މި މަހު 23 ގައި ރާއްޖޭގައި ފަށާ 20 އަހަރުންދަށުގެ ސާފް ޗެމްޕިއަންޝިޕަށް ތައްޔާރުވާން ޒުވާން ގައުމީ ޓީމު ސިންގަޕޫރުގައި ކޭމްޕް ކޮށްފި އެވެ.
ގާތްގަނޑަކަށް ހަފުތާއެއްހާ ދުވަހުގެ މުއްދަތަށް ސިންގަޕޫރުގައި ޓީމު ހޭދަ ކުރާނެ އެވެ. އެ މުއްދަތުގައި އެ ގައުމުގެ 19 އަހަރުންދަށުގެ ގައުމީ ޓީމާ އެކު އެކުވެރިކަމުގެ ދެ މެޗު ކުޅުމަށް ވަނީ ހަމަޖެހިފަ އެވެ.
ފުރަތަމަ މެޗު އާދިއްތަ ދުވަހު ކުޅޭނެ އެވެ. އެ މެޗި ކުޅޭނީ ޗޯ ޗޫ ކަންގް ސްޓޭޑިއަމްގަ އެވެ. ދެވަނަ މެޗު އަންނަ އަންގާރަ ދުވަހު ކުޅޭނީ ސްޓޭޑިއަމްގަ އެވެ. ރާއްޖެއާ އެކު ކުޅޭ ދެ މެޗަކީ ސިންގަޕޫރަށް ވެސް ތަމްރީނުގެ މުހިންމު ދެ މެޗެވެ.
ސިންގަޕޫރުގެ 19 އަހަރުން ދަށުގެ ޓީމުން ތައްޔާރުވަމުން ދަނީ އާސިއާން ގައުމުތަކުގެ 19 އަހަރުން ދަށުގެ މުބާރާތަށެވެ. އިންޑޮނޭޝިއާގައި ބާއްވާ އެ މުބާރާތް އޮންނާނީ ޖޫން 1-14 އަށެވެ.
ޔޫތު ސާފް ޗެމްޕިއަންޝިޕްގައި ރާއްޖޭގެ ޓީމަށް އިރުޝާދު ދޭނީ ސީނިއާ ގައުމީ ޓީމުގެ ހެޑް ކޯޗު އިސްތަވާން އުރުބާނީ އެވެ. ރާއްޖޭގެ ޓެކްނިކަލް ޑައިރެކްޓަރުކަމާއި ސީނިއާ ގައުމީ ޓީމުގެ ކޯޗުކަމާ ޖެނުއަރީ މަހު ހަވާލުވި އުރުބާނީގެ ކޯޗުކަމުގެ ދަށުން ރާއްޖޭގެ ފުރަތަމަ ކުރިމަތިލުމަކަށް ވާނީ ސިންގަޕޫރާ ދެކޮޅަށް އާދިއްތަ ދުވަހު ކުޅޭ މެޗެވެ.
މިއީ ރާއްޖޭގެ ކޯޗުކަމުގައި އުރްބާނީ މަސައްކަތް ކުރާ ތިންވަނަ ފަހަރެވެ.
ސާފް 20 އަހަރުންދަށުގެ ޗެމްޕިއަންޝިޕަށް ރާއްޖޭގެ ޓީމު ތައްޔާރުވާން ފެށީ އެ އުމުރުފުރާގެ ކުޅުންތެރިންނަށް ހުޅުވާލި ޓްރެއަލް އަކުންނެވެ. ޖެނުއަރީ މަހު ކުރިއަށް ގެންދިޔަ އެ ޓްރެއަލް އަށް 150 ވުރެ ގިނަ ކުޅުންތެރިން ހާޒިރުވި އެވެ.
ސާފްގެ މެންބަރު ހަތް ގައުމުން ވެސް ވާދަކުރާ މުބާރާތުގެ ގުރޫޕް އޭ ގައި، ރާއްޖެއާ އެކު ލައްވާލީ ލަންކާ އާއި ބުޓާން އަދި ނޭޕާލެވެ. ގުރޫޕް ބީ ގައި، އެންމެ ފަހުގެ ޗެމްޕިއަން އިންޑިއާ އާއި ބަންގްލަދޭޝް އަދި ޕާކިސްތާނެވެ.
މުބާރާތުގެ ފައިނަލު މެޗު ކުޅޭނީ އަންނަ މަހުގެ ތިންވަނަ ދުވަހު އެވެ.