ނިއު ރޭޑިއަންޓުގެ އެސިސްޓަންޓް ކޯޗު ލޫސިއާނޯ ބަރްބޯސާގެ މޫނުމަތީގައި ޖަހައި މާރާމާރީ ހިންގި މައްސަލައިގައި، މާޒިޔާގެ އެސިސްޓަންޓް ކޯޗު އަހުމަދު ސުޒޭރު 10 މެޗަށް ސަސްޕެންޑްކޮށް، 15,000ރ. އިން ޖޫރިމަނާކޮށްފި އެވެ.
ލޫސިއާނޯ އަށް ސުޒޭރު ހަމަލާދިނީ ދިވެހި ޕްރިމިއާ ލީގުގައި މި މަހުގެ 17 ވަނަ ދުވަހުގެ ރޭ އެ ދެ ޓީމު ކުޅުނު މެޗުގެ ތެރެއިން ހިނގި ހަމަނުޖެހުމެއްގަ އެވެ.
އެފްއޭއެމްގެ ޑިސިޕްލިނަރީ ކޮމިޓީން މައްސަލަ ތަހުގީގު ކުރުމަށް، ސުޒޭރު ކޮމިޓީއަށް ހާޒިރުކޮށް ސުވާލުކުރުމުން، އެ އަމަލު ހިންގާފައިވާކަން އޭނާ ވަނީ އެއްބަސްވެފަ އެވެ.
"މިހާރު" އަށް ލިބިފައިވާ ޑިސިޕްލިނަރީ ކޮމިޓީގެ ރިޕޯޓުގައި ބުނެފައިވާ ގޮތުގައި ސުޒޭރު ވަނީ އިދިކޮޅު ޓީމުގެ އޮފިޝަލެއްގެ މޫނުމަތީގައި ޖަހައި، "ލޭއަންނަވަރުގެ އަނިޔާއެއް ދީފަ" އެވެ. އަދި ސުޒޭރު ވަނީ އޭނާ އަނިޔާވެރި އަމަލެއް ހިންގިކަމަށް އިއުތިރާފުވެ، މައްސަލައިގެ އަޑުއެހުމުގައި އެކަމަށް މައާފަށް ވެސް އެދިފައި ކަމަށް ޑިސިޕްލިނަރީ ކޮމިޓީގެ ރިޕޯޓުގައިވެ އެވެ.
ޑިސިޕްލިނަރީ ކޮމިޓީން ބުނީ މައްސަލައިގެ ތަހުގީގުގައި ސުޒޭރު ހާޒިރުކޮށް ސުވާލުކުރުމުގެ އިތުރަށް މެޗު އިންސިޑެންޓް ރިޕޯޓާއި، މެޗުގެ ވީޑިއޯ ފޫޓޭޖް އަދި އަޑުއެހުންތަކުގައި ލިބުނު މައުލޫމާތުތަކަށް ރިއާޔަތް ކުރި ކަމަށެވެ.
"މެޗު ރިޕޯޓާއި، މެޗުގެ ފޫޓޭޖް އަދި އަހުމަދު ސުޒޭރުގެ އަމިއްލަ އިއުތިރާފުގެ މައްޗަށް ބިނާކޮށް، މެޗު އޮފިޝަލަކު ނޫން އެހެން މީހަކަށް ހަމަލާދީ އަނިޔާވެރި އަމަލެއް އޭނާ ހިންގާފައިވާކަން ކޮމިޓީއަށް ވަނީ ސާބިތުވެފަ އެވެ،" ޑިސިޕްލިނަރީ ކޮމިޓީގެ ރިޕޯޓުގައިވެ އެވެ.
އޭނާ އަށް ކުރިމަތި ކުރި ޖޫރިމަނާގެ ފައިސާ، އޭނާ އަށް އެކަން އަންގާ ދުވަހުން ފެށިގެން 15 ދުވަހުގެ ތެރޭގައި ދައްކަން ޖެހޭނެކަމަށް އެފްއޭއެމުން ބުންޏެވެ.
ކޮމިޓީން ބުނީ ސުޒޭރާ ދެކޮޅަށް ދިން އަދަބުތަކުގެ ފިޔަވަޅު މާޒިޔާ އާއި ނިއު އަށް ވެސް އަންގާނެ ކަމަށެވެ. އަދި އިސްތިއުނާފުކުރަން ބޭނުންވާ ފަރާތަކުން، އިސްތިއުނާފުކުރަން ބޭނުންވާކަން ތިން ދުވަހުގެ ތެރޭގައި ސިޓީއަކުން އަންގަންޖެހޭނެ ކަމަށް ވެސް ޑިސިޕްލިނަރީ ކޮމިޓީގެ ރިޕޯޓުގައިވެ އެވެ.