ދުނިޔޭގެ ފުޓްބޯޅައިގެ އެންމެ ވަރުގަދަ އެއް ބާރު ބްރެޒިލާ ދެކޮޅަށް އިންޑިއާިން ކުޅުނު އެކުވެރިކަމުގެ މެޗަކީ އޭގެ ނަތީޖާއަށްވުރެ ބޮޑަށް، އެ މެޗެއްގެ ހާއްސަކަން އެހެން ގޮތްގޮތުން މާ ބޮޑު ވާހަކަތަކެއް ބުނެދޭ މެޗެކެވެ.
އާބާދީ އާއި ގައުމުގެ ހައިބަތުގައި އިންޑިއާ އާއި ބްރެޒިލަކީ ދާދި އެއްގޮތް ދެ ގައުމެވެ. އެކަމަކު ފުޓްބޯޅައިގައި ބްރެޒިލާ ކައިރިވެސް ކުރެވޭނެ. އެއްވެސް ސިފައެއް އިންޑިއާގައި ނެތެވެ. ވޯލްޑް ކަޕްގެ ޗެމްޕިއަންކަން ފަސް ފަހަރު ހޯދާފައިވާ ބްރެޒިލަކީ ދުނިޔޭގެ ފުޓްބޯޅައިގެ އެންމެ ބާރުގަދަ ގައުމެވެ.
ގައުމުގެ ޖިއޮގްރަފީ އާއި އާބާދީ ކިތަންމެ ބޮޑަސް، އިންޑިއާއަކީ އޭޝިއާގެ ފުޓްބޯޅަ ވެސް ބާރެއް ނޫނެވެ. އެކަމަކު އިންޑިއާގެ ކަލްކަތާގެ ސޯލްޓް ލޭކް ސްޓޭޑީއަމްގައި ބްރެޒިލާ ދެކޮޅަށް ކުޅުނު މެޗަކީ މާ ބޮޑެތި ވާހަކަތަކެއް ކިޔައިދޭ މެޗެކެވެ.
އިންޑިއާގެ ޒުވާނުންގެ މެދުގައި ފުޓްބޯޅައިގެ މަގުބޫލުކަން އުފައްދަން، ބްރެޒިލް މެޗަކީ އިންޑިއާގެ ފުޓްބޯޅައަށް ލިބޭނެ އެންމެ ބޮޑު ޕްރޮމޯޝަނެވެ.
މެޗުގެ ނަތީޖާ، 4-0 އިން ބްރެޒިލް ކޮޅަށް ބުރަވި އެވެ.
އެ ޓީމުގެ ލަނޑުތައް ޖަހައިދިނީ ސެމުއެލް ލިނޯ، އެސްޓެވޯ އަދި ޕެޑްރޯ އެވެ. ލިނޯ ދެ ލަނޑު ޖެހި އެވެ.
މިއީ އިންޑިއާގެ ސަޕޯޓަރުންނަށް ނަތީޖާގެ މުހިންމުކަން އެއްކިބާކޮށް ތާރީހީ ވަގުތުތަކެއް ދެކިލުމުގެ ފުރުސަތު ލިބުނު މެޗެކެވެ. ފުޓްބޯޅަ ޕްރޮމޯޓްކޮށް ޝައުގު އުފެއްދުމަށް، މި މެޗަކީ އިންޑިއާގެ ފުޓްބޯޅައިން ގެނައި ކުޑަކުޑަ އީދެކެވެ.
އިންޑިއާގެ ސަހަލް އަބްދުއްސަމަދު ބްރެޒިލްގެ ޑަގްލަސް ސަންޓޯސް ކައިރިން ނަލަކޮށް ބޯޅަ ނައްޓާލައިގެން ކުރިއަށްދިޔަ ހިތްގައިމު އުކުޅުން މުޅި ސްޓޭޑިއަމް ގުގުމާލި އެވެ. އަދި ރަޔަން ވިލިއަމްސް އަރިމަތިން ބްރެޒިލްގެ ޑިފެންޑަރު ކައިރިން ނެއްޓި ކުރިއަށް އެރި އެވެ. މަންވީރު ސިންގު ބްރެޒިލްގެ ޑިފެންސް ފާރު ފައްޓައިގެން ކުރިއަށްގޮސް އުފެއްދި ނުރައްކާތެރި ފުރުސަތުތަކުން އިންޑިއާގެ ކުޅުންތެރިންގެ ކެރުންތެރިކަން ވަރަށް ރަނގަޅަށް ފެނިގެންދިޔަ އެވެ.
ވިނީޝިއަސް ޖޫނިއާ އާއި ބްރޫނޯ ގިމަރާއިސް ފަދަ ދުނިޔޭގެ ފެންވަރުގެ ތަރިން ހިމެނުނު ބްރެޒިލް ޓީމާ ދެކޮޅަށް އިންޑިއާއިން ވަނީ ޖެހިލުންވުމެއް ނެތި ކުޅެފައެވެ.
ބްރެޒިލްގެ ކޯޗު ކާލޯ އަންޗެލޮއްޓީ މެޗަށްފަހު ބުނީ މިއީ އޭނާގެ ކުޅުންތެރިންނަށް އިމްތިހާނެއް ނޫން ކަމަށެވެ. ނަމަވެސް ލިބުނު ރަނގަޅު ފުރުސަތެއްކަމަށް ވޯލްޑް ކްލާސް ފެންވަރުގެ ކޯޗު ބުންޏެވެ.
މެޗުން ބަލިވި ނަމަވެސް، ދުނިޔޭގެ ފުޓްބޯޅައިގެ އެންމެ ބޮޑު "ބްރޭންޑާ" ދެކޮޅަށް އިންޑިއާ ކުޅުންތެރިން ދެއްކި ކެރުމާއި ހިތްވަރަކީ އިންޑިއާ ފުޓްބޯޅައިގެ ތާރީހުގައި ރަން އަކުރުން ފަވައިލެވޭނެ ކަމެކެވެ.
އޭޝިއާ އަށް ކުރި ދަތުރުގައި ބްރެޒިލުން ވަނީ އޮސްޓްރޭލިއާއާ ދެކޮޅަށް އެ ގައުމުގައި ވެސް ކުޅެފަ އެވެ. އަންޗެލޮތީ ބުނީ އެ ދެ މެޗާ މެދު ވެސް އޭނާ ހިތްހަމަޖެހޭ ކަމަށެވެ.