ރައީސް ބައްސާމް އަދީލް ޖަލީލް

- 1.1 މިލިއަން ރުފިޔާ ނަގުދު ފައިސާގެ ގޮތުގައި އެފްއޭއެމަށް ލިބިފައިވާ ކަމަށް ސޮއިކޮށްފައި ވަނީ އޭރުގެ ޖެނަރަލް ސެކްރެޓަރީ ހުސައިން ޖަވާޒު 

ބިމުގެ ބައިތައް ކުއްޔަށް ނެގި ފަރާތްތަކުން ހިއްސާ ކޮށްފައިވާ ރަސީދާއި ޕޭމަންޓް ވައުޗަރުތަކުގައި އެ ފައިސާ އެފްއޭއެމަށް ލިބިފައިވާ ކަމަށް ސްޓޭމްޕް ޖަހައި ސޮއި ކޮށްފައި ވިޔަސް، އެ ފައިސާގެ އެއްވެސް ތަފްސީލެއް އެފްއޭއެމްގެ އެއްވެސް ލިޔުމަކުން ފެންނާން ނެތް ކަން އޮޑިޓްގައި ވެ އެވެ.

"މި ފައިސާގެ ތެރެއިން އެއްވެސް ޢަދަދެއް އެފްއޭއެމްގެ ބޭންކް އެކައުންޓް ތަކަށް ޖަމާކޮށްފައިނުވެ އެވެ. އޭގެ އިތުރުން، މި ފައިސާގެ ތެރެއިން އެއްވެސް އަދަދެއް ނަގުދު ފައިސާއިން ލިބުނުކަން ނުވަތަ އެފްއޭއެމްގެ ބޭނުންތަކަށް ހަރަދުކޮށްފައިވާކަން އެ އިދާރާގެ ކޭޝް ރެޖިސްޓަރީތަކާއި އެހެނިހެން ލިޔެކިޔުންތަކުން އެނގެން ނެތްކަން ފާހަގަކުރެވެ އެވެ،" ރިޕޯޓްގައި ވެ އެވެ.

ވީނުވީއެއް ނޭނގިވާ 29 މިލިއަން ރުފިޔާގެ ތެރެއިން 14.7 މިލިއަން ރުފިޔާ އެފްއޭއެމްގެ އޭރުގެ ފައިނޭންސް ޑައިރެކްޓަރާއި ވަކިވަކި ފަރުދުންނާއި އެކި ކުންފުނިތަކަށް ޖަމާކޮށްފައިވެ އެވެ.

އޭގެ ތެރެއިން ބޮޑު ބައެއް ޖަމާކޮށްފައި ވަނީ ބޭރު ފައިސާ ގަނެ ވިއްކުމުގެ ވިޔަފާރި ކުރާ އަމިއްލަ ކުންފުންޏެއް ކަމަށްވާ އެމްއެސް ފައިނޭންސް ކަރަންސީ އެކްސްޗޭންޖް ޕްރައިވެޓް ލިމިޓެޑަށެވެ.

އެފްއޭއެމުން އެ ކުންފުނީގެ އެކައުންޓަށް 8.9 މިލިއަން ރުފިޔާ ޖަމާކޮށްފައިވެ އެވެ. ނަމަވެސް އެ ފައިސާ އެ ކުންފުންޏަށް ޖަމާކުރި އެއްވެސް ސަބަބެއް އެފްއޭއެމްގެ އެއްވެސް ލިޔުމަކުން ފެންނަން ނެތް ކަމަށް އޮޑިޓަރ ޖެނެރަލް ވިދާޅުވި އެވެ.

އެކަމާ ބެހޭގޮތުން އެމްއެސް ފައިނޭންސް ކަރަންސީ އެކްސްޗޭންޖް ކުންފުނިން ބުނެފައިވާ ކަމަށް އޮޑިޓް ރިޕޯޓްގައި ވަނީ، އެ ކުންފުންޏަށް ފޮނުވި ފައިސާއަކީ ބޭރު ފައިސާގެ މުއާމަލާތަކަށް ފޮނުވާފައިވާ ފައިސާ ކަމަށެވެ.

