ހަނގުރާމަ ނިމުމަކަށް ގެނައުމުގެ އެއްބަސްވުމަކަށް ވާސިލުވާން ފުރުސަތު ދިނުމަށް، އީރާނަށް އިތުރު ހަމަލާއެއް ދިނުން ހަމަލާދިނުން މަޑުޖައްސާލީ ކަމަށް ވިދާޅުވުމަށް ފަހު އެ ގައުމާ އެކު އަލުން ހޯމަ ދުވަހު މަޝްވަރާތައް ފަށަން ނިންމާފައިވާކަން އެމެރިކާގެ ރައީސް ޑޮނަލްޑް ޓްރަމްޕް އިއުލާނުކުރައްވައިފި އެވެ.
އާދީއްތަ ދުވަހު ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، ހަ މަސް ވާން ކައިރިވެފައިވާ ހަނގުރާމަ ނިމުމަކަށް ގެނައުމުގެ މި މަޝްވަރާތަކުގައި ދުނިޔޭގެ ހަކަތައިގެ އަގުތައް އުފުލުމުގައި އެންމެ ބޮޑު މައްސަލައަކަށް ވެފައިވާ ހޮރްމޫޒް ކަނޑުއޮޅީގެ މައްސަލަ އާއި އީރާނުގެ ނިއުކްލިއާ ހަތިޔާރު ނައްތާލުމުގެ ކަންކަމާ މެދު ވާހަކަދެކެވޭނެ ކަމަށެވެ.
އީރާނުން ބުނެފައިވަނީ، އެ ކަނޑުއޮޅި މެދުވެރިކޮށް އާ މަގެއް ހަމަޖެއްސުމަށް އުމާންއާ އެކު އެއްބަސްވުމަކަށް އާދެވުމާ ގާތްވެފައިވާ ކަމަށެވެ. ނަމަވެސް އާދީއްތަ ދުވަހު ވެސް އެ ސަރަހައްދުން ދިޔަ ތެޔޮ ބޯޓެއްގެ ކައިރީގައި އެއްޗެއް ގޮވައިގެން ރިޕޯޓްކޮށްފައި ވުމުން، އެ ކަނޑުއޮޅީގެ ނުރައްކާތެރިކަން އަދިވެސް އޮތްކަން ހާމަވެ އެވެ.
އަލުން މަޝްވަރާތައް ފައްޓަވާނެކަން އިއުލާނު ކުރެއްވުމާ ގުޅިގެން، ހޯމަ ދުވަހު އޭޝިއާގެ ބާޒާރުތައް ހުޅުވުނުއިރު ވަނީ ސާފު ނުކުރާ ތެލުގެ އަގު ދަށްވެފަ އެވެ. ވެސްޓް ޓެކްސަސް އިންޓަރމީޑިއޭޓްގެ އަގު 4.7 ޕަސެންޓް ދަށްވެ، ފީފާއެއްގެ އަގު އުޅެނީ 80.72 ޑޮލަރުގަ އެވެ.
އެމެރިކާ އާއި އީރާންގެ ހަނގުރާމަ ފެށުނީ ފެބްރުއަރީ 28 ގައި އެމެރިކާ އާއި އިޒްރޭލުން އީރާނަށް ކުއްލި ހަމަލާތަކެއް ދީ އިސް ވެރިންގެ އެތައް ބަޔަކު އަވަހާރަކޮށްލުމާ އެކުގަ އެވެ. ނަމަވެސް ވޭތުވެދިޔަ މަސްތަކުގައި ދޭތެރެ ދޭތެރެއިން ކުރި މަޝްވަރާތަކާ އެކު ބައެއް ފަހަރު އޮތީ ނިސްބަތުން އަމާންކޮށެވެ.
މިހާރު އަޅުގަނޑުމެން މިކުރާ ކަމަކީ މަޝްވަރާގެ ސިފައެއްގައި އެ މީހުންނާ ވާހަކަ ދެއްކުން. މާދަމާ މެންދުރުފަހު އެކަން ފެށޭނެ.
