ހުޅުމާލޭގައި ފުޓްބޯޅަ ޓްރެއިނިން ސްކޫލެއް ތަރައްގީ ކުރަން ފުޓުބޯޅަ ޖަމިއްޔާ، އެފްއޭއެމަށް ދޫކޮށްފައިވާ ބިމުން ބައެއް، ބާޒާރުގެ އަގަށް ވުރެ އިންތިހާ އަށް ކުޑަކޮށް ސަބްލީސް ކުރުމުގެ ސަބަބުން އެ އިދާރާ އަށް ލިބެން އޮތް 590 މިލިއަނަށް ވުރެ ގިނަ ރުފިޔާގެ އާމްދަނީއެއް ގެއްލިފައިވާކަން އޮޑިޓާ ޖެނެރަލް ހުސައިން ނިޔާޒީ ނެރުއްވި ރިޕޯޓުން ހާމަވެއްޖެ އެވެ.
މިދިޔަ ބުދަ ދުވަހު ނެރުނު އެފްއޭއެމްގެ އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، ހުޅުމާލޭ އެކަކަުން ވިޔަފާރި ބޭނުންތަކަށް ބިން ދޫކުރާ އެވްރެޖް ރޭޓަކީ އަކަފޫޓަކަށް މަހަކު 20.23 ރުފިޔާ އެވެ. ނަމަވެސް އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ ލީޑަޝިޕްގައި އަމިއްލަ ފަރާތްތަކަށް 74,958 އަކަފޫޓުގެ ބިން ދޫކޮށްފައިވަނީ އަކަފޫޓަކަށް މަހަކު އެވްރެޖްކޮށް އެންމެ 2.91 ރުފިޔާގެ ރޭޓުންނެވެ.
ފުޓްބޯޅަ ސްކޫލްގެ ބިން ކުއްޔަށް ދިނުމުގެ މުއާމަލާތްތަކާ ގުޅޭ ގޮތުން އޮޑިޓަ ޖެނަރަލް ނިޔާޒީ ނެރުއްވި ހާއްސަ އޮޑިޓް ރިޕޯޓުގައިވާ ހިސާބުތަކުން އެނގޭ ގޮތުގައި އެފްއޭއެމުން ހަދާފައިވާ އެއްބަސްވުންތަކުގެ ދަށުން ޖުމުލަ ލިބޭނެ ކަމަށް ބެލެވެނީ 66.5 މިލިއަން ރުފިޔާއެވެ.
ނަމަވެސް، އެޗްޑީސީން ބިން ދޫކުރާ މާކެޓް ރޭޓުގައި އެ ބިންތައް ކުއްޔަށް ދޫކުރި ނަމަ، އެއްބަސްވުންތަކުގެ މުއްދަތުގެ ތެރޭގައި އެފްއޭއެމަށް 590.6 މިލިއަން ރުފިޔާ ލިބޭނެ ކަމަށް އޮޑިޓަ ޖެނެރަލް ލަފާކުރައްވަ އެވެ.
މިއީ މާކެޓް ރޭޓަށް ވުރެ އިންތިހާ ކުޑަ އަގެއްގައި ބިން ދޫކުރުމުގެ ސަބަބުން އެ އިދާރާ އަށް ގެއްލުނު 524 މިލިއަނަށް ވުރެ ގިނަ ރުފިޔާގެ ބޮޑު އާމްދަނީއެކެވެ.
އޮޑިޓަ ޖެނެރަލްގެ ރިޕޯޓްގައި ފާހަގަ ކުރި ގޮތުގައި އެ ބިމުން ކުއްޔަށް ދޫކުރި ގިނަ ސްލޮޓްތަކުގެ އެއްބަސްވުމުގެ ޖުމުލަ އަގު ވަނީ އެޑްވާންސްކޮށް ނަގައިފަ އެވެ.
އޮޑިޓް ރިޕޯޓްގައިވާ ގޮތުން މިގޮތަށް ކުރިއަށް އޮތް އަހަރުތަކުގެ ކުލި އެޑްވާންސްކޮށް އެއްފަހަރާ ނެގުމުން، އެ ފައިސާގެ މިހާރުގެ އަގުން ނުވަތަ ކަރަންޓް ވެލިއުއިން 12 ޕަސެންޓުގެ ޑިސްކައުންޓް ރޭޓަކުން ވިޔަސް އެފްއޭއެމަށް ވަނީ ބޮޑު ގެއްލުމަކަށެވެ.
މާކެޓް ރޭޓުން މި ފައިސާގެ މިހާރުގެ އަގަކީ 146.4 މިލިއަން ރުފިޔާ ކަމަށް ވާއިރު، އެފްއޭއެމަށް އެޑްވާންސްކޮށް ލިބޭނެ ކަމަށް ބެލެވެނީ އެންމެ 66.5 މިލިއަން ރުފިޔާ އެވެ. މިއީ މިހާރުގެ އަގުން ބެލިޔަސް ގާތްގަނޑަކަށް 79.9 މިލިއަން ރުފިޔާގެ ގެއްލުމެކެވެ.
މި މައްސަލާގައި ކަންބޮޑުވުން ފާޅުކުރައްވަމުން އޮޑިޓާ ޖެނެރަލް ވިދާޅުވީ، މާކެޓް ރޭޓަށް ވުރެ އާދަޔާ ހިލާފަށް ކުޑަ އަގެއްގައި ބިންތައް ދޫކުރުމުގެ ސަބަބުން އެފްއޭއެމަށް ލިބެން އޮތް އާމްދަނީގެ ބޮޑު ބައެއް ގެއްލިފައިވާ ކަމަށެވެ. މިއީ އެ އިދާރާގެ "މާލީ ހަމަޖެހުމަށް" ބޮޑު ހުރަހެއްގެ ގޮތުގައި ރިޕޯޓުގައި ނިޔާޒީ ވިދާޅުވި އެވެ.
ބިންތައް އާދަޔާ ހިލާފަށް ކުޑަ އަގެއްގައި ކުއްޔަށް ދިނުމުން އެފްއޭއެމަށް ބޮޑު ގެއްލުމެއްވެ، އެ ބިން ކުއްޔަށް ނެގި ފަރާތްތަކަށް ލިބެނީ ނާޖާއިޒު ބޮޑު ފައިދާއެއް ކަމަށް ރިޕޯޓުގައި ވެ އެވެ.