ބްލެކްބެރީ ފޯނު އުފެއްދުން ހުއްޓާލަނީ

ސްމާޓްފޯން މާކެޓްގައި، އިރެއްގައި ގަދަ އަޑެއް ފަނޑުވަނީ އެވެ. ބްލެކްބެރީން ދެން ފޯނުު ނުއުފައްދާނެ ކަމަށް ބުނެފި އެވެ. އެ މަރުކާގެ ފޯނެއް ބޭނުންނުކުރި ނަމަވެސް، ބްލެކްބެރީ އަކީ ރީތި ނަމެކެވެ. ފޯނުތައް ވެސް އެހާ ރީއްޗެވެ.

ބްލެކްބެރީން ފޯނު އުފެއްދުން ހުއްޓާލަނީ އަންދާޒާކުރި ވަރަށް ކުންފުންޏަށް ފައިދާ ނުވުމުންނެވެ. ބްލެކްބެރީން އަމިއްލަ އަށް ފޯނު ނުއުފެއްދި ނަމަވެސް، އެ ކުންފުނިން ބުނި ގޮތުގައި، އެ މަރުކާގެ ފޯނުތައް ކޮންމެވެސް އެހެން ކުންފުންޏަކުން އުފައްދާނެ އެވެ. އެއީ ބްލެކްބެރީން ދޫކުރާ ޚާއްސަ ހުއްދައެއްގެ ދަށުންނެވެ. އެ ފޯނުތަކަށް ބޭނުންވާ ސޮފްޓްވެއާ އުފައްދައި ލައިސަންސް ބްލެކްބެރީން ދޫކުރާ ގޮތަށެވެ.

ބްލެކްބެރީން ވިސްނާ އެހެން ކަމެއް ވެސް އެބަ އޮތެވެ. ސަލާމަތީ ގޮތުން ވަރަށް ހަރުދަނާ، ބާރުގަދަ އޮޕަރޭޓިން ސިސްޓަމަކަށް އެންޑްރޮއިޑް ހެދުމެވެ. އެކަމަކު އެއީ ވަކި ފޯނުތަކަކަށް ޚާއްސަ އޮޕަރޭޓިން ސިސްޓަމަކަށް ވާނެ އެވެ. އެއީ އެންޑްރޮއިޑް ނަމަވެސް ބޭނުންކުރެވޭނީ ބްލެކްބެރީން ވިއްކާ ހުއްދައެއް ހޯދައިގެންނެވެ.

ކުންފުންޏަށް ފައިސާ ހޯދުމަށްޓަކައި ބާރުގަދަ ކުންފުނިތަކާ އެކު ބްލެކްބެރީ ގުޅޭނެ ކަމަށް ވެސް ވެ އެވެ. އެ ގޮތުގައި އެންމެ ގާތް އެކުވެރިއަކަށް ގޫގުލް ވާނެ ކަމަށް ބެލެވެ އެވެ. ބްލެކްބެރީން ފޯނު އުފެއްދުން ހުއްޓާލި ނަމަވެސް، މޮބައިލް އޮޕަރޭޓަރުންނާ ގުޅިގެން ސްމާޓްފޯން މާކެޓްގައި ދެމި އޮންނާނެ އެވެ. ނޫސްތަކުން އެނގޭ ގޮތުގައި ބްލެކްބެރީން މިހާރު ވެސް ވަނީ އެ ބޭނުމުގައި އިންޑޮނީޝިއާ އަށް ވަދެގަނެފަ އެވެ.

ބްލެކްބެރީ ސޮފްޓްވެއާ އަކީ މޮޅު އަދި އެހައި ރައްކާތެރި އެއްޗެއް ކަމަށް ބޭނުންކުރާ މީހުން ބުނެ އެވެ. ލިޔުންތަކުގައި ވެސް އެހެން ހުރެ އެވެ. އެއީ ވެސް ބްލެކްބެރީ އަށް ނަފާ އިތުރުކުރެވިދާނެ ދާއިރާއެކެވެ.

ބްލެކްބެރީން ވިސްނަނީ ސްމާޓްފޯން އުފައްދާ އެހެން ކުންފުނިތަކަށް ބޭނުންވާ އެޕްލިކޭޝަން މޮޑިއުލްތައް އުފައްދައި ދޭށެވެ. ބްލެކްބެރީން ބުނާ ގޮތުގައި ސަލާމަތީ ގޮތުން ސާބިތު އެޕްލިކޭޝަންތަކަކަށް އެ ކުންފުނީގެ އުފެއްދުންތައް ވާނެ އެވެ.

އަދު ހާލަތު ހުރި ގޮތުން އަމިއްލަ އަށް ފޯނު އުފެއްދުން ހުއްޓާލުމަކީ ކުންފުންޏަށް އެންމެ ރަނގަޅު ގޮތް ކަމަށް ބްލެކްބެރީ ދެކެ އެވެ.