ނަމަވެސް ނިމިދިޔަ މަހު އަލުން ހަމަލާތައް ބަދަލުކުރަން ފެށުމާ އެކު، ހަނގުރާމަ އިތުރަށް ފުޅާވެގެން ހިނގައިދާނެ ކަމުގެ ބިރު ބޮޑުވި އެވެ. ޓްރަމްޕް ވަނީ އީރާނަށް "ވަރަށް ވަރުގަދަ" ހަމަލާއެއް ދެއްވާނެކަމުގެ އިންޒާރު ދެއްވައިފަ އެވެ. އަދި އީރާނުގެ ހަކަތައިގެ ވަސީލަތްތަކަށް އަލުން ހަމަލާދިނުމަށް ވިސްނަވަމުންދިޔައިރު، މުޅި ސަރަހައްދުގައިވާ އެމެރިކާގެ އެމްބަސީތައް އޮތީ ހައި އެލާޓްގަ އެވެ.
ނަމަވެސް ހޮނިހިރު ދުވަހު ޓްރަމްޕް ވަނީ އެއްބަސްވުމަކަށް އާދެވިދާނެ ކަމަށް ވިދާޅުވެ ހަމަލާތައް ފަސްކުރެއްވީ ކަމަށް ވިދާޅުވެފަ އެވެ.
"މިހާރު އަޅުގަނޑުމެން މިކުރާ ކަމަކީ މަޝްވަރާގެ ސިފައެއްގައި އެ މީހުންނާ ވާހަކަ ދެއްކުން. މާދަމާ މެންދުރުފަހު އެކަން ފެށޭނެ،" މަޝްވަރާތައް ބާއްވާނެ ތަނަކާއި ބައިވެރިވާނެ ފަރާތްތަކުގެ ތަފްސީލު ދެއްވުމެއްނެތި، އެއާ ފޯސް ވަން ބޯޓުގައި ހުންނަވައިގެން އާދީއްތަ ދުވަހު ނޫސްވެރިންނަށް ޓްރަމްޕް ވިދާޅުވި އެވެ.
އެމެރިކާގެ ރައީސް ވިދާޅުވި ގޮތުގައި، ހަމަލާތައް ދިނުން މަޑުޖައްސާލުމަށް އެދިފައިވަނީ އީރާނުގެ އިތުރުން އެމެރިކާގެ ބައިވެރިން ކަމަށްވާ ސައޫދީ އަރަބިއްޔާ، ޔޫއޭއީ އަދި ގަތަރެވެ. އަދި އެ ހަމަލާތައް ދިން ނަމަ އެއީ "ދެވަނަ ބޮޑު ހަނގުރާމައަށްފަހު ދެވޭނެ އެންމެ ބޮޑު ހަމަލާ" ކަމަށް ވެސް އޭނާ ވިދާޅުވި އެވެ.
ނަމަވެސް އީރާނުގެ މީޑިއާތަކުން ވަނީ ހަމަލާ ނުދިނުމަށް އެދި އީރާނުން ޓްރަމްޕަށް ދެންނެވި ކަމަށް ބުނާ ބުނުން ދޮގުކޮށްފަ އެވެ.
ކުރިން ހެދި އެއްބަސްވުމުގައި ވެސް ހޮރްމޫޒް ކަނޑުއޮޅި ހުޅުވާލުން ހިމެނުނު ނަމަވެސް، އެ އެއްބަސްވުން ވަނީ ރޫޅިފަ އެވެ. އަދި އޭގެ ފަހުން އީރާނުން ވަނީ އެ ކަނޑުއޮޅީގެ ކޮންޓްރޯލް އިތުރަށް ވަރުގަދަކޮށްފަ އެވެ.
ހަނގުރާމަ ފެށުނުއިރު އެމެރިކާގެ ރައީސް ވިދާޅުވީ، މިއީ އީރާނުގެ ނިއުކްލިއާ ޕްރޮގްރާމާ ދެކޮޅަށް ކުރަން މަޖުބޫރުވި ހަނގުރާމައެއް ކަމަށެވެ. އީރާނުން ނިއުކްލިއާ ބޮމެއް އުފެއްދުމަށް މަސައްކަތްކުރާ ކަމަށް ހުޅަނގުގެ ގައުމުތަކުން ތުހުމަތުކުރި ނަމަވެސް، އީރާނުން ބުނަމުންދަނީ އެއީ މުޅިން ވެސް މަދަނީ ބޭނުންތަކަށް ހިންގާ ޕްރޮގްރާމެއް ކަމަށެވެ.