އޮޑިޓް ރިޕޯޓްގައިވާ ގޮތުން، 8 މިލިއަން ރުފިޔާ  2022 އާއި 2023 ވަނަ އަހަރުގެ ތެރޭގައި ޗެކް މެދުވެރިކޮށް 13 ޓްރާންސެކްޝަނެއްގެ މަތިން ވަނީ އެމްއެސް ފައިނޭންސް ކަރަންސީ އެކްސްޗޭންޖް ކުންފުންޏަށް ޖަމާކޮށްފަ އެވެ.

ފީފާ އާއި އޭއެފްސީން އެފްއޭއެމަށް ފައިސާ ޖަމާކުރަނީ ޑޮލަރުންނެވެ. އެކަމަކު އެ އެސޯސިއޭޝަނުން އަމިއްލަ ކުންފުންޏެއް އަތުން ޑޮލަރު ގަންނަން ޖެހޭ ސަބަބާ މެދު އޮޑިޓަ ޖެނެރަލް ވިދާޅުވީ، އެއީ ނަޖާއިޒު ފައިދާއެއް ހާސިލު ކުރުމަށް ކޮށްފައިވާ މުއާމަލާތެއް ކަމަށް ބެލެވޭ ކަމަށެވެ.

"އެފްއޭއެމްއަކީ ބޭރު ފައިސާއިން އާމްދަނީ ލިބޭ އިދާރާއަކަށް ވެފައި، ޑޮލަރު ގަތުމަށް އެހެން ފަރާތްތަކަށް މިވަރަށް ރުފިޔާ ފޮނުވަންޖެހޭ ފަދަ ހާލަތެއް އޮތްކަން ރެކޯޑުތަކުން އެނގެން ނެތް އިރު، މި މުއާމަލާތްތަކަކީ އެފްއޭއެމް އަށް ލިބުނު ބިމުގެ ސްލޮޓުތަކުގެ ކުލީގެ ފައިސާއިން ނަޖާއިޒު ފައިދާއެއް ހޯދުމުގެ މަގުސަދުގައި ހިންގާފައިވާ މުއާމަލާތްތަކެއް ކަމަށް ބެލެވެ އެވެ.،" އޮޑިޓް ރިޕޯޓްގައި ވެއެވެ.

ޑޮލަރު ގަންނަން އެމްއެސް ފައިނޭންސް ކަރަންސީ އެކްސްޗޭންޖް ކުންފުންޏަށް އެފްއޭއެމުން 8.9 މިލިއަން ރުފިޔާ ޖަމާކޮށްފައި ވިޔަސް، އެ ކުންފުނިން އެފްއޭއެމަށް އެފަދަ އެއްވެސް ހިދުމަތެއް ނުވަތަ އެހެން ވެސް މަސައްކަތެއް ކޮށްފައި ނުވާކަން އޮޑިޓަ ޖެނެރަލް ނިޔާޒީ ވިދާޅުވި އެވެ. އަދި އެ ފައިސާ އަލުން އަނބުރައި އެފްއޭއެމަށް ހޯދިފައި ވެސް ނުވާކަން އޮޑިޓް ރިޕޯޓްގައި ފާހަގަކޮށްފައި ވެ އެވެ.

އެ ފައިސާ އެ ކުންފުންޏަށް، އެފްއޭއެމުން ޖަމާކޮށްފައި ވަނީ ބިމުގެ ކުލިން އެ އެސޯސިއޭޝަނަށް ފައިސާ ލިބޭތާ ކައިރި ތާރީހެއްގަ އެވެ.

އޮޑިޓްގައި ބުނެފައިވާ ގޮތުން 5,084,670 ރުފިޔާ އެފްއޭއެމްގެ އޭރުގެ ފައިނޭންސް ޑައިރެކްޓަރާއި އަމިއްލަ ހަތް ފަރުދަކާއި އިތުރު ފަސް ކުންފުންޏެއްގެ އެކައުންޓަށް ޖަމާކޮށްފައިވެ އެވެ. އަދި އެ ފައިސާ އެ ފަރާތްތަކުގެ އެކައުންޓަށް ޖަމާކޮށްފައިވާ ސަބަބެއް އެނގޭކަށް ނެތެވެ.

