އަބޫދާބީ (ސެޕްޓެމްބަރު 29) – އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ޔުނައިޓެޑް އަރަބި އެމިރޭޓްސް (ޔޫއޭއީ) އަށް ގޮސް، އެގައުމުގެ ރައީސް މުހައްމަދު ބިން ޒައިދު އަލް ނަހުޔާންއާ އާދީއްތަ ދުވަހު ބައްދަލުކުރި ކަމަށް އިޒްރޭލުގެ މީޑިއާއިން ކުރިން ކޮށްފައިވާ ރިޕޯޓަކީ ތެދެއްކަން ދެ ފަރާތުން ވެސް ކަށަވަރުކޮށްދީފި އެވެ.
ނަތަންޔާހޫގެ އޮފީހުންނާއި ޔޫއޭއީގެ ދައުލަތުގެ މީޑިއާއިން ވެސް ވަނީ މި ބައްދަލުވުން ކަށަވަރުކޮށްދީފަ އެވެ. ބައްދަލުވުމުގައި ވަނީ ގުޅުން ބަދަހިކުރުމާއި، އީރާނުގެ ހަނގުރާމައާ ގުޅިގެން ސަރަހައްދީ މަސްރަހަށް ކުރިމަތިވެފައިވާ ގޮންޖެހުންތަކާ މެދު މަޝްވަރާކޮށްފައި ކަމަށް ރިޕޯޓްތައް ބުނެ އެވެ.
އިޒްރޭލުގެ މީޑިއާތަކުން ރިޕޯޓްކޮށްފައިވާ ގޮތުގައި، ނަތަންޔާހޫ ކުއްލި ގޮތަކަށް ޔޫއޭއީއަށް ދިޔައީ، އޮކްޓޫބަރު 7، 2023 ގައި ހަމާސްއިން ދިން ހަމަލާގެ ކުރިން އެ މައުލޫމާތު ލިބިވަޑައިގެން ޔޫއޭއީގެ ރައީސް ސީދާ ނަތަންޔާހޫއަށް އެކަން ހިއްސާކުރި ކަމަށް ބުނާ މީޑިއާ ރިޕޯޓް ދޮގުކޮށްދިނުމަށް އެދި އެވެ. ނަމަވެސް ނަތަންޔާހޫ ވަނީ އެފަދަ އިންޒާރެއް ލިބުނު ކަމަށް ދެކެވޭ ވާހަކަތައް މީގެ ކުރިން ދޮގުކޮށްފަ އެވެ.
މި ދަތުރުގެ މައުލޫމާތު އިސްރާއީލުގެ 'ޗެނަލް 12' އިން ރިޕޯޓްކުރުމާ ގުޅިގެން، އިޒްރޭލުގެ އެތެރޭގެ ރައްކާތެރިކަމާ ބެހޭ އިދާރާ، ޝިން ބެއިތު އިން ވަނީ އެ ޗެނަލާ ދެކޮޅަށް ޗީފް މިލިޓަރީ ސެންސައަށް މައްސަލައެއް ހުށަހަޅައިފަ އެވެ. ނަތަންޔާހޫގެ އޮފީހުން ބުނީ، ދަތުރު ނުނިމެނީސް އެ މައުލޫމާތު އާންމުކުރުމުގެ ސަބަބުން ނަތަންޔާހޫ އާއި އޭނާގެ އަންހެނުން އަދި މޮސާޑްގެ ވެރިޔާ ހިމެނޭހެން ޑެލިގޭޝަންގެ ފުރާނައަށް ނުރައްކާވި ކަމަށެވެ.
އެމެރިކާގެ ރައީސް ޑޮނަލްޑް ޓްރަމްޕްގެ ފުރަތަމަ ރިއާސަތުގައި، 2020 ވަނަ އަހަރު ސޮއިކުރި 'އަބްރަހަމް އެކޯޑްސް' ގެ ދަށުން އިޒްރޭލާ އެކު ރަސްމީ ގުޅުން ގާއިމުކުރި ޔޫއޭއީއަކީ އެމެރިކާގެ މުހިންމު ބައިވެރިއެކެވެ. އިޒްރޭލާއި އީރާނާ ދެމެދު ހިނގަމުންދާ ހަނގުރާމައިގެ ތެރޭގައި އިޒްރޭލުން ވަނީ 'އަޔަން ޑޯމް' ދިފާއީ ސިސްޓަމްތައް ވެސް ޔޫއޭއީގައި ބަހައްޓައިދީފަ އެވެ. -- އޭއެފްޕީ