ސައޫދީ އަރަބިއްޔާގެ މައްކާގެ ތާޑް ރިންގް ރޯޑާއި ޕްރިންސް ސައުދު އަލް-ފައިސަލް މަގަށް އިތުރުކުރި އާ ލޭންތައް އާންމުކޮށް ދަތުރުފަތުރަށް ހުޅުވާލުމާ އެކު، އެ މަގުތަކުގައި ދަތުރުކުރުމަށް ހޭދަވާ ވަގުތު 90 ޕަސެންޓަށްވުރެ ބޮޑަށް ކުޑަވެގެން ގޮސްފައިވާ ކަމަށް ސައޫދީ ޕްރެސް އޭޖެންސީ (އެސްޕީއޭ) އިން ބުނެފި އެވެ.
- ތާޑް ރިންގް ރޯޑް: މި މަޝްރޫއުގެ ދަށުން ތާޑް ރިންގް ރޯޑަށް ވަނީ 1.5 ކިލޯމީޓަރުގެ އިތުރު ބަޔެއް ގުޅާލައިފަ އެވެ. މި ބައިން ޕްރިންސް ސުލްތާން އިންޓަސެކްޝަން މެދުވެރިކޮށް ޕްރިންސް މުތްއިބް އަދި މަސްޖިދުލް ހަރަމް އިންޓަސެކްޝަން ގުޅުވާލަދެ އެވެ.
- ޕްރިންސް ސައުދު އަލް-ފައިސަލް މަގު: މި މަގުގެ އެންމެ ފަހުގެ ބައިގައި މިހާރު ވަނީ ޓްރެފިކް ހުޅުވާލައިފަ އެވެ. މި ބައިން ޕްރިންސް ނާއިފް ބިން އަބްދުލްއަޒީޒް އިންޓަސެކްޝަން މެދުވެރިކޮށް ޕްރިންސް މުހައްމަދު ބިން ސަލްމާން ކޮރިޑޯ، އަބްދުލްގާދިރު ކޯޝަކް މަގާ އެކު ގުޅުވާލަ އެވެ.
ރޯޔަލް ކޮމިޝަން ފޯ މައްކާ ސިޓީ އެންޑް ހޯލީ ސައިޓްސް (އާރްސީއެމްސީއެސް) އިން ކުރި މި މަސައްކަތަކީ މައްކާގެ ތޮއްޖެހުން ކުޑަކުރުމަށާއި، މަގުމަތީގެ ރައްކާތެރިކަން އިތުރުކުރުމަށްޓަކައި ހިންގާ އުމްރާނީ ތަރައްގީގެ ބޮޑު މަޝްރޫއުގެ ބައެކެވެ. މީގެ މައިގަނޑު ބޭނުމަކީ މައްކާގެ އާންމު ރައްޔިތުންނާއި، ޒިޔާރަތްކުރާ ފަރާތްތަކުގެ އިތުރުން، ހައްޖާއި އުމްރާގެ ދުވަސްވަރު ހައްޖާޖީންނަށް ދަތުރުފަތުރުކުރުން ލުއިފަސޭހަކޮށްދިނުމެވެ.
މައްކާގެ ތާޑް ރިންގް ރޯޑްގެ މަސައްކަތް ކުރިއަށްދާތާ 10 އަހަރަށްވުރެ ގިނަ ދުވަސް ވެއްޖެ އެވެ. މި މަސައްކަތް ތިން އަހަރެއްހާ ދުވަހުގެ މެދުކެނޑުމަކަށް ފަހު، 2019 ވަނަ އަހަރު މައްކާ ޕްރޮވިންސް ޑިވެލޮޕްމަންޓް އޮތޯރިޓީން ވަނީ އަލުން ފަށައިފަ އެވެ. އޭރު ގާތްގަނޑަކަށް 14 ކިލޯމީޓަރުގެ ބައި ނިމިފައިވާކަން ހާމަކުރި އެވެ.
މައްކާގެ ގަވަރުނަރު ޕްރިންސް ޚާލިދު އަލް ފައިސަލް 2012 ވަނަ އަހަރު ވަނީ އެ ސިޓީގެ ރިންގް ރޯޑްތައް ހެދުމަށް ދެ ބިލިއަން ރިޔާލްގެ ދެ އެއްބަސްވުމެއްގައި ސޮއި ކުރައްވައިފަ އެވެ. އޭގެ ތެރޭގައި ދެވަނަ ރިންގް ރޯޑްގެ ފަސް ކިލޯމީޓަރުގެ ސަރަހައްދު ނިންމުމާއި 14.5 ކިލޯމީޓަރުގެ ތާޑް ރިންގް ރޯޑްގެ ތިން ވަނަ ފިޔަވަހީގެ މަސައްކަތް ހިމެނެ އެވެ. މި ދެ މަޝްރޫއަކީ މައްކާ ތަރައްގީކުރުމުގެ ޕްރޮޖެކްޓް ކަމަށްވާ ކިންގް އަބްދުالله ޕްރޮޖެކްޓްގެ ދަށުން ކުރިއަށް ގެންދާ މަޝްރޫއެކެވެ.