ސްރީ ލަންކާ ފުލުހުންނާއި ސިފައިން ގުޅިގެން އެ ގައުމުގެ ދެކުނުން ކަނޑުމަތީގައި ހިންގި އޮޕަރޭޝަނެއްގައި، 296 ކިލޯ ހުރި ދެ މަސްބޯޓު އަތުލައިގެންފި އެވެ.
މި ތަކެތީގެ ތެރޭގައި 184 ކިލޯ ހެރޮއިން އާއި 112 ކިލޯ މެތު ހުރި ކަމަށާއި މީގެ އަގު 4.5 ބިލިއަން ރުޕީސް އަށް އަރާނެ ކަމަށް ލަންކާ ސިފައިން ބުންޏެވެ.
އަތުލައިގަތް މަސްތުވާތަކެތި ޑިކޮޓީވާ ފިޝަރީޒް ހާބަރަށް އިއްޔެ ގެންގޮސް ބަލައި ފާސްކުރުމަށް ފަހު ޑިފެންސް މިނިސްޓްރީގެ ނައިބު މޭޖާ ޖެނެރަލް (ރިޓަޔަޑް) އަރޫނާ ޖަޔަސޭކަރަ ވިދާޅުވީ މި ތަކެތި ހުރީ 14 ގޯންޏެއްގައި ބޯޓުތަކުގެ ތެރޭގައި ފޮރުވައިފަ އެވެ. މަސްތުވާތަކެތި އުފުލި ބޯޓުތަކުން 11 މީހަކު ހައްޔަރުކޮށްފައިވާ ކަމަށާއި އެ މީހުންނަކީ މަސްތުވާތަކެތި ޓްރެފިކް ކުރުމުގައި ފުޅާ ދާއިރާއެއްގައި ހަރަކާތްތެރިވަމުން އަންނަ ބައެއް ކަމަށް ބެލެވޭ ކަމަށް ޖަޔަސޭކަރަ ވިދާޅުވި އެވެ.
މި އޮޕަރޭޝަންގައި ފުރަތަމަ އަތުލައިގަތީ އެއް ބޯޓެވެ. އަދި އެ ބޯޓުގައި ތިބި ފަސް މީހުންނާ ސުވާލުކޮށް މުއާސަލާތީ ސާމާނު ސިފައިންނާއި ފުލުހުންގެ ބާރުގެ ދަށަށް ގެންގޮސް ހިންގި ތަހުގީގުން، ހަ މީހުން ތިބި ދެ ވަނަ ބޯޓު ވެސް ހޯދައި އަތުލަގަތީ ކަމަށް މި އޮޕަރޭޝަނާ ބެހޭ ޕްރެސް ބްރީފިންގައި ބުންޏެވެ.
މަސްތުވާތަކެއްޗާ ދެކޮޅަށް ލަންކާއިން ހިންގަމުން ގެންދާ އޮޕަރޭޝަންތަކުގައި ގިނަ އަދަދެއްގެ މަސްތުވާތަކެތި އަތުލައިގެންފައިވެ އެވެ. މީގެ ތެރޭގައި މަސްބޯޓުތަކުން އަތުލައިގަތް ތަކެތި ގިނަ އެވެ.