ޔަމަނުގެ ހޫތީ ހަނގުރާމަވެރިން މި ހަފުތާގެ ކުރީކޮޅު ސައޫދީ އަރަބިއްޔާގެ މަދީނާގައި ހުންނަ ކަރަންޓު ޑިސްޓްރިބިއުޝަން ސްޓޭޝަނަކަށް ޑްރޯން ހަމަލާއެއް ދީފައިވާ ކަމަށާއި އެއީ މަސްޖިދުއް ނަބަވީއަށް ކަރަންޓު ދިނުމަށް ބޭނުންކުރާ ވަސީލަތްތަކުގެ ތެރޭގައި ހިމެނޭ ތަނެއް ކަމަށް ސައޫދީ އިސްވެއޮންނަ ކޯލިޝަނުން ބުރާސްފަތި ދުވަހު ބުނެފި އެވެ.
ކޯލިޝަންގެ ތަރުޖަމާނު ބްރިގޭޑިއާ ޖެނެރަލް ތުރުކީ އަލް މާލިކީ ވިދާޅުވީ، އަންގާރަ ދުވަހު ހޫތީންގެ ހަމަލާ އަމާޒުކޮށްފައިވަނީ "ތައިބާ" ކަރަންޓު ޑިސްޓްރިބިއުޝަން ސްޓޭޝަނަށް ކަމަށާއި، މި ހަމަލާގައި ޓްރާންސްފޯމަރަކަށް ގެއްލުންވެ، އެ ބޭނުންނުކުރެވޭ ވަރަށް ހަލާކުވެފައިވާ ކަމަށެވެ. ނަމަވެސް، މި ހަމަލާގެ ސަބަބުން މުޅި ސަރަހައްދުގެ ކަރަންޓު ވިއުގައަށް ބުރޫ އަރާފައިނުވާ ކަމަށް އޭނާ ވިދާޅުވި އެވެ.
ކޯލިޝަނުން ބުނި ގޮތުގައި، ހަމަލާދިން ޑްރޯންގެ އެތިކޮޅުތައް ތަހުގީގުކޮށް ބެލިބެލުމުން، މި ހަމަލާގެ ޒިންމާ އުފުލަންޖެހެނީ ހޫތީންކަން ވަނީ ކަށަވަރުވެފަ އެވެ. އަދި އެ ސްޓޭޝަނަކީ ހުރުމަތްތެރިވެގެންވާ ބިންތަކުގެ ތެރޭގައި ހިމެނޭ މަދީނާގެ މަސްޖިދުއް ނަބަވީއަށް ކަރަންޓުގެ ހިދުމަތް ފޯރުކޮށްދޭ ވަސީލަތްތަކުގެ ތެރޭގައި ހިމެނޭ ތަނެއް ކަމަށްވެސް ކޯލިޝަނުން ބުންޏެވެ.
އެންމެ މުގައްދަސް ދެ ހަރަމްފުޅާ ގުޅުންހުރި ތަންތަނަށް އަމާޒުކޮށް ހަމަލާދީގެން ދުނިޔޭގެ އެކި ކަންކޮޅުތަކުގައިވާ އެތައް މިލިއަން މުސްލިމުންނެއްގެ ޝުއޫރުތަކާ ކުޅެން ހޫތީން ގަސްދުގައި މަސައްކަތްކުރާ ކަމަށް ކޯލިޝަނުން ވަނީ ތުހުމަތުކޮށްފަ އެވެ. އަދި ހޫތީންގެ ހަމަލާތައް ހުއްޓުވައި، ހުރުމަތްތެރިވެގެންވާ ބިންތަކުގެ ރައްކާތެރިކަން ކަށަވަރުކުރުމަށްޓަކައި އަޅަންޖެހޭ ފިޔަވަޅުތައް އަޅަމުންދާނެ ކަމަށްވެސް ކޯލިޝަނުން ބުންޏެވެ.
ހޫތީން ސައޫދީއަށް ދޭ ހަމަލާތައް އިތުރުކޮށްފައި ވާއިރު ކައުބާ ހުންނަ މައްކާއަށް ވެސް ހަމަލާ އަމާޒުކޮށްފައިވާ ކަމަށް ސައޫދީ ކޯލިޝަނުން ވަނީ ބުނެފަ އެވެ. ނަމަވެސް ހޫތީން ބުނެފައިވަނީ އެއީ ދޮގެއް ކަމަށާއި ހުރުމަތްތެރިވެގެންވާ ބިންތަކާ ހަމަލާ ނުދޭ ކަމަށެވެ.
ސައޫދީގެ ވަލީއަހުދު މުހައްމަދު ބިން ސަލްމާން މިއަދު ޝޫރާ ކައުންސިލަށް ދެއްވި އަހަރީ ހިތާބުގައި، ސައޫދީގެ ސަލާމަތަށް ހުރި ނުރައްކާތަކާއި ހަމަލާތަކަށް "ވަރުގަދަ" ރައްދެއް ދިނުމަށް ސައޫދީ ފަސްނުޖެހޭނެ ކަމަށް ވަނީ ވިދާޅުވެފަ އެވެ. ނަމަވެސް ސަރަހައްދީ ނުތަނަވަސްކަން ކުޑަކޮށް، ހާރިޖީ ހައްލުތައް ހޯދުމަށް ވެސް ރިޔާޟުން މަސައްކަތްކުރަމުން އަންނަ ކަމަށް ވިދާޅުވި އެވެ.