އީރާނަށް ހަމަލާ ދިނުމުގައި އެމެރިކާ ބައިވެރިވީ އިޒްރޭލުން އިސްވެ އީރާނަށް ހަަމަލާދޭން ނިންމައި އެކަމައިގެން ކުރިއަށްދާކަން އެނގުމުން ކަމަށާއި އެއީ އިޒްރޭލުގެ ހަމަލާއާ އެކު އީރާންގެ ރައްދު ހަަމަލާ އެމެރިކާ ސިފައިންނަށް އަންނާނެކަން އެނގޭތީ ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރުބިއޯ ވިދާޅުވެއްޖެ އެވެ.
"އަޅުގަނޑުމެންނަށް އެނގޭ އިޒްރޭލުން ހަމަލާ ދޭނެކަން. އަޅުގަނޑުމެންނަށް އެނގޭ އެ ފިޔަވަޅާ އެކު އެމެރިކާ ސިފައިންނަށް ހަމަލާ ދޭނެކަން، އަދި އެ ހަމަލާތައް ފެށުމުގެ ކުރިން އެ މީހުންގެ ފަހަތުން ނުގޮސްފި ނަމަ، އަޅުގަނޑުމެންނަށް އިތުރު ގެއްލުންތަކެއް ލިބޭނެކަން،" ރޫބިއޯ ނޫސްވެރިންނަށް ވިދާޅުވި އެވެ.
"އީރާނުން އިސްވެ އަހަރެމެންނަށް ހަމަލާދޭނެ އިރަކަށް މަޑުކޮށްގެން ތިބެފި ނަމަ ލިބޭ ގެއްލުން މާބޮޑުވާނެ. އެހެންވެ [ހަމަލާގައި ބައިވެރިވުމަކީ] ރައީސް [ޑޮނަލްޑް ޓްރަމްޕު] ނިންމެވި ރަނގަޅު ނިންމެވުމެއް."
އެމެރިކާއިން އިސްވެ ހަނގުރާމައެއް ފެށުމުގެ ބާރު ގާނޫނުއަސާސީން ދީފައިވަނީ ކޮންގްރެސްއަށް ކަމަށް ވާއިރު، އީރާނާ ދެކޮޅަށް ހަނގުރާމަ ފެށީ އެ ގައުމުން ކޮން ނުރައްކަލެއް ކުރިމަތިވެގެންތޯ ސުވާލުކުރުން ރުބިއޯ އަނެއްކާވެސް އިޝާރާތްކުރެއްވި އިޒްރޭލުން ހަަމަލާ ދޭން ރާވާފައިވާ ޕްލޭނަށެވެ.
"ކުރިމަތިނުވެ ނުދާނެ ނުރައްކަލެއް އޮތްކަމާ މެދު ސުވާލެއް ނެތް. އެއީ އީރާނަށް ހަމަލާދީފި ނަމަ - ހަމަލާ ދޭނެކަން އަޅުގަނޑުމެންނަށް އެނގޭ - އެ މީހުން [އީރާނުން] އަހަރެމެން ފަހަތުން އަންނާނެކަން،" ރުބިއޯ ވިދާޅުވި އެވެ.
އޭނާ ވިދާޅުވީ ހަމަލާއެއްގެ ގެއްލުން އަމިއްލައަށް ލިބިގަންނަން އެމެރިކާ ބަލަން ނޯންނާނެ ކަމަށެވެ. އަދި ވިދާޅުވީ އީރާނުން އިސްވެ އެމެރިކާއަށް ހަމަލާ ދިން ނަމަ މިއަދު ސުވާލުކުރާނީ، އީރާނުން ހަމަލާދޭން އުޅޭކަން އެނގި ތިބި އެކަމުން ރައްކާތެރިވާން ފިޔަވަޅެއް ނާޅައި ތިބުމުން އެކަމާ މެދުގައި ކަމަަށެވެ.
ޑިމޮކްރެޓިކް ޕާޓީގެ މެމްބަރެއް ކަމަށްވާ ޖޯކިން ކާސްޓްރޯ ވިދާޅުވީ އީރާނަށް ހަމަލާ ދިނުމަށް އިޒްރޭލުން ބާރުއަޅާފައިވަނީ އެމެރިކާ ސިފައިންނަށް ގެއްލުން ލިބޭނެ ކަމުގެ ބިރު ދައްކައިގެންކަން ރޫބިއޯގެ ވާހަކަތަކުން ދޭހަވާ ކަމަށެވެ.
"މިއީ ރައީސްގެ ފަރާތުން ގަބޫލުކުރެވޭނެ ކަމެއް ނޫން. އަދި އެކުވެރިއެއް ކަމަށް ބުނާ ބައެއްގެ ފަރާތުން ވެސް ބަލައިގަނެވޭނެ ކަމެއް ނޫން،" އޭނާ ވިދާޅުވި އެވެ.
އީރާނުގެ ޑިފެންސް މިނިސްޓަރު ޕީޓް ހެގްސެތު ކުރިން ވިދާޅުވީ، އީރާނުގެ އިސް ލީޑަރު އާޔަތުالله އަލީ ޚާމަނާއީ އަވަހާރަކޮށްލި ހަމަލާތައް ދިނީ އިޒްރޭލުން ކަމަށާއި އެއީ ޚާމަނާއީ އާއި އިސް ވެރިން ބައްދަލުވުމެއް ބާއްވާކަމުގެ މައުލޫމާތު ލިބުމާ އެކުގައި ކަމަށެވެ.
ރުބިއޯ ވިދާޅުވީ އީރާނަށް ހަމަލާދޭން ޖެހޭ ކަމަށް އެމެރިކާގެ ރައީސް ޑޮނަލްޑް ޓްރަމްޕުގެ ސަރުކާރުން ގަބޫލުކުރާ ކަމަށާއި ކޮންމެ ވަގުތެއްގައި ވިޔަސް ކޮންމެވެސް އިރަކުން އެކަން ކުރަންޖެހޭކަން ގަބޫލުކުރާ ކަމަށެވެ.
އޭނާ ވިދާޅުވީ އީރާންގެ ވެރިކަން ބަދަލުވާން އެމެރިކާއިން ބޭނުންވާ ކަމަށާއި އެކަމަކު މި ހަަމަލާގެ މަގްސަދަކީ އެއީ ނޫން ކަމަށެވެ.
"އަހަރެމެން އުންމީދުކުރަނީ އީރާން ރައްޔިތުން ވެރިކަން ވައްޓާލައި ގައުުމުގެ އާ މުސްތަގުބަލެއް ކަނޑައަޅާނެ ކަމަށް. އެކަން ދެކެން ވަރަށް ބޭނުން."
"އެކަމަކު މަގްސަދަކީ އީރާންގެ ބެލަސްޓިކް މިސައިލްގެ ގާބިލްކަމާއި ކަނޑުގެ ސިފައިންގެ ބާރު ނައްތާލުން."
-- އޭއެފްޕީ