ނޭޝަންސް ލީގުގައި އިޒްރޭލުގެ ސަޕޯޓަރުން އަޔަލެންޑްގެ ފޯވާޑް އެޑަމް އިޑާހްއަށް ނަސްލީ ގޮތުން ދިމާކުރިކަމުގެ ތުހުމަތު ކުރެވުނަސް މައްސަލައިގެ ރަސްމީ ތަހުގީގެއް ހިންގެން ނެތްކަމަށް ޔޫއެފާއިން ބުނެފި އެވެ.
އެ އިދާރާއިން ބުނީ މި މައްސަލަ ނުބަލަން ނިންމީ މެޗުގެ ތެރޭގައި އަމަލުކުރަންޖެހޭ އުސޫލުތަކާ އެއްގޮތަށް ކަންކަން ކުރިއަށް ގޮސްފައި ނުވާތީ ކަމަށެވެ.
ހެންގޭރީގައި ކުޅުނު އިޒްރޭލްގެ ހޯމް މެޗުގައި އިޒްރޭލްގެ ސަޕޯޓަރުން ގޮވަމުންދިޔަ ނަސްލީގޮތުން ދިމާކުރުމުގެ ލަވަތަކަށް ސަމާލުކަން ދިނުމަށް މެޗުގެ އޮފިޝަލުންގެ ކިބައިން ޔަލެންޑްގެ މިޑްފީލްޑަރު ޖޭސަން މޮލުމްބީ ފުރަތަމަ ހާފުގައި އެދުނެވެ.
އެކަމަކު އެއީ ނަސްލީ ތަފާތުކުރުމުގެ އަމަލެއްގެ ގޮތުގައި ސީދާ ރިޕޯޓްކޮށްފައި ނުވާތީ މެޗުގެ ރިޕޯޓުގައި ވެސް އެކަން ރެކޯޑްކޮށްފައެއް ނުވެއެވެ.
ޔޫއެފާއިން ބުނީ މެޗުގެ ރިޕޯޓާއި ރެފްރީ ރިޕޯޓްގައި ވެސް އެ ވާހަކަ ހިމަނާގައި ނުވުމުން އެ މައްސަލަ ތަހުގީގު ކުރެވެން ނެތް ކަމަށެވެ.
އަޔަލެންޑްގެ ފުޓްބޯޅަ އެސޯސިއޭޝަނުން ބުނީ އެ އެސޯސިއޭޝަނުން މައްސަލަ ދިރާސާކުރަމުންދާ ކަމަށެވެ. ނަސްލީ ތަފާތުކުރުމުގެ އެއްވެސް ހެއްކެއް ފެނިއްޖެނަމަ، މައްސަލަ ރަސްމީކޮށް ތަހުގީގުކޮށްދިނުމަށް ޔޫއެފާއަށް ހުށަހަޅާނެ ކަމަށް އެ އެސޯސިއޭޝަނުން ބުންޏެވެ.
އެ އިދާރާގެ އޮފިޝަލް ބުނީ އެޑަމް އިޑާހްއަށް ނިސްބަތްކޮށް ސަޕޯޓަރުން ގޮވީ ކަމަށް ބުނާ ނަސްލީ ތަފާތުކުރުމުގެ އަޑުތަކެއްކަން އިޑާހްއަށް ޔަގީންނުވާ ކަމަށެވެ.
އެ މެޗުގެ ކުރިން ވެސް ބޮޑެތި ބަހުސްތަކެއް ހިނގި އެވް އިޒްރޭލުން ފަލަސްތީނުގައި ހިނގަމުންދާ ނަސްލު ނައްތާލުމުގެ ގަތުލުއާންމާ ދެކޮޅުހެދާކަން އަޔަލޭންޑްގެ ކުޅުންތެރިން ހާމަ ކުރި އެވެ. އިޒްރޭލްގެ ކުޅުނުންތެރިންނާ ސަލާންނިކޮށް، އިޒްރޭލާ ދެކޮޅަށް އިހްތިޖާޖުކުރުމުގެ ހައްގު އަޔަލެންޑްގެ ޓީމުން ބޭނުންކުރި އެވެ. އެ ޓީމު ކީޕަރު ގެވިން ބާޒުނޫ ވެސް ވަނީ ގަތުލްއާންމާ ދެކޮޅު ހަދާކަން ހާމަކުރުމުގެ ގޮތުން އިޒްރޭލާ ދެކޮޅަށް ކުޅެން ވެސް ބޭނުންނުވާކަމަށް ބުނެ މެޗުގެ ސްކޮޑުން ވަކިވެފަ އެވެ.
މެޗުގެ ކުރިން އަޔަލެންޑްގެ ކޯޗު ހާލްގްރިމްސަން ބުނީ އިޒްރޭލުން ހިންގަމުންދާ ގަތުލުއާންމުތަކުގެ ސަބަބުން އިޒްރޭލް ކުޅެން އަޔަލެންޑްގެ އެއްވެސް ކުޅުންތެރިއަކު އަދި ހުދު އޭނާ ވެސް ހިތްހަމަނުޖެހޭ ކަމަށެވެ.
ޔޫކްރޭނަށް ހަމަލާދިނުމުން ރަޝިއާ ސަސްޕެންޑްކުރި ގޮތަށް އިޒްރޭލް ސަސްޕެންޑް ނުކޮށް، ވަކި ގޮތަކަށް އަމަލުކުރާތީ ޔޫއެފާއަށް ވެސް އޭނާ ވަނީ ފާޑުކިޔާފަ އެވެ.