އިނގިރޭސި ޕްރިމިއާ ލީގުގެ މާލީ ގަވާއިދުތަކާ ހިލާފަށް ހިންގާފައިވާ ސީރިއަސް 115 މައްސަލައިގައި މެންޗެސްޓާ ސިޓީގެ މައްޗަށް ކުށް ސާބިތުވެއްޖެ އެވެ.
ޕްރިމިއާ ލީގުން ނެރުނު 1,545 ބަހުގެ ބަޔާނުގައި ބުނީ، ސިޓީން ވަނީ ގާތްގަނޑަކަށް ދިހަ އަހަރު ވަންދެން ސިސްޓަމެޓިކްކޮށް ގަވާއިދުތަކާ ހިލާފުވެފައި ކަމަށެވެ.
އެ 10 އަހަރުގެ މުއްދަތަކީ އެ ކްލަބްގެ ތާރީހުގައި އެންމެ ކާމިޔާބު 10 އަހަރެވެ.
އެ ޓީމު ކުށްވެރިވެއްޖެ ކަމަށް ނިންމުމާ އެކު ސިޓީއަށް ގިނަ އަދަދކުން ޕޮއިންޓް އުނިކުރުމާއި ބޮޑެތި ޖޫރިމަނާތަކާ ކުރިމަތިލާންޖެހޭނެ އެވެ. އަދި ޕްރިމިއާ ލީގަށް އެންމެ ފަހުގެ ފިޔަވަޅެއްގެ ގޮތުން އެ ކްލަބް ލީގުން ވަކިކުރުމުގެ ބާރު ވެސް ލިބިގެންވެ އެވެ.
އެ ތުހުމަތުތަކަށް ސިޓީން ދިޔައީ އަބަދުވެސް އިންކާރުކުރަމުންނެވެ.
އެ މައްސަލަ އިސްތިއުނާފު ކުރުމުގެ ހައްގު ބޭނުންކުރުމަށް އަންނަ ހުކުރު ދުވަހާ ހަމައަށް ވަގުތު ވަނީ ދީފަ އެވެ.
މި މައްސަލަ ބެލި މިނިވަން ކޮމިޝަނުން ނެރުނު ހުކުމުގައިވާ ގޮތުން، ސިޓީން ވަނީ ވިޔަފާރީގެ އާމްދަނީ އޮޅުވާލައިގެން މަތިކުރުމަށްޓަކައި ސީދާ "އޮޅުވާލުންތައް ހިމެނޭ" އެއްބަސްވުންތަކެއް ހަދަފަ އެވެ. އަދި މާލީ ހަގީގީ ހާލަތު ސިއްރުކުރުމަށް "ދޮގު" ހިސާބުތަކެއް ހުށަހަޅާފައިވާ ކަމަށް ވެސް ރިޕޯޓްގައިވެ އެވެ.
ޕްރިމިއާ ލީގާއި ޔޫއެފާގެ ހަރަދުކުރުމުގެ މިންގަނޑުތަކާ ބޮޑުތަނުން ހިލާފުވެފައިވާކަން ވަނީ ސިޓީގެ މައްޗަށް ވަނީ ސާބިތުވެފަ އެވެ.
ޕްރިމިއާ ލީގުގެ ބަޔާނުގައި ބުނެފައިވަނީ ސިޓީން ލީގަށް ވެސް އޮޅުވާލައިގެން "ނަހަމަގޮތުގައި ފައިސާ ހޯދުމުގެ ސްކީމްތަކެއް" ބޭނުންކޮށްފައިވާ ކަމަށެވެ.
"މި ސްކީމްތަކުގެ މައިގަނޑު ބޭނުމަކީ މާލީ ގަވާއިދުތަކަށް ބޯލަނބާކަން ދެއްކުމުގެ ގޮތުން، އެ މުއްދަތުގެ ތެރޭގައި ކްލަބުގެ އާމްދަނީ އޮޅުވާލައިގެން އިތުރުކޮށް، 900 މިލިއަން ޕައުންޑަށް ވުރެ ގިނަ ފައިސާގެ ހަރަދު ކުޑަކޮށް ދެއްކުމެވެ. މީގެ ނަތީޖާއެއްގެ ގޮތުން، ކޮމިޝަނަށް ފާހަގަކުރެވުނު ގޮތުގައި ކްލަބުން ވަނީ ދޮގު ހިސާބުތައް ހުށަހަޅައި އޮޑިޓަރުންނާއި ފުޓްބޯޅަ ރެގިއުލޭޓަރުންނަށް މާލީ ހަގީގީ ހާލަތު ސިއްރުކޮށްފަ އެވެ. ކޮމިޝަނުން ނިންމީ ކްލަބުގެ ޕްރިމިއާ ލީގުގެ ގަވާއިދުތަކުން ބޭރުން ގަސްދުގައި އެނގިގެން ތިބެ މަސައްކަތްކޮށްފައިވާ ކަމަށެވެ.،" ޕްރިމިއާ ލީގުގެ ބަޔާނުގައި ލިޔެފައިވެ އެވެ.
ޕްރިމިއާ ލީގުން ބުނީ ކުށް ސާބިތުވުމާ ގުޅިގެން ސިޓީއަށް އަޅާނެ ފިޔަވަޅުތަކަކީ ކޮބައިކަން ނިންމުމަށްޓަކައި މިނިވަން ކޮމިޝަނާ އެކު ވަކި އަޑުއެހުމެއް ބޭއްވާނެ ކަމަށެވެ. އަދި އިސްތިއުނާފުގެ މަރުހަލާ އަންނަ ހުކުރު ދުވަހުގެ ނިޔަލަށް ހުޅުވާލެވިފައިވާ ކަމަށް ވެސް ބުންޏެވެ.
ކުރެވިފައިވާ ބޮޑެތި ތުހުމަތުތަކަށް އިންކާރުކޮށް ސިޓީން ބުނީ ޕްރިމިއާ ލީގުގެ ކޮމިޝަންގެ ނިންމުމާމެދު މާޔޫސްވެ ހައިރާންވާ ކަމަށެވެ.
ކްލަބުގެ ހުރިހާ ނިންމުންތަކަށް ބާރުލިބޭ އެކަށީގެންވާ ސާބިތު ހެކި އެބަހުއްޓެވެ. ކްލަބުން ގާނޫނީ އަދި ރެގިއުލޭޓަރީ ހުރިހާ މަރުހަލާއެއްގައި ސާބިތުކަމާއެކު ވަކާލާތު ކުރާނެ އެވެ.،" ސިޓީގެ ބަޔާނުގައި ލިޔެފައިވެ އެވެ.
މި ނިންމުމުގައި ގާނޫނީ އަދި ހަގީގީ ބޮޑެތި އޮޅުންތަކެއް ހުރިކަމަށް ބުނެ އެ ކްލަބުން ބުނީ އިސްތިއުނާފު ކުރާނެ ކަމަށެވެ.