ޣައްޒާގެ ސްކޫލެއްގައި ފަތިސް ނަމާދަށް ތިއްބާ ހަމަލާދީ 100 މީހަކު ޝަހީދުކޮށްލައިފި

ފަލަސްތީނު ޣައްޒާގެ ސްކޫލަކަށް ރޭ ފަތިހު ދިން ހަމަލާގައި ޝަހީދުވި ބައެއް މީހުންގެ ހަށިތަކުގެ ކައިރީގައި ބަޔަކު ހިތާމަ ފާޅުކުރަނީ. -- ފޮޓޯ: އޭއެފްޕީ

10 އޯގަސްޓް 2024 - 18:33

3 comments

އިޒްރޭލުގެ ހަމަލާތަކުގެ ސަބަބުން ހާލުގައި ޖެހިފައިވާ މީހުންނަށް ހިޔާވަހިކަން ދޭ ދީނީ ސްކޫލެއްގައި މިއަދު ފަތިސް ނަމާދަށް މީހުން ތިއްބާ ދިން ހަމަލާގައި ޝަހީދުވި އަދަދު 93 އަށް އަރައިފި އެވެ.

މިއީ މިދިޔަ އަހަރުގެ އޮކްޓޫބަރު މަހު ހަތް ވަނަ ދުވަހު އިޒްރޭލުން ޣައްޒާއަށް ހަމަލާދޭން ފެށި ފަހުން އެއް ހަމަލާއެއްގައި އެންމެ ގިނަ މީހުން ޝަހީދުވި އެއް ހަމަލާގެ ގޮތުގައި ވަނީ ބެލެވިފަ އެވެ. އެހީގެ މަސައްކަތުގައި އުޅޭ މީހުން ބުނާ ގޮތުގައި މަރުވި މީހުންގެ އަދަދު އަދިވެސް އިތުރުވުން އެކަށީގެންވެ އެވެ.

ހާލުގައި ޖެހިފައިވާ މީހުން ބައިތިއްބާ ސްކޫލްތަކަށް ހަމަލާ ދިނުމަށް ފަހު މީގެ ކުރިން ވެސް ބުނާ ގޮތަށް އިޒްރޭލުން މިފަހަރު ވެސް ބުނީ އެ ތަނުގައި ހަމާސްގެ ހަނގުރާމަވެރިން ފިލައިގެން އުޅޭ ކަމަށެވެ. އެކަމަކު ހަމާސް އިން އަބަދުވެސް ބުނަމުންދަނީ ސްކޫލްތަކާއި ހޮސްޕިޓަލްތަކާއި އާންމުން އުޅޭ އެހެން ތަންތަން އަސްކަރީ ކަންކަމަށް ބޭނުން ނުކުރާ ކަމަށެވެ.

ޣައްޒާގެ ސްކޫލެއްގައި ފަތިސް ނަމާދަށް މީހުން ތިއްބާ ދިން ހަމަލާގައި ޝަހީދުވި މީހުންގެ ހަށިތައް ގެންދަނީ. -- ފޮޓޯ: އޭއެފްޕީ

ޣައްޒާގެ ދެކުނުގައި ހުންނަ އައް ތާއިބީން ސްކޫލަށް ހަމަލާ ދިނީ ހަމާސް އާއި އިޒްރޭލާ ދެމެދު ކުރިއަށް ދިޔަ ސުލްހައިގެ ވާހަކަތައް، ހަމާސްގެ ލީޑަރު އިސްމާއިލް ހަނިއްޔާ އަވަހާރަކޮށްލުމާ ގުޅިގެން މެދުކެނޑިފައި އޮތުމަށް ފަހު ބުރާސްފަތި ދުވަހު އަލުން ފަށަން އިޒްރޭލުން އެއްބަސްވުމަށް ފަހުގަ އެވެ. ހަމާސް އިން ބުނީ އިޒްރޭލުން ޣައްޒާގެ ދެކުނުގައި މިހާރު ކުރިއަށްވުރެ ވެސް ބޮޑަށް އަނިޔާވެރިވަމުންދާ ކަމަށެވެ.

