ޣައްޒާ އާއި ފަލަސްތީނުގެ ބިންތަކުގައި އިޒްރޭލުން ހިންގާ ނަސްލުނައްތާލުމުގެ ގަތުލުއާންމަށް ތާއިދުކުރާ ކްލަބްތަކަށް އެއްބާރުލުން ދޭތީ، އިޒްރޭލްގެ ފުޓްބޯޅަ އިދާރާ ސަސްޕެންޑްކުރަން އެމްނެސްޓީ އިންޓަނޭޝަނަލުން ވެސް ޔޫއެފާ އާއި ފީފާއަށް ގޮވާލައިފި އެވެ.
އެމްނެސްޓީގެ ޔޫރަޕް ސަރަހައްދީ ޑިރެކްޓަރު ސްޓީވް ކޮކްބާން ނެރުއްވި ބަޔާނެއްގައި ވިދާޅުވެފައި ވަނީ ގާނޫނާ ހިލާފަށް ވަޒަންވެރިންގެ ކްލަބްތަކަށް އިޒްރޭލްގެ ފުޓްބޯޅަ އެސޯސިއޭޝަނުން އެއްބާރުލުން ދޭ ކަމަށެވެ.
"އިސްރޭލުގެ ފުޓްބޯޅަ އެސޯސިއޭޝަނުން ފަލަސްތީނުގެ ހިފާފައިވާ ބިންތަކުގައިވާ ޣައިރުގާނޫނީ ވަޒަންވެރިންގެ ކްލަބްތަކަށް އެއްބާރުލުންދޭކަން ސާފުކޮށް އެނގެން އެބައޮތް. އެހެންވެ އިޒްރޭލް ގައުމީ ޓީމު ޔޫއެފާ ނޭޝަންސް ލީގުގައި ބައިވެރިވުމަކީ ބަލައިގަނެވޭނެ ކަމެއް ނޫން،" އޭނާ ވިދާޅުވި އެވެ.
ކޮކްބާން ވިދާޅުވީ ގާނޫނާ ގަވައިދާ ހިލާފަށް ހިފާފައި ހުރި ބިންތަކުގައި ވަޒަންވެރިވެފައިވާ މީހުންނާ ގުޅުން އޮންނަ ކްލަބްތައް މުބާރާތްތަކުން ބޭރުކުރަން އިޒްރޭލްގެ ފުޓްބޯޅައިން އިންކާރުކުރާ ކަމަށެވެ.
ފީފާ އާއި ޔޫއެފާއިން އައިއެފްއޭ [އިޒްރޭލްގެ ފުޓްބޯޅަ އެސޯސިއޭޝަން] ސަސްޕެންޑްކުރަންޖެހޭނެ. އަދި އިސްރޭލު ލީގުތަކުގައި މިފަދަ ކްލަބްތައް ބައިވެރިކުރުމަކީ ފީފާގެ ގަވާއިދުތަކާއި ބައިނަލްއަގުވާމީ ގާނޫނުތަކާ ހިލާފުކަމެއް." އޭނާ ވިދާޅުވި އެވެ.
ޔޫއެފާ އާއި ފީފާގެ ފައިސާއިން އިޒްރޭލްގެ ފުޓްބޯޅައިން ޣައިރުގާނޫނީ ކަންކަމަށް ހަރަދުކުރުމަށް ފަހިވާކަން ކޮކްބާން ފާހަގަކުރި އެވެ.
ނޭޝަންސް ލީގުގެ "ލީގު ބީ" ގެ ގްރޫޕް ބީ ގައި އިޒްރޭލާ ދެކޮޅަށް ކުޅެން އަޔަލެންޑުން ދެކޮޅު ވެސް ހެދި އެވެ. އެކަމަކު މެޗު ދޫކޮށްލުމުން ކުރިމަތިވާނެ އެހެން އަދަބަކާ ހެދި މެޗު ކުޅުނެވެ. ފުރަތަމަ ލެގް މެޗު ހަންގޭރީގައި ކުޅެ އަޔަލެންޑުން މޮޅުވި 3-0 ންނެވެ.
ދެވަނަ ލެގް މެޗުގައި އާދިއްތަ ދުވަހު ވާދަކުރާނެ އެވެ. އެ މެޗު ކުޅޭނީ ސާބިއާގަ އެވެ.
"އިންސާނިއްޔަތާ ހިލާފު ބޮޑެތި ޖަރީމާތައް ހިންގާ ގައުމުތަކުގެ އަބުރު ރީތިކުރާ ވަސީލަތެއްގެ ގޮތުގައި ކުޅިވަރު ބޭނުންކޮށްގެން ނުވާނެ،" ކޮކްބާން ވިދާޅުވި އެވެ.
ޣައިރުގާނޫނީ ވަޒަންވެރިންގެ ކްލަބްތަކަށް، އިޒްރޭލްގެ ފުޓްބޯޅައިން ފިޔަވަޅު ނާޅާނަމަ، ފުޓްބޯޅައިގެ ހުރިހާ ހަރަކާތަކުން އިޒްރޭލް ސަސްޕެންޑްކުރުމަށް މިދިޔަ އަހަރު އޮކްޓޯބަރު މާހު އެމްނެސްޓީން، ފީފާ އާއި ޔޫއެފާއަށް ސިޓީއެއް ވެސް ފޮނުވި އެވެ.
ނަމަވެސް ނިންމީ ފީފާއިން އެއްވެސް ފިޔަވަޅެއް އިޒްރޭލަށް ނޭޅުމަށެވެ. ފަލަސްތީނުގެ ފުޓްބޯޅަ އެސޯސިއޭޝަނުން ވަނީ އެ ނިންމުން ދުނިޔޭގެ ކުޅިވަރު އާބިޓްރޭޝަން ކޯޓް (ސީއޭއެސް) ގައި އިސްތިއުނާފުކޮށްފަ އެވެ.