ހަމަލާ ބަދަލުކުރުން 60 ދުވަހަށް މެދުކަނޑާލަން އެއްބަސްވެގެން ތިބެ އީރާނާއި އެމެރިކާ އިން ހަމަލާތައް ބަދަލުކުރަމުން ދާތީ އެއްބަސްވުން އުވިދާނެ ކަމުގެ ބިރު ބޮޑުވާން ފަށައިފި އެވެ.
އިއްޔެ އާއި މިއަދު ބަދަލުކުރި މި ހަމަލާތަކަކީ މި މަހުގެ 17 ގައި ދެ ގައުމުން ސޮއިކުރި އެއްބަސްވުމަށް ފަހު ހިނގި އެންމެ ނުރައްކާތެރި ކުރިމަތިލުންތަކެވެ. މި ހަމަލާތައް އަމާޒުވެފައިވަނީ އީރާނުގެ ދެކުނު ސަރަހައްދުތަކަށާއި، ބަހްރައިނަށާއި ދުނިޔޭގެ ހަކަތައިގެ ވިޔަފާރީގައި މުހިންމު މަގު ކަމަށްވާ ހޮރްމޫޒް ކަނޑުއޮޅިން ދަތުރުކުރާ މުދާ އުފުލާ ބޯޓުފަހަރަށެވެ.
- ބުރާސްފަތި ދުވަސް: ހޮރްމޫޒް ކަނޑުއޮޅިން ދަތުރުކުރި ސިންގަޕޫރުގެ "އެވަރ ލަވްލީ" ބޯޓަށް އީރާނުން ޑްރޯން ހަމަލާއެއް ދިނެވެ. މީގެ އިތުރުން އީރާނުން ފޮނުވާލި 3 ޑްރޯނެއް އެމެރިކާ ސިފައިން ވައްޓާލި އެވެ.
- ހުކުރު ދުވަސް: އީރާނުގެ ހަމަލާއަށް ރައްދުދިނުމުގެ ގޮތުން، އެމެރިކާގެ އަސްކަރީ ޖެޓްތަކުން އީރާނުގެ ދެ ރަށެއްގައި ހުރި މިސައިލް އަދި ޑްރޯން މަރުކަޒުތަކަށް 90 މިނެޓް ވަންދެން ބޮމުގެ ވަރުގަދަ ހަމަލާތަކެއް ދިނެވެ.
- ހޮނިހިރު ހެނދުނު: އީރާނުގެ އަސްކަރިއްޔާ އިން ޕެނަމާގެ "މީޓް ކިކޫ" ނަމަކަށް ކިޔާ ތެޔޮ ބޯޓަކަށް ޑްރޯން ހަމަލާއެއް ދިނެވެ. މި ބޯޓުގައި ދެ މިލިއަނަށްވުރެ ގިނަ ފީފާގެ ސާފުނުކުރާ ތެޔޮ ހުއްޓެވެ.
- ހޮނިހިރު މެންދުރު: އެމެރިކާގެ ފިފްތު ފްލީޓް އޮންނަ ބަހްރައިނަށް އަމާޒުކޮށް އީރާނުން ޑްރޯން ހަމަލާތަކެއް ދިނެވެ. އަދި އެމެރިކާގެ އަސްކަރީ މަރުކަޒުތަކަށް ހަމަލާދިން ކަމަށް އީރާނުން ބުންޏެވެ.
- ހޮނިހިރު ދުވަހުގެ ރޭ / އާދީއްތަ ދުވަސް: އެމެރިކާގެ ސެންޓްރަލް ކޮމާންޑް (ސެންޓްކޮމް) އިން އީރާނުގެ ވައިގެ ދިފާއީ ނިޒާމުތަކަށާއި، މުއާސަލާތީ މަރުކަޒުތަކަށް ދެވަނަ ފަހަރަށް ވަރުގަދަ ވައިގެ ހަމަލާތަކެއް ދިނެވެ. އަދި ރައްދުގައި އީރާނުން އަނެއްކާވެސް ކުވައިތާއި ބަހްރައިންގެ އަމާޒުތަކަށް ހަމަލާ ދީފައިވާ ކަމަށް ބުންޏެވެ.
މި ހަމަނުޖެހުމުގެ މައިގަނޑު ސަބަބަކީ ހޮރްމޫޒް ކަނޑުއޮޅިން ދަތުރުކުރާ ކަނޑުގެ އުޅަނދުފަހަރު ކޮންޓްރޯލް ކުރުމެވެ. އީރާނުން ބޭނުންވަނީ ހުރިހާ ބޯޓުފަހަރެއް އީރާނުގެ އައްސޭރިފަށާ ކައިރިން ދަތުރުކޮށް، އީރާނުގެ ހުއްދަ ހޯދުމަށެވެ. ނަމަވެސް އެމެރިކާ އާއި އެ ގައުމުގެ ބައިވެރިން އޮމާންއާ ކައިރިން ރައްކާތެރި އެހެން މަގެއް ވަނީ ހަދައިފަ އެވެ. އީރާނުން ހަމަލާދެނީ އެމެރިކާގެ މަގުން ދަތުރުކުރާ ބޯޓުފަހަރަށެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނުގެ މި އަމަލަކީ އެއްބަސްވުމާ ހިލާފުވުން ކަމަށް ބުނެ އެކަން ކުށްވެރިކޮށްފަ އެވެ. އަދި އީރާނުން މިއަމަލުތައް ހުއްޓާނުލައިފި ނަމަ، އަސްކަރީ ގޮތުން އީރާނު މުޅިން ނައްތާލާނެ ކަމުގެ އިންޒާރު ޓްރަމްޕް ވަނީ ދެއްވައިފަ އެވެ. އަނެއްކޮޅުން އީރާނުގެ ފޮރިން މިނިސްޓްރީން ބުނީ އެމެރިކާއިން އީރާނުގެ އައްސޭރިފަށަށް ބޮން އެޅުމަކީ އދ. ގެ ނިންމުންތަކާ ހިލާފު އަމަލެއް ކަމަށާއި، އެމެރިކާއިން ހަމަލާތައް ކުރިއަށްގެންދާ ނަމަ އީރާނުގެ ރައްދު މިއަށްވުރެ ވަރުގަދަވާނެ ކަމަށެވެ.
މި ހަމަލާތަކާ ގުޅިގެން ހޮރްމޫޒް ކަނޑުއޮޅީގެ ނުރައްކަލުގެ ލެވެލް ވަނީ "ސަބްސްޓެންޝަލް" (ބޮޑު ނުރައްކަލެއްގެ) ލެވެލްއަށް މަތިކޮށްފަ އެވެ. މި ސަރަހައްދުގައި ހިނގަމުންދާ ހަމަލާތަކުގެ ސަބަބުން މުޅި ގަލްފް ސަރަހައްދު ބޮޑު ހަނގުރާމައެއްގެ ތެރެއަށް ވެއްޓުމުގެ ބިރު އަނެއްކާވެސް ވަނީ ބޮޑުވެފަ އެވެ.