އޭޝިއަން ފުޓްބޯޅަ ކޮންފެޑަރޭޝަން (އޭއެފްސީ) އިން އަލަށް ތައާރަފްކުރަން ނިންމާފައިވާ ނޭޝަންސް ލީގު މުބާރާތާ އެކު އޭޝިއާ ބައްރުގެ ވޯލްޑް ކަޕް އަދި އޭޝިއަން ކަޕް ކޮލިފައިންއަށް ބޮޑު ބަދަލެއް އަންނާނެކަން، ހާމަވި ޑްރާފްޓް ޕްލޭނަކުން ހާމަވެއްޖެ އެވެ.
މިދިޔަ އަހަރުގެ ޑިސެމްބަރު މަހު އޭއެފްސީން އިއުލާންކުރި ނޭޝަންސް ލީގު މުބާރާތް، 2030 ވަނަ އަހަރުން ފެށިގެން ކޮންމެ ދެ އަހަރަކުން އެއް އަހަރު ބޭއްވުމަށް ވަނީ ހަމަޖެހިފަ އެވެ. އެ ތަފްސީލީ ހުށަހެޅުން އަންގާރަ ދުވަހު ގައުމީ އެސޯސިއޭޝަންތަކަށް ހުށަހެޅުމަށް ހަމަޖެހިފައިވާކަމަށް، އީއެސްޕީއެންއިން ބުންޏެވެ.
މި ހުށަހެޅުމުގައިވާގޮތުން އޭޝިއާގެ ގައުމުތައް ބެހިގެންދާނީ ތިން ފަންތި އަކަށެވެ. ފުރަތަމަ ފެންތީގެ ކޮންމެ ޑިވިޝަނެއްގައި 18 ގައުމު ހިމެނޭނެ އެވެ. ތިންވަނަ ފަންތީގައި 11 ގައުމު ތިން ގްރޫޕަކަށް ބެހިގެންދާނެ އެވެ.
ވޯލްޑް ކަޕާ ގުޅުވައިގެން ބާއްވާ ފުރަތަމަ ނޭޝަންސް ލީގު ކުރިއަށްދާނީ 2032-33 ގަ އެވެ. މި މުބާރާތުގައި ކޮންމެ ގައުމަކުން އަމިއްލަ ދަނޑުގައި އަދި ރަށުން ބޭރުގައި ވެސް ހަ މެޗު ކުޅޭނެ އެވެ.
ފުރަތަމަ ފަންތީގެ ގަދަ 6 ޓީމަށް ވޯލްޑް ކަޕުން ސީދާ ޖާގަ ލިބޭނެ އެވެ.
ފުރަތަމަ ފަންތީގެ ހަތްވަނަ މަގާމުން ފެށިފެން 10 ވަނަ މަގާމުގެ ނިޔަލަށް ހިމެނޭ ހަތަރު ޓީމުގެ ދެމެދު ކުޅޭ ރައުންޑް ރޮބިން ޕްލޭއޮފް މަރުހަލާއިން އެންމެ ރަނގަޅު ނަތީޖާ ހޯދާ ދެ ދެ ޓީމަށް ވޯލްޑް ކަޕްގެ ފަހު ދެ ޖާގަ ލިބޭނެ އެވެ. އެ މަރުހަލާގެ ތިންވަނައަށް ދާ ޓީމު ދާނީ ވޯލްޑް ކަޕް ކޮލިފައިންގެ އިންޓަ ކޮންޓިނެންޓަލް ޕްލޭއޮފަށެވެ.
އޭޝިއަން ކަޕާ ގުޅުވައިގެން ބާއްވާ ނޭޝަނަލް ލީގުގެ ފުރަތަމަ މުބާރާތް 2030 ގައި ބާއްވަން ވަނީ ހުށަހަޅާފަ އެވެ. އެއީ ވޯލްޑް ކަޕް އަހަރެވެ. މިހާރު އޭޝިއަން ކަޕް ބާއްވާނީ ވޯލްޑް ކަޕް ބާއްވާ އަހަރު ނިމިގެން، ދެން ކުރިމަތިވާ އަހަރުގަ އެވެ. އެކަމަކު މިހާރު ހުށަލާފައިވާ ބަދަލާ އެކު، 2030 ގެ ވޯލްޑް ކަޕަށް ފަހު ބާއްވާ އޭޝިއަން ކަޕް ބަދަލުކުރާނީ 2032 އަކަށެވެ.
