ހުޅުމާލޭ ފޭސް އެކެއްގައި އެފްއޭއެމުން އިމާރާތް ކުރަން ފެށި ފުޓްބޯޅަ ސްކޫލްގެ މަސައްކަތުގެ ބޮޑު ބައެއް ނިންމާފައި ނުވިޔަސް، ކޮންޓްރެކްޓަރަށް 32 މިލިއަން ރުފިޔާ ޖަމާކުރިކަން އޮޑިޓަ ޖެނަރަލް ހުސައިން ނިޔާޒީ ނެރުއްވި ހާއްސަ އޮޑިޓުން ހާމަވެއްޖެއެވެ.
ފުޓްބޯޅަ ސްކޫލް އިމާރާތް ކުރުމުގެ މަސައްކަތް، ޖުލައި 18، 2018 ގައި އެފްއޭއެމުން އަމިއްލަ ކުންފުންޏަކާ ހަވާލުކުރީ 38 މިލިއަން ރުފިޔާއަށެވެ. މި މަސައްކަތް ހަވާލުކުރީ 90 ދުވަހުގެ ތެރޭގައި ނިންމާ ގޮތަށެވެ. ނަމަވެސް، އެ މުއްދަތުގެ ތެރޭގައި ހުރިހާ މަސައްކަތެއް ނިންމާފައި ނުވާކަން އޮޑިޓަރ ޖެނަރަލްގެ ރިޕޯޓުގައި ބުނެފައިވެއެވެ.
ފުޓްބޯޅަ ސްކޫލް އިމާރާތް ކުރުމުގެ ޕްރޮޖެކްޓްގައި ކޮންޓްރެކްޓަރާ ހަވާލު ކުރި މަސައްކަތްތަކާއި އަގުތައް
- ހަތަރު ބުރީގެ އެކޮމޮޑޭޝަން ޢިމާރާތް: 20,030,068 ރުފިޔާ އަށް
- އޮފީސް ޢިމާރާތް: 6,957,228 ރުފިޔާ އަށް
- ފުޓްބޯޅަ ދެ ޕިޗް އެޅުމަށް: 1,060,000 ރުފިޔާ އަށް
- ޢިމާރާތްތަކަށް ބޭނުންވާ ފަރުނީޗަރު ހޯދުން (ވޭރިއޭޝަން އޯޑަރ): 9,952,704 ރުފިޔާ
ޖުމުލަ: 38,000,000 ރުފިޔާ
އެކަމަކު އެ މަޝްރޫއުގައި ކޮންޓްރެކްޓަރަށް ނިންމިފައި ވަނީ އެކޮމޮޑޭޝަން އިމާރާތުގެ 90 ޕަސަންޓްގެ މަސައްކަތް އެކަންޏެވެ. އޮޑިޓް ރިޕޯޓުގައި ބުނެފައި ވަނީ މި މަޝްރޫއުގެ އަމަލީ މަސައްކަތްތައް 2020 ވަނަ އަހަރަށް ފަހު ހުއްޓުމަކަށް އައިސްފައިވާ ކަމަށެވެ. ނަމަވެސް މަސައްކަތް ހުއްޓެން މެދުވެރިވި ސަބަބު ކޮންޓްރެކްޓަރު އެފްއޭއެމަށް އަންގާފައި ވަނީ ފެބުރުއަރީ 24، 2022 ގައި ކަމަށް އޮޑިޓް ރިޕޯޓުގައި ބުނެފައިވެއެވެ.
ބާކީ ހުރި މަސައްކަތްތަކުގެ ތެރެއިން އޮފީސް އިމާރާތާއި ފުޓްބޮޅަ ޕިޗްގެ މަސައްކަތް ނުފެށުނު ސަބަބާ ބެހޭގޮތުން އެފްއޭއެމަށް، ކޮންޓްރެކްޓަރު އަންގާފައިވާ ކަމަށް ރިޕޯޓްގައި ބުނަނީ އެ މަސައްކަތް ކުރިއަށް ގެންދަންޖެހޭ ތަނުގައި ހިލަ ފުންޏަކާއި އަދި ފެންސެއް ހުރުމެވެ.
ޕްރޮޖެކްޓްގެ އަސްލު އަގު ކަމަށްވާ 38 މިލިއަން ރުފިޔާގެ ތެރެއިން ކޮންޓްރެކްޓަރަށް އެފްއޭއެމުން ދިން 32 މިލިއަން ރުފިޔާގެ ތެރެއިން 14.2 މިލިއަން ރުފިޔާއަކީ އެއްގޮތަކަށް ވެސް ފަށާފައި ވެސް ނުވާ މަސައްކަތްތަކަށް ދޫކޮށްފައިވާ ފައިސާ އެވެ.
އެފްއޭއެމުން ކޮންޓްރެޓަރަށް ފައިސާ ދެއްކި ގޮތް:
- ނިމިފައިވާ މަސައްކަތްތަކަށް: 18 މިލިއަން ރުފިޔާ
- އިތުރަށް ދީފައިވާ ފައިސާ: 14.2 މިލިއަން ރުފިޔާ
- ޖުމުލަ: 32.3 މިލިއަން ރުފިޔާ ދީފައިވޭ
މަޝްރޫއުގެ މަސައްކަތްތަކާ ގުޅޭ ރިޕޯޓެއް ސަރުކާރުގެ ފަރާތުން މެއި 2020 ގައި އޭރުގެ ޔޫތު އެންޑް ސްޕޯޓްސް މިނިސްޓްރީން އެކުލަވާލި އެވެ. އެ ރިޕޯޓްގައި ވެސް މަސައްކަތް އެންމެ އެކަށީގެންވާ ގޮތަށް ގޮސްފައި ނުވާކަން ފާހަގަ ކޮށްފައިވާ ކަމަށް އޮޑިޓް ރިޕޯޓްގައިވެ އެވެ. އަދި ކުންފުންޏަށް އެފްއޭއެމުން އިތުރަށް ފައިސާ ދީފައި ވަނީ ވެސް މާލީ ގަވާއިދުތަކާ ހިލާފަށް ކަމަށް ޔޫތު އެންޑް ސްޕޯޓްސް މިނިސްޓްރީން ފާހަގަ ކުރި އެވެ.
އެ މަޝްރޫއު ކުރިއަށް ގެންދަން ސަރުކާރުން އެފްއޭއެމަށް 31 މިލިއަން ރުފިޔާ ދޫކުރި އެވެ. އެ ފައިސާ އެފްއޭއެމަށް ދޫކުރުމުގައި ސަރުކާރުން ވެސް އުސޫލުތަކުން ބޭރުވެފައިވާ ކަމަށް މީގެ ކުރިން އޮޑިޓަ ޖެނަރަލް ނެރުއްވި ޔޫތު އެންޑް ސްޕޯޓްސް މިނިސްޓްރީ އޮޑިޓް ރިޕޯޓްގައި ފާހަގަ ކޮށްފައިވެ އެވެ.