އިޒްރޭލުން ހަމަލާދިން ޣައްޒާގެ ސްކޫލްގެ ގޯތިތެރޭ ބަޔަކު މަޑުކޮށްލައިގެން: ހަމަލާގައި ޝަހީދުވި އަދަދު ވަނީ 100 އަށް އަރާނެ ކަމަށް ބެލެވޭ. -- ފޮޓޯ: އޭއެފްޕީ

ދެ ބުރިއަށް ހުރި އިމާރާތަށް ދިން ހަމަލާއާ އެކު މަތީ ބުރިން ބައެއް އެއްކޮށް ފުނޑުފުނޑުވެފައި ވާއިރު އެންމެ ތިރި އޮތީ މަރުވެފައިވާ މީހުންގެ ހަށިތަކުން ފުރިފަ އެވެ.

އިޒްރޭލުން ބުނީ މި ސްކޫލްގައި ހަމާސް އާއި އިސްލާމިކް ޖިހާދާއި އެހެން ބައެއް ޖަމާއަތްތަކުގެ ވިއްސަކަށް މީހުން އުޅޭ ކަމަށާއި އެ މީހުން އެތަނުގައި ތިބެގެން އިޒްރޭލަށް ހަަމަލާ ދިނުމުގައި ބައިވެރިވަމުންދާ ކަމުގެ މައުލޫމާތު ލިބިފައިވާ ކަމަށެވެ. އޭގެ ތެރޭގައި އިސް ކޮމާންޑަރުންތަކެއް ވެސް ހިމެނޭ ކަމަށް އިޒްރޭލުން ތުހުމަތުކުރެ އެވެ.

ސްކޫލަށް ދިން ހަމަލާގައި ޝަހީދުވި ބައެއް މީހުންގެ ހަށިތައް ބިންމަތީގައި އަތުރާފައި. -- ފޮޓޯ: އޭއެފްޕީ

މި ހަމަލާގައި ޝަހީދުވި އަދަދާ އެކު އޮކްޓޫބަރު ހަތެއްގައި ހަމާސް އިން އިޒްރޭލަށް ދިން ހަމަލާއާ އެކު އިޒްރޭލުން ޣައްޒާއަށް ދެމުން ގެންދާ ހަމަލާތަކުގައި ފަލަސްތީނުން ޝަހީދުވި މީހުންގެ އަދަދު ވަނީ 39،790 އަށް އަރައިފަ އެވެ.

އިޒްރޭލުގެ މި ލާއިންސާނީ އަމަލާ އެކު އަނެއްކާވެސް އެކި ގައުމުތަކުން ވަނީ ހަމަލާ ކުށްވެރިކޮށް ވާހަކަ ދައްކައިފަ އެވެ. ސައޫދީ އަރަބިއްޔާއިން ބުނީ އެންމެ ހަރުކަށި އިބާރާތުން މި ހަމަލާ ކުށްވެރިކުރާ ކަމަށެވެ.

ފަލަސްތީނުގެ ހައްގުތައް ކަށަވަރުކުރުމުގެ މަސައްކަތަށް އދ. އިން ކަނޑައަޅާފައި ހުންނަވާ ހާއްސަ ރެޕަޓުއާ ފްރަންސެސްކާ އަލްބާ ވިދާޅުވީ މިއީ ފަލަސްތީނުގެ ނަސްލު ނައްތާލުމުގެ އަމަލުތަކުގެ ސިލްސިލާގެ ތެރެއިން އެއް ހަމަލާ ކަމަށެވެ. ޔޫރަޕްގެ އިއްތިހާދުގެ އިސް ޑިޕްލޮމެޓް ޖޯސެފް ބޮރެލް ވިދާޅުވީ މިފަދަ ހަމަލާތައް ދިފާއުކޮށް ދެއްކޭނެ ވާހަކައެއް ނޯންނާނެ ކަމަށާއި މި ހަމަލާގެ ސަބަބުން ބޮޑު ސިހުމެއް ލިބިވަޑައިގެންފައިވާ ކަމަށެވެ. -- އޭއެފްޕީ