ފީފާގެ ހަ ބިލިއަން ޑޮލަރުގެ ރިޒާވުން، މެންބަރު ގައުމުތަކަށް އިތުރަށް ފައިސާ ދޭން ތައްޔާރަށް ހުރިކަމަށް، އެ އިދާރާގެ ރައީސް ޖިއާނީ އިންފަންޓީނޯ ބުނެފި އެވެ.
ބައްރުތަކުގެ ފުޓްބޯޅަ އިދާރާގެ ރައީސުން އިންފަންޓީނޯއަށް މި މަހު ފޮނުއްވި ސިޓީތަކުގައި އެދިފައިވަނީ މެންބަރު ގައުމުތަކަށް އިތުރަށް ފައިސާ ދިނުމަށެވެ.
ޔޫއެފާގެ ރައީސް އަލެކްޒެންޑާ ކެފެރިން އާއި އުތުރު އެމެރިކާގެ ފުޓްބޯޅަ އިދާރާގެ (ކޮންކާކަފް) ގެ ރައީސް ވިކްޓާ މޮންޓަގްލިއާނީ ފޮނުވީ ގުޅިގެން ލިޔުނު ސިޓީއެއްގޮތަށެވެ.
އޭޝިއާގެ ފުޓްބޯޅަ އިދާރާ ގެ ރައީސް ޝައިޚް ސަލްމާން ފޮނުވީ އޭނާ އެކަނި ފޮނުވާ ސިޓީއެއް ގޮތަށެވެ. އާއި ދެކުނު އެމެރިކާގެ ފުޓްބޯޅަ އިދާރާގެ ރައީސް އަލެހަންޑްރޯ ޑޮމިންގޭޒް އާއި އެފްރިކާ ފުޓްބޯޅަ އިދާރާ (ކާފް) ގެ ރައީސް ޕެޓްރިސް މޮޓްސެޕޭ އަދި އޯޝޭނިއާގެ ފުޓްބޯޅަ އިދާރާގެ ރައީސް ލަމްބާޓް މާލްޓޮކް ވެސް ވަނީ ސިޓީ ފޮނުވާފަ އެވެ.
އެ ސިޓީތަށް ޖަވާބު ދިނުމުގެ ގޮތުން އިންފަންޓީނޯ ފޮނުވި ސިޓީގައި ބުނެފައި ވަނީ ފީފާގެ ގަވާއިދުތަކުގެ ތެރެއިން މެންބަރު ގައުމުތަކަށް އިތުރަށް ފައިސާ ދިނުމަށް އޭނާ ތާއީދު ކުރައްވާކަމަށެވެ.
އޭނާގެ ސިޓީގައި ބުނެފައިވާ ގޮތުގައި ކެފެރިން އާއި މޮންޓަގްލިއާނީގެ ސިޓީގައި އެދިފައިވަނީ، ކުރިއަށް އޮތް ހަތަރު އަހަރުތެރޭ ކޮންމެ ގައުމަކަށް 10 މިލިއަން ޑޮލަރު ދިނުމަށެވެ.
ސަލްމާން އެދިފައި ވަނީ ވީ އެންމެ އަވަހަކަށް ގޮތެއް ނިންމައި ދިނުމަށް ކަމަށް އިންފަންޓީނޯގެ ސިޓީގައި ބުނެފައިވެ އެވެ. އޯޝޭނިއާގެ ލަމްބާޓް މާލްޓޮކްގެ ސިޓީގައި ވަނީ ކުދި ގައުމުތަކުގެ ފުޓްބޯޅަ ހިންގުމުގެ ހަރަދުތައް އެހެން ގައުމުތަކަށް ވުރެ ބޮޑުކަން ފާހަގަކޮށްފަ އެވެ.
އިންފަންޓީނޯ ވަނީ ފީފާގެ ނައިބު ރައީސްކަން ވެސް ކުރައްވާ އެ ބޭފުޅުން ހުށަހަޅާ މާލީ މޮޑެލްގެ ޕްރަޕޯސްލަ ފީފާ އަށް ފޮނުވައި ދިނުމަށް އެދިފަ އެވެ. އަދި އަންނަ މަހު 15 ގައި ބާއްވާ ފީފާގެ ކައުންސިލްގެ ބައްދަލުވުމުގައި އެކަމާ މަޝްވަރާކަރަން ހުށަހަޅާނެކަމަށް އޭނާ ބުނެފައިވެ އެވެ.
ކައުންސިލްގެ އެ ބައްދަލުވުމަކީ، ފީފާގެ މުބާރާތްތަކުގެ ވިޔަފާރީ ޕްރޮޖެކްޓްގެ ބައިން ހިއްސާ ވިއްކުމަށް އިންފަންޓީނޯ ޕްލޭން އިއުލާންކުރި ފަހުން ބާއްވާ ފީފާގެ ފުރަތަމަ ބައްދަލުވުމެވެ. އެ ޕްރަޕޯސަލަށް މެންބަރު ގައުމުތަކުގެ ނުރުހުން އަމާޒުވުމުން އިންފަންޓީނޯ ވަނީ އެ ޕްލޭން އަނބުރައި ގެންގޮސްފަ އެވެ.
އަންނަ އަހަރު ބާއްވާ ފީފާގެ އިންތިހާބުގައި ވާދަކުރާނެކަމަށް، އިންފަންޓީނޯ ބުންޏެވެ. އިންތިހާބުގައި ކުރިމަތިލުން ހަމަވާނީ ނޮވެމްބަރު 15 ވަނަ ދުވަހަށެވެ.