ސަޕޯޓަރުން ނުކުމެ މުޒާހަރާ ވަރުގަދަކުރަން އިމްރާން ގޮވާލައްވައިފި

ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ޖަލުން މިނިވަންކުރުމަށް ގޮވާލައި އޭނާގެ ސަޕޯޓަރުން ފަށާފައިވާ މުޒާހަރާތަކުގައި އިތުރު ސަޕޯޓަރުން ބައިވެރިވެ އެއްމެން އިސްލާމްއާބާދަށް ޖަމާނާ އިމްރާން ގޮވާލައްވައިފި އެވެ.

އިމްރާނަށް ތާއީދުކުރާ މީހުން މިދިޔަ އާދީއްތަ ދުވަހުން ފެށިގެން، ވެރިރަށް އިސްލާމްއާބާދުގައި ހިނގާލުންތައް ބާއްވަމުން ދާއިރު ފުލުހުންގެ މަގު ބަންދުކުރަން ބަހައްޓާފައިވާ ތަކެތިތައް ވެސް ވަނީ މުޒާހަރާކުރާ މީހުން ނަގައި އެއްފަރާތްކޮށްފަ އެވެ. މި ކުރިމަތިލުންތަކުގައި ހަމަނުޖެހުން ހިނގައި ބަޔަކު މަރު ވެސް ވަނީ ވެފަ އެވެ.

ވެރިކަމުން ދުރުކުރުމަށް ފަހު އެކި ކުށްތަކުގެ ތުހުމަތުކޮށް ހިންގި އަވަސް ޝަރީއަތްތަކަށް ފަހު 2023 ވަނަ އަހަރުގެ އޮގަސްޓް މަހުން ފެށިގެން އިމްރާން ހުންނަނީ ޖަލުގައި ބަންދުކޮށްފަ އެވެ. އޭނާ ވިދާޅުވެފައި ވަނީ ހައްގުން ކަމަކާ ނުލައި އޭނާ ޖަލަށް ލާފައި ވަނީ އަލުން ސިޔާސީ މައިދާނަށް ނުކުމެދާނެތީ އެކަން ހުއްޓުވަން އުފައްދައިގެން އުޅޭ މައްސަލަތަކާ ގުޅުވައިގެން ކަމަށެވެ.

ފެބްރުއަރީ މަހު އާންމު އިންތިހާބަށް ފަހު، އިމްރާންގެ ޕާކިސްތާން ތަހްރީކޭ އިންސާފް (ޕީޓީއައި) ވަނީ އެއްވުންތައް ބޭއްވުން މަނާކޮށްފައި އޮތަސް އެކަމަށް ގޮންޖަހައި އެކި ތަންތަނުގައި މުޒާހަރާކޮށްފަ އެވެ. އެކަމަކު އިއްޔެ އަކީ މި ފަހުން އެންމެ ބޮޑު އެއްވުން ބޭއްވި ދުވަހެވެ.

ސަރުކާރުގެ އޮފީސްތައް ހުންނަ ސަަރަހައްދު މުޒާހަރާގެ ބައިވެރިންގެ ކޮންޓްރޯލްގެ ދަށަށް ގެންދިއުމަށް މުޒާހަރާގެ ބައިވެރިންނަށް އިމްރާން ޖަލުގައި އޮންނަވައިގެން ފޮނުއްވި ބަޔާނެއްގައި ވަނީ ގޮވާލައްވައިފަ އެވެ.

މުޒާހަރާއަށް ނުނިކުމެ ތިބި އެންމެން ވެސް މުޒާހަރާއާ ގުޅެން އޭނާ ގޮވައިލެއްވި އެވެ.

"މުޒާހަރާގައި ބައިވެރިވާ އެންމެން ވެސް ތިބެންވާނީ މި އެދޭ ކަންކަން ހާސިލްވަންދެން ސުލްވެރިކަމާއި އެކުވެރިކަމާ އެކު،" އިމްރާން ވިދާޅުވެފައިވެ އެވެ.

ޕީޓީއައިގެ އެންމެ ބޮޑު ޑިމާންޑަކީ 2018 ވަނަ އަހަރުން ފެށިގެން 2022 ވަނަ އަހަރާ ހަމައަށް ބޮޑުވަޒީރުކަން ކުރެއްވި އުމުރުން 72 އަހަރުގެ ކުރީގެ ކްރިކެޓް ތަރި އިމްރާން ދޫކޮށްލުމެވެ. އަދި ފެބްރުއަރީ މަހު ބޭއްވި އިންތިޚާބަށް ނުފޫޒު ފޯރުވި ކަމަށް ބުނާ މައްސަލަ އާއި ދާދި ފަހުން ސަރުކާރުން ގާނޫނު އަސާސީއަށް އިސްލާހު ގެނެސް ކޯޓުތަކުގެ މައްޗަށް އިތުރު ބާރުތައް ލިބޭ ގޮތަށް ހެދުމާ ދެކޮޅަށް ވެސް އަޑު އުފުލަ އެވެ.

މުޒާހަރާތައް ފެށުމާ އެކު، ހޮނިހިރު ދުވަހުގެ ފަހުކޮޅުން ފެށިގެން ވެރިރަށް ލޮކްޑައުން ކޮށްފައިވާއިރު، މޯބައިލް އިންޓަނެޓް މެދުކަނޑާލައި، 20،000 އަށް ވުރެ ގިނަ ފުލުހުން ވަނީ ރަޔަޓް ޝީލްޑާއި ބަޑިހިފައިގެން މަގުތަކަށް ނެރެފަ އެވެ.