ނިއު ދިއްލީ (ސެޕްޓެމްބަރު 28) – އިންޑިއާގެ ވެރިރަށް ނިއު ދިއްލީގެ ވައި ނުސާފުވުމުގެ މައްސަލަ ހައްލުކުރުމަށް އަޅާ ފިޔަވަޅުތަކުގެ ތެރެއިން، ކުރިއަށް އޮތް ފިނިމޫސުމުގައި އެ ސިޓީގައި އިމާރާތްކުރުމުގެ މަސައްކަތްތައް ހަ ހަފުތާއަށް މަނާކުރަން ނިންމައިފި އެވެ.
އާބާދީ 30 މިލިއަނަށް އަރާ ނިއު ދިއްލީއަކީ އިންޖީނުގެތަކުން ބޭރުކުރާ ދުމާއި، އުޅަނދުފަހަރުގެ ދުމާއި، އިމާރާތްކުރުމުގެ މަސައްކަތްތަކާއި ދަނޑުވެރިކަމުގެ ކުނި އެންދުމުގެ ސަބަބުން ދުނިޔޭގެ އެންމެ ވައި ނުސާފު ސިޓީތަކުގެ ތެރޭގައި ހިމެނޭ ތަނެކެވެ.
އިމާރާތްކުރުން މަނާކުރާނީ ޑިސެމްބަރު 10 އިން ޖެނުއަރީ 20 ގެ ނިޔަލަށެވެ. މިއީ އާންމު ދަތުރުފަތުރުގެ ވަސީލަތްތައް ބޭނުންކުރުމަށް ބާރުއެޅުމުގެ ގޮތުން، ދުއްވާ އެއްޗެހި ކޮންޓްރޯލްކުރުން ވެސް ހިމެނޭ 'ވިންޓާ އެކްޝަން ޕްލޭން' ގެ ދަށުން އަޅާ ފިޔަވަޅެކެވެ.
ދިއްލީގެ އެންވަރަމަންޓް މިނިސްޓަރު މަންޖިންދަރު ސިންގް ސިރުސާ ވިދާޅުވީ، ފިނިމޫސުމުގައި ސިޓީގެ ވައި ނުރައްކާތެރި މިންވަރަށް ނުސާފުވުން ހުއްޓުވުމަށް މިފަދަ ވަރުގަދަ ފިޔަވަޅުތައް ކުރީކޮޅު އެޅުން މުހިންމު ކަމަށެވެ.
ފިނިމޫސުމުގައި، ތަޣައްޔަރު ވައި ބިމާ ކައިރީގައި ހިފެހެއްޓޭތީ، ދިއްލީގެ ވައިގެ ނުސާފު މިންވަރު އާދަޔާ ހިލާފަށް މަތިވެ އެވެ.
'ދަ ލެންސެޓް' ޖާނަލްގެ ދިރާސާއަކުން ދައްކާގޮތުގައި 2009 އާއި 2019 އާ ދެމެދު އިންޑިއާގައި 3.8 މިލިއަން މީހުން މަރުވެފައިވަނީ ވައި ނުސާފުވުމުގެ ސަބަބުންނެވެ. އަދި ދިއްލީގައި، ކެންސަރަށް މަގުފަހިކުރާ ޕީއެމް 2.5 ގެ މިންވަރު އާންމުކޮށް ހުންނަނީ ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން ކަނޑައަޅާފައިވާ މިންގަނޑަށްވުރެ 20 ގުނަ މަތީގަ އެވެ.
މި ފިޔަވަޅުތަކުގެ އިތުރުން ނޮވެމްބަރު 1 އިން ފެށިގެން ފެބްރުއަރީ 28 އަށް އޮފީސްތަކުގެ މަސައްކަތު ގަޑި ބަދަލުކުރުމަށް ވެސް ވަނީ ހަމަޖެހިފަ އެވެ. އަދި އަމިއްލަ އުޅަނދުފަހަރު ބޭނުންކުރުން މަދުކުރުމުގެ ގޮތުން ޕާކިން ފީތައް ދެގުނައަށް ބޮޑުކުރުމަށް ވެސް ވަނީ ނިންމައިފަ އެވެ. -- އޭއެފްޕީ