ކްރިސްޓިއާނޯ ރޮނާލްޑޯ، 18 އަހަރުތެރޭ ފުރަތަމަ ފަހަރަށް ޕޯޗްގަލްގެ ގައުމީ ޓީމުގައި މެޗެއް ކުޅެން ނުލިބި ބެންޗުގައި ހޭދަކޮށްފި އެވެ.
މިހާރު ކުރިއަށްދާ ފީފާ އިންޓަނޭޝަނަލް ބްރޭކްގައި، ހޯމަ ދުވަހުގެ ރޭ ނޯވޭއާ ދެކޮޅަށް ކުޅުނު މެޗުގައި ރޮނާލްޑޯ ފެށީ ބެންޗުންނެވެ. އެކަމަކު މެޗު ނިމުނު އިރު ވެސް އޭނާ ކުޅެން ނުނެރެ އެވެ.
މީގެ ކުރިން، ގައުމީ ޓީމުގައި ރޮނާލްޑޯ މެޗެއް ނުކުޅެ ބެންޗުގައި ހޭދަކުރީ 2008 ގެ ޔޫރޯގެ ގުރޫޕް ސްޓޭޖްގައި ސްވިޒަލެންޑާ ދެކޮޅަށް ކުޅުނު މެޗުގަ އެވެ.
ޔޫއެފާ ނޭޝަން ލީގުގައި، މިދިޔަ ހަފުތާގައި ވޭލްސްއާ ދެކޮޅަށް ކުޅުނު މެޗުގައި ފުރަތަމަ 11 ގައި ހިމެނިގެން ރޮނާލްޑޯ ކުޅުނެވެ. އެ މެޗުގެ ދެވަނަ ހާފުގައި އޭނާގެ ބަދަލުގައި ގޮންސާލޯ ރާމޯސް ކުޅެން ނެރުނެވެ. ޔޯއާ ފެލިކްސް ޖަހައިދިން ލަނޑުން ޕޯޗުގަލުން މެޗު ކާމިޔާބު ކުރީ 1-0 ންނެވެ.
ރޮނާލްޑޯއާ އެކު މިދިޔަ ސީޒަނުގައި އަލް ނަސްރުގައި ކާމިޔާބު ހޯދި ކޯޗު ހޯޖޭ ހެސޫސް ޕޯޗްގަލްގެ ގައުމީ ޓީމާ ހަވާލުވެ، އޭނާގެ ދެވަނަ މެޗުގައި އުމުރުން 41 އަހަރުގެ ރޮނާލްޑޯ މެޗަށް ނުނެރުނު ސަބަބާ ބެހޭގޮތުން ނޫސްވެރިން ސުވާލު ކުރި އެވެ.
ހޯޖޭ ހެސޫސް ބުނީ މެޗުގެ ފަހު 30 މިނެޓްގައި ރޮނާލްޑޯ ބަދަލު ކުޅުންތެރިޔެއްގެ ގޮތުގައި ކުޅެން އަރުވާނެ ކަމަށް، ކުރިން އޭނާގެ ގާތުގައި ވެސް ބުނެފައިވާނެ ކަމަށެވެ. ނަމަވެސް އެ ހާލަތު މެޗުގައި ނުލިބުނީ ކަމަށް ހެސޫސް ބުންޏެވެ.
"މެޗުގައި އޭނާ ކުޅެން ނެރުމުގެ ބޭނުމެއް ނައި، ގޮންސާލޯ ރާމޯސް ދިޔައީ މޮޅަށް ކުޅެމުން. އޭނާ ލަނޑެއް ޖެހި، އިތުރު ލަނޑެއް ވެސް ޖެހި އޮފްސައިޑް ކަމަށް ނިންމިއަސް.. އެހެންވެ އޭނާ އެ ވަގުތު ބޭލުމަކީ އެންމެ ރަނގަޅު ގޮތް ކަމަކަށް އަހަންނަށް ގަބޫލެއް ނުކުރެވުނެ،" ހެސޫސް ބުންޏެވެ.
"ރޮނާލްޑޯ ނުނެރުނީ އޭނާއަށް ޖިސްމާނީ ގޮތުން އަނިޔާވެދާނެތީ ރައްކާތެރިކުރުމުގެ ގޮތުންނެއް ނޫނެ. އަހަރެން ބޭނުންވި ކޮންމެ ވަގުތަކު ވެސް ކުޅެން އޭނާ ހުރީ ފިޓްކޮށް."