5.08 މިލިއަން ރުފިޔާ ޖަމާކޮށްފައިވާ ގޮތް: 

- 2.8  މިލިއަން ރުފިޔާ އަމިއްލަ ކުންފުނިތަކަށް

- 1.4 މިލިއަން ރުފިޔާ އަމިއްލަ ފަރުދުންގެ އެކައުންޓްތަކަށް 

- 800،000ރ. ފައިނޭންސް ޑައިރެކްޓަރުގެ އެކައުންޓަށް

ފައިނޭންސް ޑައިރެކްޓަރުގެ އެކައުންޓަށް ޖަމާކޮށްފައިވާ ފައިސާއަކީ އޭނާއަށް ލިބެންޖެހޭ މުސާރަ އާއި އިނާޔަތެއް ނޫންކަން އެނގޭކަމަށް އޮޑިޓަ ޖެނެރަލްގެ ރިޕޯޓްގައި ބުންޏެވެ.

އޮޑިޓް ރިޕޯޓުގައި އެފްއޭއެމްގެ އޭރުގެ ފައިނޭންސް ޑައިރެކްޓަރުގެ ނަމެއް ބަޔާންކޮށްފައެއް ނުވެ އެވެ. ތުހުމަތު ކުރެވޭ އެ ހިޔާނާތް ހިންގި ދުވަސްވަރު އެފްއޭއެމްގެ ފައިނޭންސް ޑައިރެކްޓަރަކަށް ހުރީ މުހައްމަދު އަގީލެވެ. ތައިލެންޑްގައި ހުއްޓާ އޭނާ ހައްޔަރުކޮށްގެން ގެނެސް، މިހާރު ވަނީ ޝަރީއަތް ނިމެންދެން އޭނާ ބަންދުކޮށްފަ އެވެ.

އޮޑިޓްގައި ބުނީ ހުޅުމާލޭގެ ބިމުން ކުލީގެ ގޮތުގައި ލިބުނު ފައިސާގެ ތެރެއިން ވީގޮތެއް ނޭނގޭ 29.5 މިލިއަން ރުފިޔާގެ ތެރެއިން 1.4 މިލިއަން ރުފިޔާ 2022 އިން 2023 އަށް ނަގުދު ފައިސާގެ ގޮތުގައި އެފްއޭއެމްގެ އެކައުންޓްތަކުން ނަގާފައިވާ ކަމަށެވެ. ނަމަވެސް އެ ފައިސާ ހަރަދު ކުރި ގޮތުގެ އެއްވެސް ތަފްސީލެއް ފެންނަން ނެތް ކަމަށް އޮޑިޓް ރިޕޯޓްގައި ވެ އެވެ.

އޮޑިޓަ ޖެނެރަލް ވަނީ މި މައްސަލަ ބަލައި، ގެއްލުނު 29 މިލިއަން ރުފިޔާ އަނބުރާ ހޯދުމަށާއި މިކަމުގައި ޒިންމާވާންޖެހޭ މީހުންނާ މެދު ޖިނާއީ ތަހުގީގެއް ހިންގުމަށް ކަމާބެހޭ މުއައްސަސާތަކަށް ލަފާ ދީފަ އެވެ.

އެ ހުރިހާ ފައިސާއެއް އެފްއޭއެމަށް ލިބުނު އިރު ވެސް، ހުޅުމާލޭ ބިމަށް އެ އެސޯސިއޭޝަނުން ކުލި ނުދައްކަ އެވެ. އެހެންވެ، އެޗްޑީސީން ވަނީ 2024 ވަނަ އަހަރު އެ ބިން އެފްއޭއެމްގެ އަތުން އަތުލައިފަ އެވެ.