ނޭޝަން ލީގުގެ 2030 ގެ މުބާރާތުގެ ފުރަތަމަ ފަންތީގެ ހުރިހާ ގައުމުތަކުގެ އިތުރުން، ދެވަނަ ފަންތީގެ އެންމެ ކުރީގައި ނިންމާ ހަ ގައުމަށް އޭޝިއަން ކަޕުން ސީދާ ޖާގަ ލިބޭނެ އެވެ.
ކޮންމެ މުބާރާތެއްގެ ވެސް ފުރަތަމަ ފަންތީގގެ ގަދަ އަށް ޓީމު ނޮކްއައުޓް ބުރަށް ގޮސް މުބާރާތުގެ ޗެމްޕިއަން ކަނޑައަޅާނެ އެވެ. އަދި ކޮންމެ ދެ އަހަރަކުން މުބާރާތް ނިމުމުން، ފަންތި ނުވަތަ ޑިވިޝަންތަކުގެ މެދުގައި ރެލިގޭޓްވުމާއި ޕްރޮމޯޓްވުން އޮންނާނެ އެވެ. އެންމެ ދަށުން ނިންމާ ދެ ޓީމު ރެލިގޭޓްވާނީ، ދަށް ފަންތިއަށެވެ. އަދި ދަށް ޑިވިޝަނުގެ އެންމެ ގަދަ ދެ ޓީމު ޕްރޮމޯޓްވާނެ އެވެ. އިތުރު ޖާގަތަކަށް މަތީ ޑިވިޝަނުގެ، އެންމެ ފަހަތުން ނިންމާ ހަތަރު ޓީމާއި ދަށް ޑިވިޝަނުގެ ގަދަ 4 ޓީމުގެ މެދުގައި ޕްލޭއޮފް މެޗުތަކެއް ކުޅެވޭނެ އެވެ.
އޭއެފްސީގައި އޮންނަ (ސާފް ފަދަ) ސަރަހައްދީ ޓީމުތައް އެއް ގުރޫޕެއްގެ ގޮތުގައި، ނޭޝަން ލީގުގައި ވަކިނުކުރުމަށް އޭއެފްސީން ވަނީ ނިންމާފަ އެވެ. އެއީ ސަރަހައްދުތަކުގައި ގައުމުތަކުގެ އަދަދު އެއްވަރުނުވުމާއި ފެންވަރުގެ ތަފާތުތައް ހުރުމުންނެވެ.
މި އާ ނިޒާމަށް ބަދަލުވުމުގެ ކުރިން، 2028-29 ގައި ޕައިލެޓް ޕްރޮޖެކްޓެއްގެ ގޮތުގައި މުބާރާތެއް ބޭއްވުމަށް އޭއެފްސީން ވަނީ ހުށަހަޅާފަ އެވެ. އެ މުބާރާތުގައި ޑިވިޝަންތައް ކަނޑައެޅުމަށް ބަލާނީ ފީފާ ރޭންކިންގެ ބަދަލުގައި، ކުރިން ކުޅޭ ކޮލިފައިން މެޗުތަކުގެ ނަތީޖާއަށެވެ. މިއީ 2030 ގެ ފުރަތަމަ ރަސްމީ ނޭޝަންސް ލީގަށް އިންސާފުވެރިކަމާ އެކު ޓީމުތައް ގްރޫޕްކުރުމަށްޓަކައި އަޅާ ފިޔަވަޅެއް ކަމަށް، އޭއެފްސީގެ ޕްރޮޕޯސަލްގައިވެ އެވެ.